Ebraniya 12 - Bibliyeeda Ghaydit

ASEETA was Ghweandeanya

¹ Asi, dea nineaweesiinaneasa shamooghooda haw bea muushoodiga, gagasa easaja giliwas sareenda, ea riing'eeda neekiiseasa muuchi ak ghwanung' eesalda nea geemiriikchi ng'weega siyiin madeedeanya,

² nea geeng'ulayi Yesuheeda asheeda was dea amajeek masaweagaasa, was dea aba hooseaneega siyiin madeadaanyi ghoahang'waay aba beehiida, ak gafool baspaseega, ak goopteada aba meatkweeda geatinda dugwa bea hoorgeeda gheambalmeeda ASEETA.

³ Asi ng'ula dea ahang'waay aba badayda fuga riing'eega ea furjeeda aba badaydaanyi, ak abeeda ea moahuuwi fuga bur ghana gea giyoonyi.

⁴ Aba ng'ucheedeang'wa sea riing'eeda miyoahang'waanya ea eeyi bwak ea oahiida foojeandeang'wa.

⁵ Ak ea nirooseegwa ng'asheega ghayi rukuneegwa nea gwahindaneegwa orjooga?– “Orjeedeanyu, adiidu ging'ulayi nea giibudeayani lasooda lasnyi Ng'utamiida, ghana gabur iheengeagwa iilaseegwa niny.

⁶ Aba gideaba Ng'utamiida iissa ghwalas siidida bwariiyiin, ak ghwalas giliwas balean mwas niny.”

⁷ Geaghus mureeda ak abeeda ghoahang'waanyi. ASEETA ghwanung' ahuwa orjooga; gaygwanda ana balean jea ea maygwasissa mureeda ghwaan?

⁸ Iisinung'waadaneegwa nea mealaseegwa, ak goowuurji sean, nea googuuyi sean, abeeda goowooschi diibiga sishuwaanda moowoosi orjooga.

⁹ Murdeedeaba ng'asheesu, geendeawi ghweanigaasa bea ng'eanyiida jea ghwalaseasa ak geesisi saawa mureeda. Abeeda ea mammiiseasa muuchi gideaba gajeetuuksiina geat Bwaabeeda gurooruunatka ak geanyaschi eaweega?

¹⁰ Aba gideaba saawa ghwalaseasa aba gheadi nuwaas aba gidamiisiinda saawa ak ghwalaseasa ak geemiyeesiidayi, ak abeeda geeguuyi ghaydidandaanyi.

¹¹ Aba gheadi nuwaas bayiiga sean iising'ula aang'waan mawuurji gissibwariiy; ama muchu gwaji haghweega eadu hoyyoo bea doobiiwnata aba heeda fuga sibean eanaal ng'asheesu.

Gichea eabeada ea reekusiinda

¹² Asi agatkada geatingeagwa abitu ak goommajeekchi gutung'weaka ng'arng'ari,

¹³ ak ghoatoabiiwji naweadinga jea ghwala geeshangeagwa, nea abeeda gidamideawa badeeda ea meegeandeawana heeda roobuutka gagasa eahaap.

¹⁴ Gagasa giimiriikta hoyyoo aba heeda buuneesean, aba ghaydidanda nea manda siida jea ghwadaah Ng'utamiida iimandeawana.

¹⁵ Ang'ula adaghanyi siisi mwanyasa dagheerjeanduumeeda ASEETA; ak ea manda “hawunyeanda ng'weaninda” ama ridu gweadu jaliida, nea aba nih ghang'ut fuga saang'a ririnnyeanda;

¹⁶ nea adagwanda siida sina ng'asheega munyas ghana dea meawala gheang'da ASEETA uurji Esawu, ghayi shaayda hawundaanyi doobiiwsa aba agiischooda asagi.

¹⁷ Nea ghoanali gideaba iidu nea gagasa gwahearan ghawooda, geefool, aba gideaba mwanyasa gheata duukuunooda, earapeadi gasa nea goobuutu dabeaka.

¹⁸ Aba gideaba agooga mii apkaani heeda gidasiimu eawaas, was ng'ushapta beasta, ea misaneeda, ea giiseaneega, ea shaarara,

¹⁹ ea nyeashta durumbeati, ea ghuuta siida ama nyaah ghwanung' ghabeal fuga iiy ak ghwanung' ea magassa gabiikta ghwayiiy giijasi nea geerukusa saawa.

²⁰ Ak ea mayghoamu aba ng'asheegiga sirukusean, “Nea eara diyeayda iisat giijeeda, gajeefuta lagheanga.”

²¹ Huumwa, nea hoowa ghang'uda fih muuwda nea heeda ayi Musa, “Aniini ghaabwaadanyi aba muuwda.”

²² Ak ea noapkaanyi Giijeeda Sayuni ea mujiineeda ASEETA majeek, Yerusalemooda humng'eeda, ea heeda malaykajeega saang'a, bwat geat aba ghweelmeeda,

²³ ea heeda fuga bwat geat was gea siisheeda eeji sing'oorsa gheawunga nyaawa humng'eeda, nea dea laja girgweaguutka ea ASEETA buuneesean, ea heeda gurooruunatka fuga doobiiweadi geemiyaas,

²⁴ ea heeda Yesu, was siida aduuptooschi buuneeda bea neajeedeesh, ea dea foojeanda siipuuna jea gwanyagu haleanjeeda miyaasiin ng'al foojeanda Habeli.

²⁵ Asi ang'ula adiidu ghoaheawi ninyeeda balool. Aba gideaba inyeeda saawa ea mamng'awa damanda heaweawa ninyeeda reekusa saawa aba jeeda ng'eanyiida, abeeda gajeemng'awdaan iisiheawi ninyeeda reekuseasa aba humng'eeda.

²⁶ Hean ghwanung' nyeashtaanyi gwaduumduum ng'eanyiida; ak ghamneawa ea niheeleesa gideaba, “Ak gaydabiikta gicha deaduumduum nea mwajeaghus ng'eanyiida gaydeaduumduum eara humng'eeda.”

²⁷ Ng'asheanji bea gideaba, “Gaydabiikta gichean,” ghoahiimu geandeayda gissiituumduum, was gidaghayi sisin, ak abeeda geapuut gidida mwoamu eetuumduumiin.

²⁸ Asi eahuuwa fuga mideawa badiischooda aba nyasooda sugoocheanduumeeda majeetuumduum, ak geatawji ASEETA ghadoowanda huumwa, aba mureeda ea mooshta ghawooda;

²⁹ aba gideaba ASEETEANYA beasta nyarja haleanjeessean.