Ebraniya 10 - Bibliyeeda Ghaydit

¹ Nea deaweeda ii jirooneeda ng'asheega miyaasiin jea ghwahidu, ak ea mii oormeeda huumwa bea haleanjeedida, ea mayghoaw, aba lukghumeedida duu eetayiida aba gilakweayiin, ak ghoamiidu fugiga neekiisean.

² Eara gwasa, gwachi ea majea ninung'waada giidaydeayda? Ak abeeda fuga moora iisiimiidu nibwagi, ea mudugwandeawa giipkeata riing'eeda.

³ Nea aba lukghumeani iissa ghwanung' eapkaat riing'eeda aba gilakweay.

⁴ Aba gideaba maygwasa gideaba gaygageanda riing'eega foojeanda jiirgwa ea gea nooga.

⁵ Eara gwasa, damanda hina Gristo jeeda ng'eanyiida, gwayi, “Lukghumeeda ea haleanjeeda sisapa geadi bea ghadooweeda ghanyea migassi, nea saseeda ea nisinnean aniini;

⁶ aba lukghumajeega sighwarda ea haleanjeeda sisapa geadi aba riing'eeda ghanyea mihoosasiini.

⁷ Ak geayeenyi, ‘Ean naawunyi dasin gidigasayi, Ea ASEETA,’ gawuurji gissing'oarda aba badaydeanyu aba jeeda gitaabu.”

⁸ Damanda eeneewa aba heetiyeada, “Ak ghanyea miigassa ghana bwariinya lukghumajeega ea haleanjeeda sighwarda sisapa geadi ea haleanjeeda sisapa geadi bea riing'eeda” (suh geatayda aba naweeda deaweeda),

⁹ ak gabiikta ghoahaat nea gwayi, “Ea, naawunyi dasin gidigasayi.” Niny gwanyarja dea madeeda ak abeeda ghoang'eat deabiyeenya.

¹⁰ Ak abeeda aba gidida gasean abeeda gajeamiineasa aba naweeda haleanjeeda sisapa geadi was saseeda Yesu Gristo nibwagi ak ea majeebiikta.

¹¹ Nea iissa ghamiinaada ashoohoocheanda galeagasean damanda gadiyeadaanyi, ak iimiisean ghoadayda lukghumajeegiga bea galeagasean, moamu gageanda riing'eegean.

¹² Nea Gristo iyadayda nibwagi lukghumeeda aba riing'eega, hean goopteada aba meatkweeda geatinda dugwa bea ASEETA,

¹³ hean ghoamuughu ea eayiin weajoodigaaschi ghoah hoorgeeda geeshangaaschi.

¹⁴ Nea aba giidaydeawagi bea haleanjeeda sisapa geadiin ea ninung' ghwahit fugiga sean siimiiduun aba damanyoojiga sean.

¹⁵ Ak gamuuwuneasa Guroorooda Ghaydit nea gwayi,

¹⁶ “Nih neajeeda jea dasisa saawa iing'ata askwearjoojigiga, aba girugu Ng'utamiida: Gaydayiin diigheanyeekeasu jeesinga gurooruunatka nyaawa, ak geang'oorsi jeesinga fughareenga nyaawa,”

¹⁷ Ak gabiikta ghoahaat gideaba, “Maygudu gabiikta daapkaat riing'eega nyaawa ea ng'asheega munyas sina earahay.”

¹⁸ Heeda mida samsiindeaba ng'asheesu, ea maygudu gabiikta giidaydeayda haleanjeeda sisapa geadi aba badayda riing'eeda.

Eneekiissiina ASEETA

¹⁹ Asi, fuga eaduupcheewi, dea simwasi beata heeda Ghaydit aba foojeanda Yesu,

²⁰ aba naweeda eesh mideawa eaweega jaaneasa aba naweeda ghamarda beashooda, nea aba badayda saseadaanyi gil,

²¹ amadu nea geandeawi ashoohoocheanda haw haweewa gheeda ASEETA,

²² ghang'wana geeneekiisi nea geebeayi gurooruunatka huumwa nea geesikteawi muuchi masaweega, nea geapuuna gurooruunatkaasa alooheeda ak geang'ami ng'asheega munyas ak geehuun sasanuukaasa aba beega miyaas.

²³ Gagasa eang'waanya muuchi duukuunooda sirarji nea mwabealbeala, aba gideaba siida rugu nea gooheeleesi ea doabiiwaat;

²⁴ ak geanali gichea eanung' gabarinyiida geat buuneeda ea gadiyoojiga miyaas,

²⁵ nea adoanung'waadi badoodeaba geat, ak geesinyi seareeda fuga mwaatkwa, gidabal gaba siisi amajeek nuut, nea aba sean ghoadaayi gideaba Eaweedida girgweaksiinda nineekiit.

²⁶ Nea iisisinyi riing'eeda aba baysiinda nea sinyaschi fughareeda huumeanda, abeeda ea maygwanda lukghumeeda aba badayda riing'eega,

²⁷ nea gwanda furdeayda girgweaksiinda jea ghoabeal buuneeda, ea beasta ng'waan jea ghwaak fuga was weajoodiga.

²⁸ Nea siida fool deaweedeeda Musa iissa ghami nea meabwayda aba ghuusispa muushoodi iyeenya ghanea samwagu gil.

²⁹ Abeeda iing'ulayi gajea muydaan girgweaksiinda jea ghwanyas fuga ghasghas Orjeeda ASEETA, nea ghabwara ririnnyeanda foojeanda neajeeda ghayi simiina, nea ghoanyareas Guroorooda dagheerjeanduumeeda?

³⁰ Aba gideaba geanali aseasa siida ayi, “Mureandooda deanyu, gaydawalda aniini.” Nea gwayi gicha, “Ng'utamiida gaygoorgweaksa fugaaschi.”

³¹ Nih gidahaloat gil gideaba gajabeedeaysiina geatinga ASEETA mideawa eaweega.

³² Asi apkaada askwearjoojiga ghayi bea mwadi damanda siipwaanyaneey, hean ghoarjeang'di ng'ucheeda ng'waan ea sawanadeeda,

³³ nea hich iissa geeng'eaweegwa nea geesawaneegwa, nea hich gookuuyi geadi sea fugiga sisima ng'asheesuun.

³⁴ Aba gideaba noondeawi baydeayda aba badahuuka fuga mida ghealooniga, ak ghoamwaschi nea goohoosanyi aba giireeta haleanjeedeang'wa, nea ghoanali gideaba agooga goondeawi haleanjeeda miyaasiin jea ghwashng'u.

³⁵ Asi adiidu goojakti gidoararji, mideawa giimearda haw.

³⁶ Asi gagasa andeawana riyeeng'deayda, ak abeeda goosinyi gidagasa ASEETA ak ghoanyaschi gidida siheeleesean.

³⁷ “Asi gudughwashoada gheadi nuwaas, ak abeeda dea jea ghwahidu gayghwahidu ak ea mayghwashing'da;

³⁸ nea siideanyu doabiiwaat gaygoobiideawa masaweega, ak iiraay ak gabiikta bwadaw, ghanyea maygahoosan guroroodeanyu aba niny.”

³⁹ Ak aseasa ea meebeahi jeedeaba fugiga biikta bwadaw ak gealas uhuudean, geebeayi gea mideawa masaweega nea gafur gurooruunatka nyaawa.