Ebraniya 6 - Bibliyeeda Ghaydit

¹ Asi aseasa eeweaya mwadi eanung'waada ng'asheegiga ghayi bea garayi bea giinealshooda Gristohiin nea geehitiisi heeda, ak ea adagudeesinyi sindeeta duukuunooda aba gadiyoojiga nimeewa ak geendeawi masaweega aba heeda ASEETA,

² aba iita giimiinnooda, ea iita iinda geatinga iheenga buuneeda, iita duunooda miyeeda, ea girgweageeda maygamuudean.

³ Nea ng'asheesu gajeesna iimwas ASEETA.

⁴ Ak ahang'waay gideaba gaynung' gwaduukuuna fugiga ghayi nidaah weeshinda amwadiin, fuga ghayi siitaw giimearda Guroorooda Ghaydit,

⁵ ak ea nisamu alooheeda ng'asheanda ASEETA ea dea uurda gweanyeeka jea ghwahidu,

⁶ amadu ghwayam geaw nea nitambiilan, nea abeeda ea niingoor Orjeeda ASEETA aba gidagasiida saawa ak goong'ooysa humng'eeda aba foolda.

⁷ Aba gideaba ng'eanyiida roobassa roopta galeagasean, ak gooruudu nyeega miisa fuga ghayi barsean, ak ghwanyas ghawooda aba heeda ASEETA.

⁸ Ama jih halaghweenga ea ng'oobeeshta, ea marachi gil ea ghwariikghta eamwaashta; nea mudeanoadaanyi ea ghwardeayda.

⁹ Asi earapeadi sibalooldunuun, aba badahuukeagwa, fuga aabwariinyi, geanali muuchi ng'asheega miyaasiin bea lealeanooda.

¹⁰ Aba gideaba ASEETA mandeawana ghwanooda ea ghoanaawa ghaang' gadiyoojigeagwa ea bariinyeega ghayi oahiimu aba badaydaanyi aba gadiyeesiinda fuga ghaydidi, duu asina eara ghamneawa.

¹¹ Ak geegasayi giliwas sih aba jeedeang'wa dahiimna doobiiwnata uurji diita ak ghwanal huumeanda ea gida rar ea ghwahita huuydeanda,

¹² ak abeeda ea mwang'udeagwa ghaleehooda, ak goowooschi fuga jea goomaseaw geat fugiga aba naweeda masaweega ea milikghteayda ak goohearanyi gidaghayi siheeleesa.

Heeleesiinda huumwa bea ASEETA

¹³ Aba gideaba damanda sina ASEETA heeleesiinda sea Abrahamu, nea abeeda ea manda siida haw jea gweaksa habeawooda, gweaksa geaw habeawooda,

¹⁴ nea gwayi, “Aba huumwa gaydagoonyi ghawooda ak ghaahaacheey.”

¹⁵ Gwasunu eara Abrahamu, aba riyeeng'deayda, ghwanyas heeleesiinda.

¹⁶ Buuneeda aba huumwa iissa gweaksa habeawooda siida haweewa saawa, nea aba muudeanooda sheang'nyeadinga nyaawa sean agita habeawooda ea muudeanooda baloolda.

¹⁷ Hean nea gagasa ASEETA muuchi goohiimsa fuga jea gwahearan heeleesiindida ea gidamayghwayamwaata seareeda aba gidagasa, hean goomajeek ng'asheagaaschi aba habeawooda,

¹⁸ asi aba jeemba haleanji iyeenya moamu ghwayamwa, nea aba jeedeaba suh ea moamu gwarugu ASEETA ng'uyeega, aseaseeda mang'aw gasa heechea gamng'awsa abeeda ghwanyas giimajeekta ak ghwanyas rarooda ghayi siyiin madeedeanya.

¹⁹ Geendeawi ng'asheanji nea gwarugu huumwa ak gawuurji alooheeda jea ghaweat giisiimeanda, ghusooda iissa gawa heeda ghaydit laabwa hoowa hang'da sibwaasha gheeda,

²⁰ heeda weah Yesu nea gawuurji siida galeada aba hoorgeedeanya, ak ea niiw ashoohoocheanda haw manda muudeanooda nea gawuurji Melkisedeki.