ESRA 5 - Bibliyeeda Ghaydit

¹ Nea abeeda sibanga geaba Hagayi gil ea Sakariya was orjeeda Ido, gwaramoorsa fuga Yahudi mida Yuda ea Yerusalemu, aba gheawunga ASEETA Israeli haweewa saawa.

² Hean ghang'eat Serubabeli was orjeeda Shealtieli ea Yoshuwa orjeeda Yosadaki ak ghoang'eat ghuuta deesta gheeda ASEETA mida Yerusalemu; nea saawa ghaweat sibanga ASEETA.

³ Ak aba damandida Datenayi was sugoocheanda haw bea daroar nuut mida Giigheawda Basooda ea Shetar-bosenayi ea fuga nyaawa, gaweesa ak goobalool saawa nea gwayeesha, “Gagooneegwa ng'eaha diigheanda, gideaba gajadeasa gheawi ea eahiida ghamarda?”

⁴ Ak geanyaash saawa aba gideaba “Fiisu deekshiin geabeang'a gil?”

⁵ Nea ASEETA gwanda badayda gweargwa Israeli, ak ea mwanung' ghamiinaada saawa ea gawa iita heeda Diriya ak gichea gabiikteayda iita gajeanyasa jeeda barawajeanda.

⁶ Nih barawajeanda siyeasa Datenayi gil was sugoocheanda haw bea daroor nuut mida Giigheawda Eenda ea Shetar-bosenayi ea fugaaschi was sugoodiga hees mida darooraka Giigheawda Eenda ak geecheaksa Dariyoheeda was sugoocheanda;

⁷ geeyeassa niny barawajeanda, nea ng'asheega sing'oorsa jeeda ea suh gil: “Heeda Dariyo was sugoocheanda gagasa nyasa hoyyooyda sean.

⁸ Gagasa ghwanal sugoocheanda gideaba siweay darooraka Yuda, ak geahiti gheeda ASEETA haw. Sideasa lagheanga hees, nea siyiin geediga jeeda ghamarda; ak gadiyeani gawa aba uurda nea gamajeegiit aba geatinga nyaawa.

⁹ Hean geanyaashchi gweargiga ak geepalooli saawa nea geeyeeshi, ‘Gagooneegwa ng'eaha diigheanda gideaba gajadeasa gheawi ea goosha ghamardaanyi?’

¹⁰ Ak geanyaashchi eara saawa gheawunga nyaawa aba gideaba gajeegooneey iita, ak geang'waarji gheawunga fuga nyaawa hees.

¹¹ Ak geasha nea geeyeeshiineasa: ‘Aseasa geewooschi fuga gadiyeeda ASEETA humng'eeda ea ng'eanyiida, ak geadeaschi gheeda ghayi sideas garayi ning'ata gweanyeeka saang'a ghayi deas sugoocheanda haw bea Israeli ak ghoahiit.

¹² Aba gideaba ghweanigaasa ghoanyareas ASEETA humng'eeda, ak ghwayiin saawa geatinga Nebukadinesa was sugoocheanda Babeli, bea eemeeda Galdayo ghayi las uhuudeaba gheawi ak ghwaat buuneeda ea ghwahita Babeli.

¹³ Nea aba gweayda madeeda bea sugoocheanduumeeda Goreshi was sugoocheanda Babeli hean ghoadayda sugoocheanda was Goreshi diigheanda ak ghwanung' adeasa gheawi bea ASEETEAN.

¹⁴ Nea dahaabu ea lapiya ea dabita gheeda ASEETA, ghayi geandeawa Nebukadinesa jeeda gheeda sibata ASEETA mida Yerusalemu, ghwayiin jeeda gheeda sibata ASEETA mida Babeli dabidi gageanu Goreshi was sugoocheanda aba jeeda gheeda sibata ASEETA mida Babeli, ak ghoadaw siisi siguura Sheshbasa nung' ghoah sugoocheanda haw;

¹⁵ ak gwayeesha niny, “Geanda dabidi, ak guwi ak giyiini jeeda gheeda sibata ASEETA mida Yerusalemu, ak gideeksi gheeda ASEETA hoorgeadaanyi.”

¹⁶ Hean ghwahidu Sheshbasa ghwadeas sindeeta gheeda ASEETA mida Yerusalemu; ak gidang'eada damandida ea ghoah ghamneawa ea gudeadeas miighwahit.’

¹⁷ Asi iimiy aba heeda sugoocheanda, nung' eegasa aba heeda siitiiwiisa haleanjeeda aba Babeli, eadaah ea huumwa gil gideaba Goresheeda was sugoocheanda ghayi ghoadayda diigheanda eadeas gheeda ASEETA aba Yerusalemu, ak gweaneasa sugoocheanda iidi aba gidagasiida aba badaydeaba ng'asheanji.”