ESRA 4 - Bibliyeeda Ghaydit

Fuga heawa gideaba gajeebiikta eadeas gheeda sibata ASEETA

¹ Iidu nea ghwayiiy weajoodiga Yuda ea Benjamini gideaba fugiga biikna giibaleaktean ghwadeas gheeda sibata ASEETA bea NG'UTAMIIDA, was ASEETA fuga Israeli,

² hean geeweesa Serubabeli ea fuga hees bea dooshinga nyaawa ak geeyeesha saawa, “Eadeasa aseasa ea agooga; aba gideaba gajeabwada ASEETEANG'WA gawuurji gidoosindi, ak gajeataw niny lukghumeeda ghang'eada damanda ghayi bea Esar-hadoni was sugoocheanda Ashuru ghayi eaneasa hiji.”

³ Ghwalamda Serubabeli, ea Yoshuwa ea fuga hees bea gweargwa gealga Israeli ak gwayeesha saawa, “Manda gichea aweadaneasa aba deesta gheeda ASEETEANYA; gajeedeeksiina aseasa NG'UTAMIIDA, was ASEETA Israeli nea geabea geat, gawuurji gidaghayi rukusiindaneasa Goreshi sugoocheanda Ajemi.”

⁴ Hean ghwanung' fuga bea ng'eanyiida gabur iheenga fuga Yuda, ak ghang'ut saawa muuwda ak ghoawal deekshooda,

⁵ ak geegasa gweargwa girgweageeda gaweay badahuuka nyaawa ak ghang'uda muuwda ea masina gidagasa, aba eawoojiga sean bea Goreshi was sugoocheanda Ajemi, ea ghwahita damanda sugoocheanduumeeda Dariyo was sugoocheanda Ajemi.

Fuga heawa eebiiksa deesta mujiineeda Yerusalemu

⁶ Nea aba damanda sugoocheanduumeeda Ahasuero, aba giing'eeta sugoocheanduumeadaanyi, hean geang'waar gida siihaaktaawa fuga Yuda ea Yerusalemu.

⁷ Eara damanda Artashasta, ea Bishlamu ea Mitredati ea Dabeli sea fuga duupchi gang'oorsa Artashastaheeda was sugoocheanda Ajemi; barawajeanda geang'waara iita fuga Aramu ak geeroapta

⁸ nea Rehumu was shirikarajeanda haw ea Shimshai was ng'oorshoocheanda hean geang'waar barawajeanda aba badayda Yerusalemu weesa sugoocheanda siguura Artashasta nea geang'waardunu,

⁹ barawajeanji gwaleabu heeda Rehumu was shirikarajeanda haw, ea Shimshai was ng'oorshoocheanda, sea fuga mwaatkwa duupchi, ea fuga aheeldooschi buuneeda, ea sugoodiga hees, ea fuga ahaaghwa ng'eanyiida, ea fuga Ajemi, ea fuga Ereki, ea fuga Babeli, ea fuga Susa, was fuga Elami,

¹⁰ ea fuga mwaatkwa bea eemoojiga, ghayi hoonu Osnapareeda haw siiwal gheang'da ak ghwanung' goobiida mujiineeda Samariya ea ng'eanyoojiga suuk bea giigheawda eenda, ak ghamneawa

¹¹ nih gissing'oarda barawajeanda siicheakta gil, “Heeda Artashasta was sugoocheanda. Geewooschi fugaagu bea gadiyeeda, fuga darooraka mida dirbeayda Eenda Furati, gagu seayooda.

¹² Ak ghamneawa gagasa ghwanal sugoocheanda gideaba fuga Israeli ghayi siyeeng'na headaang'u niweay Yerusalemu. Ak ghamneawa ghwadeas mujiineedida ghayi heawaneasa muyiin, ak ea niihiit ghamarda nea gwasisin sindeeta.

¹³ Ak ghamneawa gagasa ghwanal sugoocheanda gideaba mujiineani inyas geadeas ea eahiit ghamardaanyi, abeeda ea mwajeatayda gwaadi, ghana gujaweeda, ak abeeda aba huuydeanda sugoodiga gayghwaak lugooda.

¹⁴ Aba gideaba ghamneawa aseasa geegadiyeesa sugoocheanda, ak ea mwahida aba aseasa gideaba geeng'ulayi sugoocheanda nea geefool, ak ea siicheakti buuneeda gwarukusa sugoocheanda,

¹⁵ ak abeeda geasaach eegasa aba jeeda gitaabooda ghayi bea ghweanigeagwa. Gaygasa aba jeeda gitaabooda ghayi sing'oorsa ak gaynala gideaba mujiineani mujiineeda muy gil, inyeessa ghabwar sugoodiga ea fuga hees, nea fugaaschi inyeesa ghang'ut foolayda ghang'eada garayi. Ak ghoah gida silasa uhuudeaba mujiineani.

¹⁶ Ak geegasayi ghwanal sugoocheanda gideaba inyas geadeas mujiineani ea eahiit ghamarda, abeeda ea maymideawana ng'eanyiida aba Gayeewda Eenda.”

¹⁷ Ghwasha sugoocheanda nea gwayeesha: “Heeda Rehumu was shirikarajeanda haw ea Shimshai was ng'oorshoocheanda heeda was sean bea giigheawda Eenda, seayu?

¹⁸ Barawajeandida oocheagu heedeanyuun siisoomwa aba madeedeanyu. Ak ea naayiinyi,

¹⁹ ak ea nearukusi buuneeda gideaba eegasa iita, ak ea sinyas iita gideaba mujiineani ghayi ning'ut foolayda aba badayda sugoodiga ak ea nisin ng'asheega munyas bea foolayda aba jeeni.

²⁰ Abeeda gwanda sugoodiga hees Yerusalemu, ghayi ambal ng'eanyiisean mida dirbeayda Eenda Furati ak geataw gwaadi ea gujaweeda.

²¹ Asi arukusiina fiisu gideaba naarachi diigheanda ghwanung'waada deesteaba mujiineani, ea eeyi bwak ea dargu aniini.

²² Ashageada adoong'arng'ariidayi aba badaydeaba ng'asheanji; ghwasaan anda gaygwaheedu sawanadeeda nea sugoodiga ghwaak lugooda?”

²³ Hean nea geasoamwa barawajeanda sugoocheanda was Artashasta aba madeeda Rehumu ea Shimshai was ng'oorshoocheanda ea fuga suurja hean gaweay Yerusalemu heeda fuga Yahudi nea ghwalamwajaada, ak geediing'sa aba uurda ea madeekshi.

Geang'eat deekshooda gheeda sibata ASEETA gicha

²⁴ Hean ghamiinaada gadiyeeda deekshooda gheeda ASEETA aba Yerusalemu; ea ghwahita gweaydeaba iyeenya bea sugoocheanduumeeda Dariyo was sugoocheanda Ajemi.