ESEKIELI 2 - Bibliyeeda Ghaydit

ASEETA gaguursa Esekieli ghoah sibaneeda

¹ Ak gwayeeshiinean, “Orjeeda siida miinaada aba geeshangaagu, ak gaydeabaloolnyi.”

² Damanda abaloolaneaniin hean gawa jeedeanyu guroorooda ak ghwanung' damiinaada ak gealeeysiit dea abaloolan.

³ Ak gwayeeshiinean, “Orjeeda siida, gaydeajeaktaneey heeda Israeli ea heeda eemeeda ghayi heawanaan saawa ea ghweaniga nyaawa niidiiy aba badaydeanyu ea ghoah ghamneawa.

⁴ Nea fiisu ea mandeawana mureeda, ak gurooruunatka nyaawa ea mandeawana baspaseega, asi gaydeajeaktaneey heedeaba fiisu. Ak gajeeshiina ‘gwayi NG'UTAMIIDA was ASEETA.’

⁵ Inyas gwayiing'shi ghana ea mayiing'shi, aba gideaba saawa fuga heeheeweega gil. Abeeda gwadeeba gwajeeng'u gideaba gwanda bugusta nyaawa sibaneeda.

⁶ Ak ang'iing'i siida, adiiwali suh, eara ng'asheega nyaawa. Eara gwaneaweeseey ng'eamga ea halaghweenga, ghana apteadawana badayda udagilba, adiiwali ng'asheega nyaawa, nea adaghoabealnyi gheanyanga nyaawa, aba gideaba fiisu niheawanaan.

⁷ Ak gayrukusiina saawa ng'asheegeasu, iyaleeysiit ghana inyas gwayiing'shi ghanea mayiing'shi, aba gideaba saawa fuga heawanaani gil.

⁸ “Nea ang'iing'i siida, aleeysiiniit gidearukuneey, nea adiheaweatanaan fiisu, jaada ghuutaang'u ak giyaagi gideagoonyi.”

⁹ Hean nea ghaang'weardi ghaadaayi geatinda siikealnean mideawa gitaabooda sing'waar.

¹⁰ Ama ng'ata gootin aba madeedeanyu nea abeeda ea sing'oorsa mwadi ea bwadaw ng'asheega heareega, ea shooka ea shageadooda.