ESTA 2 - Bibliyeeda Ghaydit

Esta ghoah gatmooda sugoocheanda

¹ Iing'ata ng'asheesu, nea niisha nyarasta sugoocheanda was Ahasuero, hean ghoapkaat Fashti ea gisin ea ng'asheanda sirugu aba badaydaanyi.

² Ghwalamda fuga gadiyeeda bea gheeda sugoocheanda ak gwayi, “Gidabal geegakiisa sugoocheanda haweega miyaasiin miyeegeanu.

³ Ak gayghwayiin sugoocheanda fuga ambaliischi jeeda darooraka sean bea sugoocheanduumeadaanyi ak geabwadageat haweega miyaasiin miyeegeanu ak gaweay Susa, was gheeda gadeemga nea ghoahaaghwa Hegayi, was siida sigul bea gheeda sugoocheanda nea gafur gadeemga; nea geataw saawa nagheeda jea ghoamiidu saawa.

⁴ Ak huda jea goohoosan sugoocheanda abeeda gayghoah gatmooda sugoocheanda gawa hoorgeeda Fashti.” Ng'asheanji ghwanung' goohoosan sugoocheanda ak gwasindunu.

⁵ Abeeda gwanda sispa Israeli ng'eanyiida Susa siguura Mordekai, was orjeeda Yairi, orjeeda Shimeyi, orjeeda Gishi, bea eemeeda Benjamini,

⁶ gaba gea ghayi siyaada Yerusalemu bea jeeda fuga ghealooniga siyaat sea Yekoniya was sugoocheanda Yuda, ghayi aat Nebukadinesa was sugoocheanda Babeli.

⁷ Niny abeeda gweadu Hadasa, nea Esta gil, was huda ghamaghwaan, aba gideaba bananeeda gil mandeawana ghwaan ghana ghaamwat; ak huda gaba leanga miyaas, damanda meawa ghwaan ea ghaamwat, ghwaat Mordekai ghwanung' gawuurji hudaanyi jiilsa geaw.

⁸ Iidu nea niiguuli ng'eanyiisean ng'asheanda sugoocheanda, nea abeeda ea nibassa geat haweega mujiineeda Susa, nea ghoahaaghwa Hegayi, Esta eara ada geayaat gheeda sugoocheanda, ak geayiin geatinga Hegayi was dea ahaaghwa gadeemga.

⁹ Ak gahoosan niny aba badaydeaba hudida, ak gwasissa ng'asheega miyaas, ak ghwalamwach ghoadaw dabita jea gwayeeriida, ea daghwardaanyi was hamita, ea haweega gadiyeeda bea gheeda sugoocheanda, ak goobaleak niny ea haweega gadiyeeda ak ghwayiin heeda miy bea gheeda gadeemga.

¹⁰ Ak Esta ea mii gwarukuta geaw eemoocheanda was ghana gheeda bea, aba gideaba gidarukusiinda Mordekai gil gideaba adirukuti geaw.

¹¹ Inyeesa galeagasean Mordekai gwaneayi aba madeeda seamooda gheeda gadeemga, ghwadaah Esta ea gabaseayu ea gichea ghwanyas.

¹² Iidu nea nihita damanda jea ghabeawa hudagi heeda sugoocheanda was Ahasuero, nea sisissa suulga sheeh damaniyeenya aba giduurji deaweedeeda gadeemga, ea giduurji gil iihita damanda giimiinnooda, sheelah geayeashta nagheeda geediga ng'andidi ak sheelah gicha geayeashta nagheega ea geediga ng'andidi bea gadeemga–

¹³ Iissa iiwea huda heeda sugoocheanda, gidagasa sean jea ghwaat gheeda sugoocheanda inyeesa geataw.

¹⁴ Inyeesa shing'ada gawa, ak sakteayda gabiikta gheeda niirja bea gadeemga heeda Shaashgasi was siida sigul bea sugoocheanda nea goombal gwealajeega; ak ea maygut gawa gicha heeda sugoocheanda, geaghus ea nihoosan sugoocheanda ak geeguursa aba gheawungaaschi.

¹⁵ Iidu nea ghwahidu galanda Esta was hudeaba Abihaili was orjeeda ghamagheamata Mordekai, ghayi geanda ghwanung' gawuurji hudaanyi jiilsa geaw, ak gawa heeda sugoocheanda, niny abeeda magasa gil geaghus geaghayi rukusa Hegayi was furiischoocheanda sugoocheanda nea goombal gadeemga. Abeeda Esta ea ninyas dagheerjeanduumeeda aba badayda buuneesean daah niny.

¹⁶ Hean geayaat Esta gheeda sugoocheanda was Ahuseri, nea abeeda ea sheedamuut gil, was Debeti nea gweaydeaba ispwa gil aba sugoocheanduumeadaanyi,

¹⁷ ak ghabwariiy sugoocheanda Esta ea ghang'al haweega sean miyeegeanu, ak ghwanyas dagheerjeanduumeeda nea geamwas ea ghang'al haweega sean, hean ghwayiin uhuuda shiipka sugoocheanduumeeda ak ghwanung' ghoah gatmooda sugoocheanda gawa hoorgeeda Fashti.

¹⁸ Hean gwasissa sugoocheanda ghweelmeeda haw fugaaschi ambaliischi sean ea fuga gadiyeeda; nea ghweelmeeda Esta gil. Ak ghwanung' ea moadayda buuneeda gwaadi aba jeeda darooraka, ak ghoadayda haleanjeeda guskuseega gaweeda gidagasiida sugoocheanda.

Mordekai ghoaghu eaweega sugoocheanda

¹⁹ Iidu nea ghabwatgeat haweega miyeegeanu deabiyeenya, abeeda Mordekai goopteada aba dooshta gheeda sugoocheanda.

²⁰ Esta abeeda ea miigwarukuta geaw gheeda bea ea dooshtaanyi, gawuurji gidarukusiinda Mordekai; aba gideaba Esta gudughoang'waay ng'asheega Mordekai gawuurji damanda ghayi areara niny aba jeepcheanduumeeda.

²¹ Ak damandida apteada Mordekai aba ghuuta dooshta gheeda sugoocheandean, hean gwanyareesi fih iyeenya silach siguura Bigtana ea Dereshi was furiischoodiga gheeda sugoocheanda, ea eegasa eabwar sugoocheanda was Ahuseri.

²² Ak ghwanal Mordekai ng'asheanji ak gwarukusa gatmooda sugoocheanda was Esta ak gwarukusa Esta sugoocheanda aba gheawunga Mordekai.

²³ Nea inyas geesikteawa ng'asheanji, ak geanyas huumeandaanyi, fiisu asiyeenyean abeeda gajeaghasta aba iheenga geediga. Ak ng'asheesu gajeeng'oorsa jeeda gitaabooda damanyoojiga aba madeeda sugoocheanda.