ESRA 7 - Bibliyeeda Ghaydit

Esra ghwahita Yerusalemu

¹ Nea iing'ata hiji, hean aba damanda sugoocheanduumeeda Artashasta was sugoocheanda Ajemi, Esra niny orjeeda Seraya gil, orjeeda Asariya, orjeeda Hilkiya,

² orjeeda Shalumu, orjeeda Sadoki, orjeeda Ahitubu,

³ orjeeda Amariya, orjeeda Asariya, orjeeda Merayoti,

⁴ orjeeda Serahi, orjeeda Usi, orjeeda Buki,

⁵ orjeeda Abishuwa, orjeeda Finehasi, orjeeda Eleasari ea orjeeda Haruni was ashoohoocheanda haw.

⁶ Hean gwascheeng'u Esra nea gwaleabu Babeli. Niny abeeda ng'oorshoocheanda deaweedeeda Musa gil ghayi guh NG'UTAMIIDA was ASEETA Israeli; ak gwanyaksa sugoocheanda niny haleanjeeda sean gasa, aba gideaba geatinda NG'UTAMIIDA was ASEATAANYI gwanda badaydaanyi.

⁷ Ak ghwascheang'da eara saawa gaweay Yerusalemu, gweaydeaba ispwa bea sugoocheanduumeeda Artashasta, sea fiisu ng'ay bea Israeli, ea ashoohoodisu ng'ay ea fuga Lawi, ea fuga sarmani, ea furiischoodiga ea fuga gadiyeeda gheeda sibata ASEETA.

⁸ Ak ghwahita Yerusalemu sheedeaba muut, bea gweaydeaba ispwa bea sugoocheanduumeeda Artashasta;

⁹ aba gideaba eaweeda madeeda bea sheeda madeeda ghoang'eat ghuuta bareanyeeka ghang'eada Babeli, ak eaweeda madeeda bea sheedeaba muut ghwahita Yerusalemu, aba gideaba geatinda miy bea ASEETA gwanda badaydaanyi.

¹⁰ Aba gideaba Esra ghwayiin gurooroadaanyi nalooda deaweedeeda NG'UTAMIIDA, ak gwasin, nea ghoanaal diigheanyeekaaschi ea deaweedajeega aba jeeda Israeli.

Barawajeanda adaw Artashasta Esra

¹¹ Nih barawajeanda adaw Artashasta was sugoocheanda Esrahi was ashoohoocheanda, ea ng'oorshoocheanda, anaalgeaw iita digheanyeeka NG'UTAMIIDA ea deaweedajeega aba badayda fuga Israeli:

¹² “Nea Artashasta, sugoocheanda sugoodiga, heeda Esra was ashoohoocheanda, ng'oorshoocheanda deaweedeeda ASEETA mida humng'eeda.

¹³ Ak ghamneawa gearugu diigheanda gideaba gilinyoo ea sih gil aba jeeda fuga Israeli ghana ashoohoodiga nyaawa ghana fuga Lawi mida jeeda sugoocheanduumeedeanyu, gea gasa beata Yerusalemu nea meediing'siina abeeda gajadeayeewana.

¹⁴ Aba gideaba goojeakneey sugoocheanda ea fugaaschi asispwa adawi buuneeda huumeanyeeka nea ghoanyaashta iita Yuda ea Yerusalemu gawuurji gidanyaashta deaweedeeda ASEETEANG'WA, mida geatingeagwa,

¹⁵ ak gageanda lapiya ea dahaabu ghayi adaw sugoocheanda aba jeedeesh ea fugaaschi adawi buuneeda huumeanyeeka ASEETA Israeli, mida Yerusalemu,

¹⁶ Sea lapiyeesean ea dahaabu jea daaha aba ng'eanyiisean bea Babeli, jea ghoadaydaawa buuneeda jeedeesh ea haleanjeeda adayda ashoohoodiga aba jeedeesh, aba gheeda ASEETA nyaawa mida Yerusalemu.

¹⁷ Ak gisini badiida aba lapiyeeni, shaaha heewga, ea gisilga seaweadi, ea dayeega gisilga, sea booga ghadooweeda ea haleanjeeda sileeha gajadayda nea giyiini heeda wagiida bea gheeda ASEETEANG'WA mida Yerusalemu.

¹⁸ Ak ng'asheanda sean iyoadaayi aamiy sinooda ang'iing'i ea buweadeagaagu, aba lapiyeedida ea dahaabu abit asina aba gidagasiida ASEETEANG'WA.

¹⁹ Nea dabita sigoonyi bea gadiyeeda gheeda ASEATAANG'U, adayda aba madeeda ASEATAANG'U mida Yerusalemu.

²⁰ Ak gidawas sean jea eegasa aba badayda gheeda ASEATAANG'U gidamiiseey jea adayda abeeda giidaydi gea siitiiwiisa gheeda sugoocheanda.

²¹ “Aniini Artashasta gil eawooschi sugoocheanda, geagoonyi diigheanda aba fuga sean adiiwi haleanjeeda mida Giigheawda Eenda: Gideaba gida wassean jea gagasa Esra aba heedeang'wa was ashoohoocheanda, ea ng'oorshoocheanda deaweedeeda ASEETA humng'eeda, asina aba uurda muuchi,

²² eara gwadeena dalaantaji bughala bea lapiya, ak geeteen bughala bea ngaano, ea liitaji bughala bea difaayi ea liitaji bughala bea nagheeda, ea balang'da manda giteena.

²³ Nea gichea gwarugu ASEETA humng'eeda, asina nea adaghoashoay aba badayda gheeda ASEETA humng'eeda, ghwasaan anda gajanung' ghwanyareas sugoocheanda ea orjoagaaschi.

²⁴ Ak ea sirukuneegwa gideaba mwadoabiiwa gideaba gaygooruuta gwaadi ghana gujaweeda ashoohoodiga, ea fuga Lawi, ea fuga sarmani, ea fuga fur gidaghuuta, ea fuga gadiyeeda gheeda sibata ASEETA, ghana fuga gadiyeeda suuk bea gheawi bea ASEETEAN.

²⁵ “Ak ang'iing'i, Esra aba weaghuumeeda ASEATAANG'U mida geatindaang'u, geani fuga laja girgweaguutka ea gea aheeldooschi buuneeda ak gooheeli buuneesean mida darooraka Giigheawda Eenda, nea fuga nal deaweedeeda ASEATAANG'U, nea gea mwanala abeeda giinaali.

²⁶ Nea siida mamwasa deaweedeeda ASEATAANG'U ea deaweedeeda sugoocheanda, abeeda gayghwanyas girgweaksiinda muuchi ada eenuus ghana ghwanyas lasooda ghana eareat dabitaanyi ghana eejaksa ghealooniga.”

Esra ghoaghaambiit ASEETA

²⁷ Giigheambiita gaba NG'UTAMIIDA, was ASEETA ghweanigeagwa, ghayi iin ng'asheanda uurjunu jeeda guroorooda sugoocheanda, ak ghoadaamdaam gheeda NG'UTAMIIDA mida Yerusalemu,

²⁸ nea niny ghoahiimnaan bariinyeagaaschi bea huumwa, aba madeeda sugoocheanda ea fugaaschi adawi buuneeda huumeanyeeka ea madeeda fuga hees bea sugoocheanda. Ak ghaanyaschi uurda aba geatinda NG'UTAMIIDA was ASEETEANYU mida badaydeanyu, ak ghaabwadi geat fuga hees bea Israeli ak geeweay nea geeteayi.