ESTA 3 - Bibliyeeda Ghaydit

Hamani ghamwaal gichea ghwalasta uhuuda fuga Israeli

¹ Iing'ata ng'asheesu gageanu sugoocheanda was Ahuseri ghoadaw hawunda Hamani was orjeeda Hamedata bea dooshta Agagi, ak ghwayiin hoorgeadaanyi goombal fuga mideayi sea niny.

² Nea fuga gadiyeeda sean bea sugoocheanda ea gea fur dooshta gheeda sugoocheanda inyeesa geetkuy nea geesissa Hamani mureeda; aba gidarukusiinda sugoocheanda niny. Nea Mordekai ea matkunya nea masina mureeda.

³ Hean ghwalamda fuga gadiyeeda fur dooshta gheeda sugoocheanda ak geeyeesha Mordekai, “Ghwasaan anda giheawi ng'asheanda rugu sugoocheanda?”

⁴ Inyeesa geepalool niny galeagasean, ak ea mooleeysiiniit saawa, ak geerukusa Hamani, eadaah ea jea gwasinda ng'asheega Mordekai; aba gideaba niny nirukusa saawa gideaba niny siida Yahudi gil.

⁵ Hean nea ghwadaah Hamani gideaba Mordekai mwahinya geaw nea moadawa mureeda niny, hean ghwanyareas Hamani muuchi.

⁶ Ak ghwadaah mwadoabiiwa gideaba gayghabwar Mordekai nea gabwa geaw. Aba gideaba sirukusa Mordekai eemeeda bea, Hamani gagasa ghwalas uhuuda fuga Israeli sean, was fuga Mordekai, mida ng'eanyiisean bea sugoocheanduumeeda Ahasuero.

⁷ Ak sheeda madeeda nea Nisani gil nea gweaydeaba damaniyeenya aba sugoocheanduumeeda Ahasuero, inyeesa geesin loota siguura Buri aba madeeda Hamani, galeagasean ea gilak sheeda ea ghwahita sheeh damaniyeenya, nea sheeda siguura Adari.

⁸ Hean ghwalamda Hamani ak gwayeesha sugoocheanda was Ahasuero, “Gwanda fiispa eemoojiga nidarda aba jeeda buuneesean bea darooraka sugoocheanduumeadaang'u; ak deaweedajeega nyaawa ea maweapchi sea dea buuneesuurja, nea meang'waanya eara deaweedeeda sugoocheanda, asi aba sareani mayghoamu geat sea sugoocheanda.

⁹ Ak inyas ghwadaah sugoocheanda gideaba ghwadoabiiw gagasa eatayda diigheanda gideaba ealas uhuuda eenung' goosha, ak abeeda fuga jea gwasin gadiyeeni gaydaadaw dalaantaji sagalamnyooji damanamughuush bea lapiya, ak gajeayiin heeda siitiiwiisa haleanjeeda sugoocheanda.”

¹⁰ Hean ghafwakta sugoocheanda ghuniidaanyi aba geatindaanyi ak ghoadaw Hamani orjeeda Hamedata bea dooshta Agagi, was weajoocheanda fuga Israeli.

¹¹ Ghwalamda sugoocheanda ak gwayeesha Hamani, “Lapiya sigoonyi, eara buuneeda, simana saawa gididaakti gideaba aamiy aba headaang'u.”

¹² Hean geeguursa ng'oorshoodiga sugoocheanda eaweedeaba damasamwagu bea sheeda madeeda, aba gidarukuteayda Hamani sean, geeng'oorsa barawajeega fuga hees ea sugoodiga hees sean bea darooraka ea fuga hees ambal buuneesean, aba darooraka sean gaba ng'oorshooni bea iitaanyi nea gaba siisi bea iitaanyi; ak geang'waar aba gheawunga sugoocheanda was Ahasuero ak geayiin giirooraneeda ghuniida sugoocheanda.

¹³ Ak geecheakteawa buuneeda barawajeega ghwaat jeeda darooraka sean bea sugoocheanda, ghwalas uhuuda, nea gwanuuseada, fuga Israeli gheareemanga ea gweargwa, gadeemga ea diibiga, aba jeemba eaweecheanjagi, ak eaweedeaba damasamwagu bea sheedeaba damaniyeenya siguura Adari gil, ak geegeanda haleanjeeda nyaawa.

¹⁴ Ak ng'oordeaba iidi was diigheanda sigadiyeata aba darooraka sean siikuuli buuneeseaniin geanung' goodiing'diing'da geat buuneeda aba eaweedida.

¹⁵ Hean gaweay fugiga siicheaktean nea ghwahal geat, aba girukusiinda sugoocheanda, ak geerukuta iidi aba ng'eanyiida Susa. Hean ng'ata goopteada sugoocheanda ea Hamani ak gwaleeshi, nea mujiineeda Susa gwahirbiban.