Ebraniya 5 - Bibliyeeda Ghaydit

¹ Aba gideaba gilinyoo ea ashoohoocheanda haw siloat aba jeeda buuneeda gealoat gwasin gadiyeeda aba hoorgeeda buuneeda aba giiduupcheeda sea ASEETA, ak ghoadayda haleanjeeda ea haleanjeeda lukghumajeega aba badayda riing'eeda.

² Nea ghoamu gwandeayi sea fuga mwanala gissin ea gea sadeadi, aba gideaba niny gaburda ng'arng'aranda.

³ Aba badaydeaba ng'asheesu niny sirat ghoadayda lukghumajeega aba badayda riing'eagaaschi ak ghoadayda eara gea buuneeda.

⁴ Ea manda siida ammu gwanyaksa geaw mureani, geaghus gaguursa ASEETA, gawuurji gidaguursiinda Haruni.

⁵ Gwasunu eara Gristo mii goodiing'u geaw ak geanung' ghoah ashoohoocheanda haw, niny ghwaloat dea ghayi eesha niny, “Ang'iing'i guwoosi Orjeedeanyu, askweareani neajiileey”;

⁶ ak gawuurji ginyaashta aba hich nuut, “Ang'iing'i guwoosi ashoohoocheanda manda muudeanooda uurji Melkisedeki.”

⁷ Aba askwearjoojigiga bea saseadaanyiin ghamwaash Yesu ASEETA nea gang'ula humng'eeda ak ghabwat ASEETA, nea gooyeawda aba ghuuta haw ea dabeaka, nea googeal heeda siida ammu ghoaghuuha niny miyeeda, ak geayiiy aba gidawalda gheang'da ASEETA.

⁸ Earapeadi was Orjeeda, ghwanal mureeda aba gidida ghayi sawaniin;

⁹ amadu nea siimajeek ghoah giing'eeta lealeanooda mamuudeana aba heeda buuneesean sissa niny mureeda,

¹⁰ ak ghwaloat ASEETA ghoah ashoohoocheanda haw uurji Melkisedeki.

Miinda gheang'da aba nung'weadayda masaweega

¹¹ Aba badaydeaba nih geendeawi ng'asheega saang'a jea eerukuna hang'waay rukunooda, earapeadi mwang'ada iidigeagwa.

¹² Earapeadi aba damani miisa awoosa giinealshoodigean, gamiiseegwa gideaba gajanyasa sih nuut jea ghoanaaleegwa gicha ng'asheega majeekcheewi bea madeeda bea ASEETA. Googasayi eanooga, mii hamita hang'waay gil;

¹³ aba gideaba siida ghus eanooga mwanala gil aba ng'asheega doabiiw, aba gideaba niny baleanda.

¹⁴ Hamita hang'waay gaba fuga nihitiisa heeda, nea giika mideawa fughareengean ea siinaal sinooda gichea gooheeleata ng'asheega miyaasiin ea gea munyas.