Efeeso 1 - Bibliyeeda Ghaydit

¹ Bawlo, Giijasoocheanda Gristo Yesu, aba gidagasiida ASEETA. Heeda Fuga ghaydidi biissa ea doobiiweadi aba jeeda Gristo Yesu.

² Gagasa gagooneegwa ASEETA dagheerjeanduumeeda ea hoyyooyda ASEETA was Ghweandeanya ea Ng'utamiida was Yesu Gristo.

Ghawooda Guroorooda aba jeeda Gristo

³ Ghawooda gaba ASEETA ea Bwaabeeda Ng'utamiideanya was Yesu Gristo, ghayi gooneasa ghawooda aba jeeda Gristo aba giliwas ghawooda guroorooda aba darooraka humng'eedean,

⁴ iidu nea ghwaloadeasa nea miyeebwat sindeeta ng'eanyiida, ak geewooschi ghaydidi nea geawooschi fuga meerukunana badahuuka ng'asheega munyas aba madeadaanyi.

⁵ Niny ghwaloadeasa aba bariinyeega eahuuwa orjoagaaschi aba naweeda Yesu Gristo, aba gidagasiida niny,

⁶ aba duumsheesiinda giigheambiita dagheerjeanduumeeda gooneasa mwadaagha aba naweeda Orjeedaanyi bwariiy.

⁷ Aba niny geendeawi ghuhooda aba foojeandaanyi, was samsiinda riing'eeda, aba giteena dagheerjeanduumeadaanyi.

⁸ Ak gagooneasa ea ghwanaawda.

⁹ Aba gideaba nideajiineasa aba weaghuumeeda sean ea makcheameeda funyaat bea gidida gasean, aba gidida bada aba badayda Gristo was gidagasa iihita damandean,

¹⁰ ak googuuyi haleanjeeda sean aba niny, haleanjeeda mida humng'eeda ea gea mida badayda ng'eanyiida.

¹¹ Aba niny, aba gidida gassiida ninyiin was dea ahiit haleanjeeda sean aba gidida gassiidean,

¹² aseaseeda ghayi sibean earara Gristo aba mwadi siitoobiiweasa ak geegeaneasa eepiidana nea geeduumsheesi giigheambiitaanyi.

¹³ Ak agooga aba jeedeaba niny noayiinyi ng'asheanda huumwa, nea giijasta miy bea lealeanoodeang'wa, ak ea noamwaschi niny, nea goorooreegwa heeleeda Guroorooda Ghaydit,

¹⁴ ak geasikteawi hearaniischoodeanya ea eeyi bwak ea eanyasa, ak geeduumsheesi giigheambiitaanyi.

Bawlo ghamwaash ASEETA

¹⁵ Aba nih deaghayi naayiinyi aniini iita masaweegeagwa aba badayda Ng'utamiida was Yesu ea gidoabwariiydi fuga ghaydidi sean,

¹⁶ ea mii danung'waada badiischeesiinda aba badahuukeagwa, inyeessa ghaapkaacheegwa iyaamwaashchi ASEETA,

¹⁷ ak abeeda ASEETA Ng'utamiideanya was Yesu Gristo, Bwaabeeda giigheambiita, gagasa gagooneegwa gurooroadaanyi bea weaghuumeeda ea dea giidaheachta jea analana niny,

¹⁸ Gheanyanga mida jeesingeagwa gagasa eayeat, ak ghoanali rarooda gidaguurdeaydaneegwa giduurji, ea meanang'oocheanduumeadaanyi ea giigheambiita hearaniischoadaanyi aba heeda fuga ghaydidi,

¹⁹ nea aba giteena hawunda uurdaanyi mwoamu eeteen aba heedeanya was fuga mideawa masaweega, aba gidagadiyeata uurdaanyi haw

²⁰ ghayi ahiit aba jeeda Gristo damanda aduuna jeeda miyeeda, ak ghwanung' goopteada aba geatindaanyi bea dugwa aba darooraka humng'eeda,

²¹ hean goombal fuga ambaliischi sean ea gheambalmeeda ea uurda ea sugoocheanduumeeda, ak ghang'ataawa gheawunga sean ghayi sing'at, ak ea mii aba seaygeeni gil eara diita jea ghwahiduun;

²² ak ghwayiin haleanjeeda sean hing'eadayda geeshangaaschi ak ghoadaw hawunda haleanjeeda sean aba badayda ganiisa,

²³ was saseadaanyi, nea hidoadaanyi gil was dea anyiit haleanjeeda sean aba jeeda haleanjeeda sean.