ESRA 6 - Bibliyeeda Ghaydit

Geanyas diigheanda Goreshi

¹ Hean ghoadayda Dariyoheeda was sugoocheanda diigheanda gideaba agasa aba heesiitiiwiisa haleanjeeda aba Babeli.

² Ak geanyas gitaabwajeanjagi aba Akmeta aba jeeda gheeda sugoocheanda mida daroorda Mediya, nea ng'asheega sing'oorsa jeeda aba giipkeata ea suh:

³ “Gweayda madeeda bea sugoocheanduumeeda Goreshi, ghoadayda sugoocheanda was Goreshi diigheanda aba badayda gheeda ASEETA mida Yerusalemu, gideaba gheawi gajeedeeksa heeda siitayiideawa lukghumajeega ea haleanjeeda ghadooweeda sighwarda ak geawundaanyi gal humng'eeda gajea geatin laadam gil nea geawunda murdajeega gajea geatin laadam gil,

⁴ ak ginung' ghwaroap geat ghealooni samwagu bea lagheanga hees, ghealoanagi gaygaba geediga eashish; ak lapiyeedeaba gadiyeeni gajeatayda aba gheeda sugoocheanda.

⁵ Eara dahaabu ea dabita sisna lagheanga sisina lapiya bea gheeda ASEETA, ghayi geandeawa Nebukadinesa jeeda gheeda sibata ASEETA mida Yerusalemu ak ghwaat ea ghoahiita Babeli, gajeataw ak geatealda jeeda gheeda sibata ASEETA mida Yerusalemu, nea gaba nih siyiin headaanyi; ak giyiini jeeda gheeda ASEETA.”

Dariyo gwarukuta anung' gawa gadiyeeda mwadi

⁶ “Asi ghamneawa, Datenayi, sugoocheanda haw bea daroori mida Giigheawda Eenda, ea Shetar-bosenayi ea fugeagwa was sugoodiga mida daroori bea Giigheawda Eendean, ooheeleewana geat;

⁷ anung'waada gadiyeeni bea gheeda ASEETEAN adoateali; anung'waada sugoocheanda fuga Yahudi ea gweargwa fuga Yahudi ghwadeas gheawi bea ASEETEAN aba hoorgeadaanyi.

⁸ Ak ea neagoonyi diigheanda aba gichea ahinda gwearsu bea fuga Yahudi aba deesteaba gheawi bea ASEETEAN; lapiyeeda deekshooda bea fiisu eatayda nea adaghoashoanya nea gaygwaleabu gheeda sugoocheanda mida ng'eanyiida Gayeewda Eenda.

⁹ Nea gida wasean sigasa was jiirgwa manang'i ghana lagweendiga ghana gisilleanda jea ghoah haleanjeeda ghadooweeda sighwarda bea ASEETA humng'eeda, was ngaano, ea balang'da, ea difaayi, ghana nagheeda, gawuurji gichea ghwanyaashta ashoohoodiga mida Yerusalemu, ak gajeatawa haleanjeeni galeagasean adaghwashiy,

¹⁰ ak gajeataw ASEETA humng'eeda haleanjeeda was lukghumeeda ng'andit, nea geamwaash ASEETA aba badayda eaweega sugoocheanda ea orjoagaaschi.

¹¹ Ak ea neasinyi diigheanda, gideaba siida wassean jea ghwayam diigheanji abeeda gajeegeanda darearjeandeaba gheanyi ak geaghasa niny uhuudida nea gheanyi geanung' ghoah raghwata.

¹² Ak ASEETA nung' goobiida gheawungaaschi hooweaniin, gagasa ghwalas uhuuda sugoodiga sean, ea fuga sean jea ghoahaakta geatinga nyaawa ak ghwayam ng'asheanji nea ghwadatas gheawi bea ASEETA mida Yerusalemuun. Aniini Dariyo gil siida rugu diigheanji; ak gajeesin aba uurda.”

Giitinda gheeda ASEETA

¹³ Nea aba ng'asheanda rukuta Dariyoheeda was sugoocheanda, gwasin Datenayi was sugoocheanda ng'eanyiida Giigheawda Eenda, ea Shetar-bosenayi, ea fugaaschi duupchi gwasin sean ng'asheanji aba uurda gawuurji gidarukuteayda Dariyoheeda was sugoocheanda.

¹⁴ Ak gwadeekshi gweargwa Israeli nea ghamwas gadiyeeda aba gidaramoorasiinda Hagayeeda was sibaneeda aba rukwiideayda ng'asheega, ea Sakariya orjeeda Ido. Ak geadeas ea eahiit aba gidarukuteayda ASEETA fuga Israeli ea diigheanda Goreshi, ea Dariyo, ea Artashasta was sugoocheanda Ajemi;

¹⁵ Iimuchu ghwahit sinoodeaba gheedida eaweedeaba samwagu bea sheeda siguura Adari, aba gweaydeaba lah bea sugoocheanduumeeda Dariyo.

¹⁶ Ak fuga Israeli, ea ashoohoodiga ea fuga Lawi, ea fuga biikna giibaleakta, hean gwasin ghweelmeeda giitindeaba gheawi bea ASEETEAN nea gahoosan.

¹⁷ Aba giitindeaba gheedida bea ASEETEAN hean geatayda haleanjeeda sighadoawanda, jiiru bughala, lagweendi bughalaji iyeenya, dayeega gisilga bughalaji ang'wan, nea aba badayda riing'eeda fuga Israeli sean geatayda ghwaray damaniyeenya, aba giteena mooneeda fuga Israeli.

¹⁸ Ak geayiin ashoohoodiga jeeda gadiyeeda nyaawa nea fuga Lawi geenung' gwalageanyi aba gadiyeeda ASEETA mida Yerusalemu, gawuurji gidaghayi sing'waarda aba jeeda gitaabooda Musa.

Basaaka

¹⁹ Hean eaweedeaba damanang'wan bea sheeda madeeda gwasin fuga leabu giibaleakta Basaaka.

²⁰ Aba gideaba ashoohoodiga ea fuga Lawi abeeda saawa niimmiidu geat; ak ea nimiyaasiit sean. Hean geenuus dayeenda gisilleanda aba badayda fuga sean biikna giibaleakta, ea aba badayda fuga aat geeshta ashoohoodiga ea aba badahuuka nyaawa;

²¹ ak ghwaat fuga Israeli ghayi biikna giibaleakta, ea siida wassean ghasa geaw saawa ak ghwasaja geaw ng'asheega munyas bea fuga jeeda ng'eanyiida ak ghabwat NG'UTAMIIDA, was ASEETA Israeli.

²² Ak geesin ghweelmeeda mukaateeyda meamwatawiida eawooji ispwa nea geehoosan; aba gideaba NG'UTAMIIDA niihoosan saawa, ak ghwayamwa guroorooda sugoocheanda Ashuru aba heanyaawa, ak ghwanung' ghwanyas saawa uurda aba gadiyeeda gheeda ASEETA, was ASEETA Israeli.