Ebraniya 13 - Bibliyeeda Ghaydit

Gichea eehoosanda ASEETA

¹ Bariinyeega orjoogiyya gagasa ea maduuleana.

² Adiidu ginung'waadi gideaba gajahiimsiina rabasta inyeanda jeeda aba gideaba gwanda fuga mwaatkwa niing'aata malaykajeega nea mwanala.

³ Oapkaada fuga Mida ghealooniga, ak goowuurjeewi giloondeayeesi ghealooniga sea saawa. Oapkaada fugiga sisawaniin, aba gideaba eara agooga goondeawi sasanuuka.

⁴ Geeshooda dasisiina mureeda buuneesean, nea eara bulaliida gagasa ea mandeawana ririnnyeanda; aba gideaba ASEETA gaygoorgweaksa fuga munyas ea gea mealuuli.

⁵ Ak giheeleewi eaweagaagu bariinyeega lapiya, ak gagasa ghoahiinyi gida indeawi aba gideaba gwayi, “Aniini manda gichea daraay ghana danung'useey heeda.”

⁶ Hean abeeda gajeamuusa eerukuna nea geesikteawi gideaba, “Ng'utamiida weedaneedeanyu gil, ak aniini ea maydaawal ng'eang'i; siida gaygwasimanean naaha?”

⁷ Oapkaada fuga ahaaghwaneegwa, fugiga rukuneegwa ng'asheanda ASEETEAN; asikteawana gichea ghabwat geeshta eaweega nyaawa, ak googali masaweega nyaawa.

⁸ Yesu Gristo gawuurji gideaba heeta ea ghamneawa ea gagul damanda manda muudeanooda.

⁹ Adiidu ghoayaachi geeshta ng'asheega saang'a ea giinealshajeega hidu; aba gideaba ghwahit geemajeek guroorooda aba dagheerjeanduumeeda, nea mii aba hamichoojiga gil, ak ea mwanyagaada aba gidaat geeshta.

¹⁰ Ak geendeawi heeda wagiida nea fugiga gadiiyi aba jeeda maheemajeandean ea madoobiiwsiina gideaba gayghwaak.

¹¹ Aba gideaba sasanuuka diyeanga siihiida foojeanyeeka nyaawa ak ghwaat ashoohoocheanda haw heeda ghaydit ghoah lukghumeeda aba badayda riing'eedean geaghwarda aba jarooda murdeeda gambiini.

¹² Eara Yesu gwasawana aba madeetooshta ak abeeda ghoamiidu buuneeda aba foojeandaanyi.

¹³ Asi eeweaya mwadi heeda mida aba jarooda was murdeeda gambiini, ak geeguuyeesi baspaseegaaschi ghayi ahang'waay.

¹⁴ Aba gideaba aba hiji meendeawani mujiineeda jea ghwashng'u, aseasa geegasayi mujiineeda jea ghwahidu.

¹⁵ Asi aba niny eegala mwadi nea geataydi lukghumeeda duumsheesiinda ASEETA, nea haghweega ghuuta gil gea mwas gheawungaaschi.

¹⁶ Adoofooli sinooda ng'asheega miyaasiin nea goobareanyi haleanjeeda oondeawi, aba gideaba lukghumeeda sunu goohoosan ASEETA.

¹⁷ Asisiina mureeda fuga ahaaghwaneegwa nea googadiyeesi; aba gideaba saawa gang'ula gurooruunatkeagwa, nea gawuurji siida jea goodayiida ng'asheega. Asi saawa gagasa gwasin ng'asheesu nea gahoosan, nea adagagiisan, aba gideaba ng'asheega sunu maygwarachi gil aba heedeang'wa.

¹⁸ Amwaasha ASEETA ghawooda aba badahuukaasa, aba gideaba geesikteawi gideaba geendeawi fughareeda miy, nea geegasayi eesina haleanjeeda sean aba mureeda.

¹⁹ Ak geamuscheegwa muuchi aba jeedeanyu asina ng'asheanji ak abeeda geebay eeteelnean heedeang'wa.

Mooshta ASEETA

²⁰ Asi ghamneawa ASEETA mideawa hoyyoo biikta gweadu gicha Ng'utamiideanya was Yesu aba jeeda miyeeda, jeagiischoocheanda haw bea gisilga, aba foojeanda neajeeda manda muudeanooda,

²¹ gagasa gagooneegwa haleanjeeda sean miyaasiin ak abeeda goosinyi gidagasa, nea gagadiiy aba jeedeang'wa gidagasa niny aba gheanyangaaschi aba naweeda Yesu Gristo; nea giigheambiita ea daanyi damanda manda muudeanooda. Amin.

Ng'asheega huuydean

²² Geamuscheegwa, fuga eaduupcheewi, oang'waanya ng'asheandeanyu jea goomajeegeegwa, aba gideaba ng'asheesu geang'oorneegwa nea ghaanuwaaschi.

²³ Gagasa anala gideaba orjeeda giyeanya was Dimoteo siitin aba ghealooniga, ak abeeda gaydabay dahidu heedeang'wa iibay ghwahidu.

²⁴ Aghada fugeagwa hees ea fuga ghaydidi sean. Fugiga leabu ng'eanyiida Italiya ghoaghadeagwa.

²⁵ Gagasa anyasa oogasean dagheerjeanduumeeda. Amin.