ESRA 3 - Bibliyeeda Ghaydit

Geebiikta eang'eat badita ASEETA

¹ Iidu nea ghwahita sheedeaba ispwa, nea abeeda gwanda orjooga Israeli jeeda mujiinajeega, hean ghabwat geat buuneeda ea gawuurji siyagi aba Yerusalemu.

² Hean ghang'eat Yoshuwa was orjeeda Yosadaki, sea bareandaanyi was ashoohoodiga ea Serubabeli orjeeda Shealtieli sea orjooga ghaamwat, ak ghwadeas heeda wagiida bea ASEETA Israeli, was heeda haleanjeeda ghadooweeda sighwarda, gawuurji gida ghayi sing'waarda aba jeeda deaweedeeda Musa was siida ASEETA

³ Ak geesissa heeda wagiida sindeetaanyi aba gideaba ning'ut muuwda aba badayda fuga mida ng'eanyiida, ak geataw NG'UTAMIIDA haleanjeeda ghadooweeda sighwarda, aba heeda wagiida, sighwarda sakteayda ea shing'ada.

⁴ Ak geang'waay ghweelmeeda sisna udahabeaschajeega, gawuurji gissing'oarda, nea geetayiida haleanjeeda ghadooweeda sighwarda galeagasean nea geanung' gabadiina agi aba gidanyaashta deaweeda, aba gidamiisa giliwas askwearja,

⁵ ak iidu haleanjeeda siitayiida bea ghadooweeda sighwarda, was haleanjeeda ghadooweeda bea ng'ushiinda sheeda ea gea ghweelmoojiga sean ghayi sirugu bea NG'UTAMIIDA, ea haleanjeeda ghadooweeda siitaydaawa jeedeesh bea NG'UTAMIIDA.

⁶ Ghang'eada eaweeda madeeda bea sheedeaba ispwa geang'eat ghuuta giidaydeayda haleanjeeda sisabwa geadi bea ghadooweeda sighwarda bea NG'UTAMIIDA. Nea sindeeta gheeda sibata ASEETA bea NG'UTAMIIDA abeeda ea miyeedeas.

Geebiikta eang'eat deesta gheeda sibata ASEETA

⁷ Hean geataw lapiya fuga deekshachi ea gea sina beehajeega ak geataw ea nagheeda, ak geataw fuga Sidoni ea Diro gweadu geediga was gubooyeeka aba Lebanoni nea gwasku naweeda basooda, ea ghapka Yopa aba gideasiksiinda Goreshi was sugoocheanda Ajemi.

⁸ Gweaydeaba iyeenya bea hiteayda gheeda ASEETA mida Yerusalemu, aba sheedeaba iyeenya, abeeda Serubabeli was orjeeda Shealtieli ea Yoshuwa orjeeda Yosadaki ea buweadeega nyaawa suurja sea ashoohoodiga ea fuga Lawi ea fuga sean leabu soomjeandumeeda, ghwahita Yerusalemu ak ghoang'eat eara saawa ghwayiin fuga Lawi bea gweanyeew diktam ea ghwanaawda gamineadaysa gadiyeeda gheeda NG'UTAMIIDA.

⁹ Hean ghamiinaada Yoshuwa sea orjoagaaschi ea buweadeagaaschi ea Gadimieli ea orjoagaaschi ea orjooga Yuda, ak gamineadaysa fuga sin gadiyeeda gheeda ASEETA, sea orjooga Henadadi ea fuga Lawi, ea orjooga nyaawa ea buweadeega nyaawa.

¹⁰ Iidu nea ghwadeas gearnoodiga sindeeta gheeda sibata ASEETA bea NG'UTAMIIDA, hean ghapka ashoohoodiga nea niishuup hang'weaka nyaawa nea ghaghuut durumbeatajeega nea fuga Lawi, ea orjooga Asafu, abeeda gwandeawa haleanjeeda sibara, iisiduumsheesa NG'UTAMIIDA, ghabeada gida ghayi rukusiinda Dawdi was sugoocheanda Israeli;

¹¹ ak geesarman nea geamwas nea geebadiischeesa NG'UTAMIIDA, “Aba gideaba niny aamiy, ak bariinyeagaaschi aba badayda Israeli ea manda muudeanooda.” Ak goojuur buuneesean aba nyeashta haw nea geeduumsheesa NG'UTAMIIDA, aba gideaba sindeeta gheeda NG'UTAMIIDA sideas.

¹² Nea ashoohoodiga saang'a ea fuga Lawi ea fuga hees bea dooshinga nyaawa ea gweargwa ghayi daah gheeda ghayi bea madeeda gooyeawda aba nyeashta haw iidaah sindeeteaba gheawi nea geesin, ak goojuur fuga saang'a aba hooseaneega,

¹³ ak ea mooheeli buuneeda nyeashta hooseaneega ea gea fuga ayeawda, aba gideaba buuneeda goojuur aba nyeashta haw, ak geayiiy ghuuta buuneeda nea sheagi.