ESRA 1 - Bibliyeeda Ghaydit

Goreshi gwasiksa fuga Yahudi

¹ Gweayda madeeda bea sugoocheanduumeeda Goreshi was sugoocheanda ng'eanyiida Ajemi, abeeda gwasa, ng'asheanda NG'UTAMIIDA ghayi rukuna ghuuta Yeremiya, hean ghwasat NG'UTAMIIDA guroorooda Goreshi was sugoocheanda Bersiya, ak gwarukuta iita aba ng'eanyiidaanyi sean ambal ak eara ada ghang'oar.

² “Gwayi Goreshi was sugoocheanda Bersiya. Nigoonan NG'UTAMIIDA was ASEETA humng'eeda, sugoocheanduumeeda sean bea ng'eanyiida, ak ea nirukunean dadeeksa niny gheeda aba Yerusalemu mida ng'eanyiida Yuda.

³ Ak gilinyoo ea sih gil mida jeedeang'wa oowooschi sean fugaaschi, gagasa goobiida ASEATAANYI headaanyi, ak ea dascheang'da ea gawa Yerusalemu, mida ng'eanyiida Yuda, ak gabiikta ghwadeas gheeda NG'UTAMIIDA was ASEETA Israeli niny ASEETA mida Yerusalemu gil,

⁴ ak siida was sean ghuh aba heeda wassean abiita ii rabascheanda gil abeeda gayghaweat fuga ng'eanyiidaanyi mideawa aba lapiya ea dahaabu, ea haleanjeeda ea dugwa, nea mearara haleanjeeda sisabwa geadi siitaydaawa jeedeesh bea gheeda ASEETA mida Yerusalemu.”

⁵ Hean ghang'eat ng'eat fuga ambaliischi bea gweargwa gealga Yuda ea Benjamini, ea ashoohoodiga ea fuga Lawi, ea gilinyoo ea nisat gurooroadaanyi ASEETA ghang'eat gawa gwadeeksa NG'UTAMIIDA gheeda aba Yerusalemu,

⁶ ak eara fuga sean mida murdeenyaawa ghwanung' ghwanyas uurda geatinga nyaawa aba haleanjeeda lapiya, sea dahaabu ea haleanjeeda, ea dugwa, ea haleanjeeda hees sheayeat, ea haleanjeeda sisabwa geadi siitaydaawa jeedeesh.

⁷ Hean gageanda Goresheeda was sugoocheanda dabita gheeda NG'UTAMIIDA ghayi eana Nebukadinesa Yerusalemu ak ghwayiin jeeda gheeda aseecheekaaschi.

⁸ Nea dabitida ea gea geanda Goreshi gil was sugoocheanda Mitredati was siida adiwshachi ak gwayiida aba madeeda Sheshbasa was siida haw bea Yuda.

⁹ Nea suh ea mooneeda nyaawa gil: haragweak sagalama bea dahaabu, haragweak sagalama bea lapiya, bargweak diktam ea shageash,

¹⁰ gweeraji diktam ea damanamughuush bea dahaabu, ea gweeraji sagalamnyooji iyeenya ea bughalaji ang'wan ea damanamughuush bea lapiya, ea haleanji suuk sagalama;

¹¹ dabita sean bea dahaabu ea lapiya mooneeda nyaawa ea sagalamnyooji muut ea bughalaji ang'wan ea laadam ea shageash. Dabidi seaniin ghwaat Sheshbasa ghoascheang'da damanda siyeana fuga mang'aweanda Babeli ea ghwahita Yerusalemu.