ESEKIELI 3 - Bibliyeeda Ghaydit

¹ Ak gwayeeshiinean, “Ea orjeeda siida, aga gida sigoonyi, aga gitaabwajeanji ama ng'ata guwi abaloola fuga Israeli.”

² Hean ghaajaachi ghuuteanyu, ak gagoonan daak gitaaboadida.

³ Ak gwayeeshiinean, “Ea orjeeda siida, aga gitaabwajeanji eagoonyiin anyiida jeadaang'u.” Hean ghaayaaji gitaaboadida ak aba ghuuta aainnya ea gwasamu maleeda.

⁴ Hean gwayeeshiinean, “Ea orjeeda siida, asi weesiina fuga Israeli ak girukusi ng'asheegeasu.

⁵ Aba gideaba ang'iing'i meecheakseey heeda fuga baloola ng'asheega bunu, ghana iita miyiinyi ang'iing'i geecheakseey heeda fuga Israeli–

⁶ Mii fuga saang'a baloola ng'asheega bunu gil ea iita miyiinyi maynala ng'asheega nyaawa, inyeeda gwachi geajeaktaneey heedeaba fiisu, abeeda gwachi gaygooleeyseey iit.

⁷ Nea fuga Israeli ea maygooleeyseey iit, aba gideaba magasa gooleeysean iit, aba gideaba fuga Israeli sean ea hang'oonyi iheeni ak ea hang'oonyi gurooruunat.

⁸ Ng'ula naanung' hang'waanyiida aba heanyaawa, nea eara uhuudaang'u gayghoahang'waanyiit aba iheenga nyaawa hang'oonyi.

⁹ Gidahang'waayda dahaabu ea ghang'al lagheaneeda hang'waay, ea gidanung' ghahang'waanyiita uhuudaang'u gil. Asi adiiwali nea adagoomuuwnyi gheanyanga nyaawa, aba gideaba fiisu fuga heawanaan gil.”

¹⁰ Ak gwayeeshiinean gicha, “Ea orjeeda siida, ng'asheesu jea darukuneey seaniin iina jeeda gurooroadaang'u nea giileeysiit aba iidigaagu.

¹¹ Asi una weesiina fugiga ghayi siipaleagiin, heeda fugaagu ak giyeeshi saawa, ‘Gwayi NG'UTAMIIDA was ASEETA,’ iijeagwayiing'shi ghana ea maygwayiing'shi.”

¹² Ng'ata gagatgadan Guroorooda googealan humng'eeda, hean nea gwascheeng'u giigheambiita NG'UTAMIIDA aba heeda abiita, ghaayiinyi nyeashta uurji dea sawooda ng'eanyiida aba badaydeanyu;

¹³ Nea nyeashta meang'eegeaba diyeangiga mideawa eaweegean, abeeda ghwasat geat sea ghuutida bea geeshangiga bea mutukwajeega mida murdeeda nyaawaan, nea gawuurji nyeashta giighweendandeeda.

¹⁴ Hean gagatgadan guroorooda googealan humng'eeda, ak ghwaadan ea goosheagiidan. Ak geawi nea geasawani nea geabea nyarasta ng'waan aba jeedeanyu. Abeeda geatinda NG'UTAMIIDA gwandeawa uurda aba heedeanyu.

¹⁵ Ng'ata ghaahiti heeda fuga ghayi siipaleagiin, mida ng'eanyiida Del-abibu bea murdeeda eenda Gebari, ama aahiti hoowa midean, hean geandeayeesi saawa hoowa eawooji ispwa nea ghahamwan ng'eanyi muuchi.

Esekieli geeguursa ghoah furiischoocheanda

¹⁶ Iing'ata eawooji ispwa ghwahidu heedeanyu ng'asheanda NG'UTAMIIDA ak gwayi,

¹⁷ “Ea orjeeda siida, naanung' huwa furiischoocheanda fuga Israeli. Asi iinya ng'asheanji leabu ghuuteanyuuni ak guwi miina gheang'deaba fiisu aba iita leabu heedeanyu.

¹⁸ Iyeayeeshi siida muy seara, gideaba ‘aba huumwa gaymeawa,’ ak ea mimiini gheang'da nea miibalooli siisi muy searean miina gheang'da ghwanung'waada naweadaanyi muy ak ghoaghu gurooroadaanyi, abeeda iimea siidida muy searean nea gudugwanda jeeda ng'asheagaaschi munyas, abeeda foojeandaanyi gaydang'alnyi.

¹⁹ Nea iimiini gheang'da siida muy seara, ak ea mwanung'waada ng'asheagaaschi munyas ghana naweadaanyi muy, abeeda gaygameewsa jeeda ng'asheagaaschi munyas, ak abeeda ang'iing'i ea niighuuhi gurooroadaang'u.

²⁰ Ak gicha siida doabiiwaat iinung'waada doobiiwnataanyi, ak gwasin ng'asheega munyas ak gearuusay siisi abeeda gayghami. Aba gideaba mii eamiin gheang'da, gayghami aba riing'eadaanyi ak sinaweagaaschi bea doobiiwnata ea mwajeapkaat. Nea foojeandaanyi gaydang'alnyi.

²¹ Nea iimiini gheang'da siida doabiiwaat gideaba siidida doabiiwaadiin adagwasin riing'eeda. Nea niny iimasina riing'eeda aba huumwa gayghwanyas giibinda aba gideaba ghamwas eamiin gheang'da abeeda gajaghuuha gurooroadaang'u.”

Esekieli ghwaroat ghuuta

²² Abeeda uurda NG'UTAMIIDA gwanda heedeanyu, ak gwayeeshiinean, “Ng'eada una ea hita heeda miy ng'eanyi, abeeda gaydeabaloolnyi aba hoowa.”

²³ Hean ghaang'eachi ak geawi ea dahita heeda miy ng'eanyi. Ng'ula, Iidu nea geandi hoowa ghaadaayi giigheambiita NG'UTAMIIDA nea ghamiinaada aba hoowa, nea gawuurji giigheambiita ghayi aadaayi aba ghuuteenda Gebari, hean ghaabeali ak ghaabwadi jih ng'eanyi.

²⁴ Ng'ata gawa jeedeanyu guroorooda, ak ghwanung' damiinaada aba geeshangiga ak goobaloolan nea gwayi, “Una gheang'u ak giibiidi gah.

²⁵ Ea orjeeda siida, ng'ula, gajeerateey aba ghealooniga ea ea mudamuusa rita una heeda buuneeda.

²⁶ Ak gaydanung' ghwadurmwaniit ng'ushaptaang'u nea gayhuuwa siida manda ghuuta, ak ea majamuusa miina gheang'da aba gideaba saawa fuga heawanaani gil.

²⁷ Nea damanda jea deabaloolaneey gaydajaat ghuutaang'u, ak gajeeshiina saawa, ‘Gwayi NG'UTAMIIDA was ASEETA,’ siida jea gwayiing'shi dayiing'shi, nea dea jea ghaheawa daheawa, aba gideaba saawa fuga heawanaan gil.”