ESRA 9 - Bibliyeeda Ghaydit

Esra gagasa ghwanal gidageeshacheata fuga mawoosa Yahudi

¹ Iing'ata ng'asheesu seaniin ghapka heedeanyu fuga hees ak gwayi, “Fuga Israeli ea ashoohoodiga ea fuga Lawi meang'aamwana geat fugeaba ng'eang'i aba ng'asheega nyaawa munyas bea fuga Ganaani, ea Hiti, ea Berisi, ea Yebusi, ea Amoni, ea Moabu, ea fuga Misri, ea Amori.

² Aba gideaba nigeena haweegeaba fiisu ghoah gadeemga nyaawa, ea gadeemga orjooga nyaawa; hean ea niguuyi ghaydidanda nyaawa sea fugeaba ng'eang'i. Ak giidiinyeanda goosheeda gwasin geatinda fuga hees.”

³ Hean nea ghaayiinyi ng'asheesu, ghaabwaashaadi hang'weakeasu ea gooteedeanyu, nea gealootu buudeega uhuudeanyu ea deamuukeasu, ak geapteadi nea ghahamwan ng'eanyi.

⁴ Hean gabassean geat fuga sean boadan aba ng'asheega ASEETA Israeli, aba giidiinyeanda fuga leabu giibaleakta, hean geapteadi nea ghaahamnyi ng'eanyi ea ghoah shing'ada damanda lukghumeeda.

⁵ Hita damandeaba shing'ada bea lukghumeeda ghaang'eadi heeda gwachi ealuuldeaysi geaw, sea hang'weakeasu ea gooteedeanyu bwaashaat ak geakuli gutung'weakeasu ng'eanyi nea ghaamiindi geatingeasu deageal humng'eeda heeda NG'UTAMIIDA was ASEETEANYU,

⁶ nea geayeeshi: “Ea ASEETEANYU, naabwasbwaschi ak ea neahirbabanyi aba gideaba gaydagatgat gheanyangeasu deageal heeda ASEETEANYU, aba gideaba giidiinyeanyeekaasa nidiyeada ea ghwasuut iheengaasa, nea ramaseandeanya ea nidiyeada ea ghwahita humng'eeda.

⁷ Ghang'eada damanda ghayi bea ghweanigaasa ea ghwahidu damani geendeawi giidiinyeanda haw; aba badayda giidiinyeanyeekaasa ea sugoodigaasa, ea ashoohoodigaasa siyiineasa geatinda sugoodigeaba ng'eang'i; ak geabwareasa aba ng'uta, nea geahuuyi fuga ng'uta, nea geereadeasa haleanjeedeanya, nea geapwaaspwaseasa, gawuurji gideaba ghamneawa.

⁸ Ak ghamneawa aba gheadi nuwaas niihiimneasa dagheerjeanduumeeda NG'UTAMIIDA was ASEETEANYA, ak ghwanung'waneasa gheaptanga ghwalaalaan nea ghwayiin halaghweenga headaanyi ghaydit ak gagasa ghwayiin ASEETEANYA weeshinda gheanyangaasa, ak geanyaschi hawdeayda gilimwanang' aba ghealoonigaasa.

⁹ Aba gideaba aseasa geewooschi soomjooga ak ASEETEANYA ea mii ghwanung'waneasa jeeda soomjeanduumeedeanya, ak gagooneasa bariinyeega huumwa, aba madeeda sugoodiga Ajemi, nea geahawdi ak geamiindi gheeda ASEETEANYA nea geesinyi heeda nyar, nea gagooneasa ghamarda aba Yuda ea Yerusalemu.

¹⁰ “Ak ghamneawa, Ea ASEETEANYA, gajeayeanaan iing'ata suh? Aba gideaba sinung'wi heeda diigheanyeakaagu,

¹¹ ghayi irukuni ghuuta fugaagu bea gadiyeeda was ashoohoodiga nea giyeeni, ‘Ng'eanyiida jea aweayeena, ak goombali, gajea ng'eanyiida ririnnyeanda gil aba ririnyeandeaba fugiga bea ng'eanyiita, aba ng'asheega nyaawa munyas nyiit meatkwajeega sean ririnnyeanda nyaawa.

¹² Asi adoatawji haweegeagwa orjooga nyaawa, ghana haweega nyaawa orjoogeagwa, nea adoogasayi hoyyooyda nyaawa ghana miyeenooda ak ghoanyaschi uurda, nea ghoayaaji haleanjeeda bea ng'eanyiida, ak ghoanung'waadi gwahearan diibigeagwa damanda manda muudeanooda.’

¹³ Ak iing'ata suh sean sinyaschi aba badayda ng'asheega munyas sisinyiin ea giidiinyeanyeekaasa hees, ak ang'iing'i ASEETEANYA milaseasa aba giteena giidiinyeanyeekaasa ak ea nigooneasa gheaptanga uurji suh,

¹⁴ gajeadatasa gicha diigheanyeakaagu, ak geeguuyeewi fuga sin ng'asheega munyas nea geegeenayi? Heapi mwaynyareasa ea lasa uhuudeanya ea mudugwanda eara gheaptanga eara siida jea ghwalaalaani?

¹⁵ Ea NG'UTAMIIDA was ASEETA Israeli, ang'iing'i guwoosi dea doabiiwaat aba gideaba aseasa geewooschi fuga siipuut laalaan gawuurji gideaba ghamneawa. Ng'ula geendi madeadaang'u geendeawi giidiinyeanda aba madeadaang'u, ak ea manda siida jea ghamiinaada aba madeadaang'u aba ng'asheanji.”