ESEKIELI 4 - Bibliyeeda Ghaydit

Mujiineeda Yerusalemu gajeeneaweesa

¹ “Ea orjeeda siida, geani mwatafwaari ak giyiini madeadaang'u, ak ging'oorsi badaydaanyi giduurji mujiineeda Yerusalemu.

² Ak giihiimdi gideaba sineaweesa, ak gideasi gheeda majeek ak gineaweesi hilgweanda, nea ginung' gwaneaweesa gealga shirikara ea mulgweega jea eenyarjeawi.

³ Ng'ata gigeanu bileangida was gharinyeanda ak gimiindi gawuurji ghamarda gharinyeanda aba dageascheadaanyi sea dea mujiini. Ak gifursi geaw mujiineani sineaweesean, sina giirooraneeda ahiimu gideaba geeneaweesa. Ak nih gayghoah gwadeagooda aba eemeeda fuga Israeli.

⁴ “Ak gibiikti una ruweanga, nea gibwadi meatkweeda geatinga ghaadaam. Ak gaysareana ghoorjooda fuga Israeli, aba giteena eawoojiga jea lilana hoowa nea aba seareani gaysareana ghoorjooda nyaawa.

⁵ Neagoonyeey gweanyeew bughalaji samwagu ea seedam ea damanamughuush. Damanda deenyi sea gweanyeeka ghoorjooda nyaawa, eaweecheanjagi gawuurji gwanyagi. Gaysareana ghoorjooda nyaawa.

⁶ Amang'ata eawoojisu abeeda gaylila deabiyeenya nea gibwadi meatkweeda geatinda dugwa, ak gaysareana ghoorjooda fuga Yuda, eawooji haradam geagoonyeeyi eaweecheanjagi aba gilakweayi.

⁷ Ak gifursi geaw mujiineeda Yerusalemu abeeda sineaweesa, ak gimiindi geatindaang'u ghajaam amang'ata giramoorsi.

⁸ Nea gaydarateey aba ghealooda, ea miyamigeaw gala murdeeni ghana murdeeni bwak ea goosha neaweesiinda mujiineeda Yerusalemu.

⁹ “Ak gigeanu ngaano, ea nganooyda siguura shayiiri, ea loosiida ea sagharooda, ea bukushiida ea meangure, ak giyiini sean jeeda dabicheanjagi amang'ata gisini mukaate aba haleanjeeni, aba mooneeda jea lilana hoowa aba meatkweenagi nea abeeda gajaga eawooji bughalaji samwagu ea seedam ea damanamughuush.

¹⁰ Nea hamitaang'u jea aga gajeeteena shekeelaji diktam aba jeemba eaweecheanjagi. Hean gajaga nibwagi aba eaweecheanjagi

¹¹ Ak gayleaha beega siiteena bayookcheew iyeenya aba jeemba eaweecheanjagi.

¹² Gayghwarana beasta fiyeega siida, ak gajawaala mukaate, ak giyaagi aba madeeda buuneeda.”

¹³ Ak gwayi NG'UTAMIIDA, “Nih gichea ghwaakta fuga Israeli hamita nyaawa gil, nea gajea sing'uda ririnnyeanda aba bugusta eemeeda jea dahoan saawa.”

¹⁴ Hean geayeenyi, “NG'UTAMIIDA was ASEETA! Ng'ula, gurooroodeanyu miyeeng'uda ririnnyeanda. Aba gideaba ghang'eada gheareemaneanduumeedeanyu ea ghoah ghamneawa miidaak gidameah, ghana gidabwar diyeayda jarooda, ghana banyeega mideawa ririnnyeanda miigawa jeeda ghuuteanyu.”

¹⁵ Hean gwayeeshiinean, “Asi, naamwaschi ghwarana beasta fiyyeega dugwa mii fiyeega siida gil ak gajawaalana hamitaang'u.”

¹⁶ Ak gwayeeshiinean gicha, “Ea orjeeda siida, ng'ula, gaydalas uhuuda gidaghus fuga Yerusalemu was hamita, ak saawa gayghwaak mukaateeyda siiteen, nea geaghamwat muuchi. Ak saawa gayghwali beega siiteen nea geahamng'eanyi.

¹⁷ Gaydasin ng'asheanji aba gideaba ea mwanyasa hamita ea beega, ak gaygaba nih ng'ula niirja nea gwahirbaban, ak gaygoosha uurjeenga nyaawa aba lasooda nyaawa bea uhuuda.”