Ebraniya 8 - Bibliyeeda Ghaydit

Yesu ashoohoocheandeanya hawi

¹ Asi ghamneawa huumeanda sirugu nihi: geendeawi ashoohoocheanda haw uurjunu, siida apteada aba meatkweeda geatinda dugwa bea hoorgeeda sugoocheanduumeeda ASEETA was Ng'utamiida aba humng'eeda,

² niny siida gadiiy aba heeda ghaydit gil ea heeda maheemajeandida bea huumwaan ghayi masina siida gwasin Ng'utamiidean.

³ Aba gideaba giliwas ashoohoocheanda haw iissa gealoat ghoadayda haleanjeeda ea lukghumajeega; nea eara ashoohoocheanda gammiisa gideaba gaygwandeawa gichea ghoadayda.

⁴ Inyeeda gwachi gwanda badayda ng'eanyiida, ea mayghoah ashoohoocheanda earahay, nea gwanda ashoohoodiga adayiida haleanjeeda aba ginyaashta deaweeda.

⁵ Gwasin gida uurji diita was jirooneeda haleanjeeda ghaydidi mida humng'eedean; aba gideaba damanda ramagu gwasin Musa maheemajeanda, ghoadoabiiw ASEETA, nea gwayeesha, “Sikteawana gideaba gisini haleanjeeda sean gawuurji gidaghayi siihiimdaayda aba uhuuda giijeeda.”

⁶ Asi aba nih, Gristo ninyas gadiyeeda adareamshi muuchi adaraam dea waas gawuurji neajeeda gooduupchi muuchi, ak ea niiw deaweeda aba heeleesiinda huumwa.

⁷ Ama inyeeda neajeedida bea madeedean ea manda sirjeeda, gwachi ea maygwanda gassoodeaba diita bea iyeenyean.

⁸ Aba gideaba ninyas ramaseanda aba heanyaawa aba heeda eeneewa: “Gwanda askwearjoojiga jea ghwahidu gwarugu Ng'utamiida, ak gaydang'eat neajeedeesh sea gheeh Israeli ea gheeh Yuda;

⁹ ak ea mawuurji neajeeda ghayi iteanyu sea ghweaniga nyaawa aba eaweeda ghayi ang'waanyi saawa geatinda ak gearuuteawi jeeda ng'eanyiida Misri; aba gideaba mudu goobiida jeeda neajeedeanyu, ak ea mudu daduuba saawa aba ginyah Ng'utamiida.

¹⁰ Nih neajeeda jea dasisa gheeh Israeli iing'ata askwearjoojigiga, aba ginyah Ng'utamiida: Gaydayiin deaweedajeegeasu iheenga nyaawa, ak ghaang'waarji aba jeesinga gurooruunatka nyaawa, ak gaydoaw ASEETA nyaawa, ak gayghoah fugeasu.

¹¹ Ea manda siida jea ghoanaal dea mideawa ghana giliwas sih ea orjeeda ghaamwat, nea gwayeesha, ‘Nala Ng'utamiida,’ aba gideaba gayghwanalan sean, ghang'eada dea mwanang'eawa saawa ea gagul dea haweewa sean.

¹² Aba gideaba gaydawoos ng'eeni aba giidiinyeanyeeka nyaawa, ak ea maydaapkaat riing'eega nyaawa earahay.”

¹³ Aba rukunooda neajeedeesh ea ninung' ghawaasiit dea madeeda. Nea dea niwaasiit ea niriikghta gamuudean.