ESRA 8 - Bibliyeeda Ghaydit

Fuga biikna giibaleakta

¹ Suh fuga hees gil bea gealga ghweaniga nyaawa, ak suh ea fuga dooshinga ghayi siyeeng'na Babeli gil sea aniini, aba damanda sugoocheanda Artashasta:

² orjooga Finehasi, Gershomu. Ea orjooga Itamari, Danieli. Ea orjooga Dawdi ea Hatushi,

³ orjooga Shekanishi. Orjooga Baroshi, ea Sakariya, mooneeda nyaawa ea bughala ea haradam ea damanamughuush headiga.

⁴ Orjooga Bahati-moabu, Eliehoenai, was orjeeda Serahiya sea niny ea bughalaji iyeenya headiga.

⁵ Orjooga Satu, Shekaniya, was orjeeda Yahasieli, sea niny ea bughalaji samwagu headiga.

⁶ Orjooga Adini, Ebedi was orjeeda Yonatan, sea niny ea haradam ea damanamughuush headiga,

⁷ Orjooga Elamu, Yeshaya was orjeeda Ataliya, sea niny ea sagalama ea damanamughuush headiga.

⁸ Orjooga Shefatiya, Sebadiya was orjeeda Mikaeli, sea niny ea seedam headiga.

⁹ Orjooga Yoabu, Obadiya was orjeeda Yehieli, sea niny ea bughalaji iyeenya ea damasis headiga.

¹⁰ Orjooga Bani, Shelomiti was orjeeda Yosifiya, sea niny ea bughala ea laadam headiga.

¹¹ Orjooga Bebayi Sekariya was orjeeda Bebayi, sea niny ea diktam ea sis headiga.

¹² Orjooga Asgadi, Yohanani was orjeeda Hakatani, sea niny ea bughala ea damanamughuush headiga.

¹³ Orjooga Adonikamu, saawa gea huuydean gil, gheawunga nyaawa geaba Elifeleti gil ea Yeueli, ea Shemaya, sea saawa ea laadam headiga.

¹⁴ Orjooga Bigwayi, Utayi sea Sakuri, sea niny ea laadam ea damanamughuush headiga.

Esra gagasa fuga Lawi aba badayda gheeda sibata ASEETA

¹⁵ Ak ghaabwadi geat saawa aba ghuuteenda gal Ahafa, ak geepiidi hoowa eawooji samwagu. Ak geasikteawi buuneeda ea ashoohoodiga, ak ea mwaadaahi orjeanagi bea Lawi.

¹⁶ Hean geajeakti eeguursa Elieseri, Arieli, Shemaya, Elnatani, Yaribu Elnatani, Natani, Sekariya, ea Meshulamu, was fuga hees, ea Yoyaribu, ea Elnatani was giinealshoodiga,

¹⁷ ak ghaayaachi saawa heeda Ido, was siida haw mida Gasifiya, ak gearukusi saawa gichea gwarukusa Ido, ea fugaaschi duupchi bea gadiyeeda gheeda sibata ASEETA mida Gasifiya, gideaba gweaneasa fuga jea gagadiiyeesa gheeda ASEETEANYA.

¹⁸ Ak geatinda miy bea ASEETEANYA gwanda badaydeanya, ak gweaneasa siida mideawa weaghuumeeda, was siyagi aba jeeda orjooga Mahli was orjeeda Lawi, orjeeda Israeli, ea Sherebiya sea orjoagaaschi ea buweadeagaaschi, fih damasis,

¹⁹ eara Hashabiya sea Yeshaya orjooga Merari, sea buweadeagaaschi ea orjoagaaschi, ea diktam;

²⁰ sea fih bughalaji iyeenya ea diktam was fuga gadiyeeda gheeda sibata ASEETA, ghayi iin Dawdi sea fuga hees ghaweat fuga Lawi nea sean gaba nih siguursiina gheawungaaschi.

Esra ghoadoabiiw buuneeda aba jeeda giiluuldeaydeaba geaw ea mooshta ASEETA

²¹ Hean ghaanung' gooluulda geat aba hoowa, bea ghuuteenda Ahafa, nea geayaachi geat ng'eanyi aba madeeda ASEETEANYA nea geegasayi naweeda doabiiw aba heedeanya ea diibigaasa, ea haleanjeedeanya sean.

²² Aba gideaba ghaawali damus sugoocheanda lugooda shirikarajeega ea fuga ding'da faraasajeega ghaweadeasa aba weajoodiga mida naweedeanya; aba gideaba ghayi sirukusi sugoocheanda gideaba, “Geatinda ASEETEANYA gwasina gea miyaasiin gwanda badayda fuga sean gasa niny nea uurda nyarastaanyi gwanda badayda fuga sean heawa niny.”

²³ Hean geeluuldi geat ak geemuschi ASEETEANYA aba badaydeaba ng'asheanji, ak gooleeyseasa iit.

Haleanjeeda guskuseega bea gheeda sibata ASEETA

²⁴ Hean ghaasaji fih damaniyeenya aba jeeda fuga hees was ashoohoodiga: Sherebiya, Hashabiya, ea fih damanamughuush bea buweadeega nyaawa ea saawa.

²⁵ Ak gealakiisi saawa lapiya ea dahaabu ea dabita, ea haleanjeeda ghadooweeda bea gheeda ASEETEANYA ghayi adayda sugoocheanda ea fugaaschi adawi buuneeda huumeanyeeka ea fugaaschi hees ea fuga Israeli sean;

²⁶ ak ghaayiinaadi geatinga nyaawa dalaantaji bughalaji lah ea haradam ea damanamughuush bea lapiya, ea dabita lapiya dalaantaji bughala, ea dalaantaji bughala bea dahaabu,

²⁷ ea gweeraji diktam bea dahaabu ea giloohaji bughala, ea haleanji iyeenya oomng'i uurji dahaabu haw shaayaat.

²⁸ Ak geayeeshi saawa, “Agooga noowooschi ghaydidi aba heeda NG'UTAMIIDA, eara dabita ea ghaydidi, ea lapiya ea dahaabu ea haleanjeeda sisabwa geadi siitaydaawa jeedeesh aba heeda NG'UTAMIIDA was ASEETA ghweanigeagwa.

²⁹ Fura saawa ak ginung'waadi saawa ea eeteen saawa aba madeeda ashoohoocheanda haw ea fuga Lawi ea fuga hees bea ghweaniga gealga Israeli mida Yerusalemu, aba jeeda ghushuutka gheeda NG'UTAMIIDA.”

³⁰ Hean ghoang'waay ashoohoodiga ea fuga Lawi haleanjeeda lapiya ea dahaabu ea dabita, ak geayaat ea eahiita Yerusalemu, jeeda gheeda ASEETEANYA.

Biikteayda Yerusalemu

³¹ Hean geang'eadi eenda Ahafani eaweedeaba damaniyeenya bea sheeda madeeda, ak geeweayi ea eahita Yerusalemu; nea geatinda ASEETEANYA gwanda badaydeanya ak ghoaghuuhaneasa geatinda weajoocheanda ea habitkwajeega aba naweeda.

³² Geahiti Yerusalemu ak geepiidi hoowa eawooji samwagu.

³³ Eaweeteaba ang'wan, geeteen lapiya ea dahaabu ea dabita aba jeeda gheeda ASEETEANYA, aba geatinga Meremoti was ashoohoocheanda, was orjeeda Uriya, nea abeeda gwandeay niny sea Elieseri orjeeda Finehasi nea saawa gwandeayi sea fuga Lawi, ea Yosabadi, orjeeda Yoshuwa ea No-adia orjeeda Binuyi.

³⁴ Haleanjeeda sean siyiida ak geeteen, nea geang'waar durumanata haleanjeeda sean.

³⁵ Aba damandida fuga leabu giibaleakta ghoadaw ASEETA Israeli haleanjeeda ghadooweeda sighwarda ea jiiru damaniyeenya aba badayda fuga Israeli sean ea lagweendi seedam ea damwalah, ea dayeega gisilga laadam ea damanispwa, ea ghwaray damaniyeenya ak gawuurji haleanjeeda sighadoawanda aba riing'eeda, suh seaniin abeeda haleanjeeda ghadooweeda sighwarda bea NG'UTAMIIDA.

³⁶ Ak geataw digheanyeeka sugoocheanda fuga hees bea lugooda ea sugoodiga hees bea Giigheawda Eenda; ak geaweat buuneeda ea gheeda ASEETA.