Ebraniya 1 - Bibliyeeda Ghaydit

Ng'asheanda ASEETA aba naweeda Orjeedaanyi

¹ ASEETA ghayi goobalool ghweanigaasa aba ghuusiga sibanga aba naweadinga saang'a ea damanyoojiga saang'a;

² amadu aba mudeanoodeaba askwearjoojisu goobalooleasa aseasa aba naweeda Orjeeda, ghayi loat ghoah siida jea gwahearan haleanjeeda sean, ak aba niny gwasin ng'eanyiida aba badaydeaba niny.

³ Aba gideaba niny ghoahiimu weeshinda giigheambiita ASEETA nea gwandeawa giirooraneeda ea seareadaanyi, ak ghwasar ng'eanyiida aba ng'asheandaanyi mideawa uurda. Iing'ata nea nisin giimiinnooda riing'eeda, hean goopteada aba meatkweeda geatinda dugwa bea ASEETA was Ng'utamiida aba hoowa bea dea daliiliin.

Hawunda Orjeeda ASEETA

⁴ Ak ea sinung' gwaheedu ea ghoadaraam malaykajeega aba gideaba gheawunga ninyas eahaweewa ea ghang'al gea nyaawa.

⁵ Neada ASEETA ea niyeesha ana malaykajean, “Ang'iing'i niwoosi Orjeedeanyu, askweareani neajiileey”? Ghana gicha, “Aniini gaydoaw aba headaanyi ghweanda, ak gayghoah aba heedeanyu baleanda”?

⁶ Ak gicha, iyeadu duweacheadaanyi badayda ng'eanyiida, gwayeesha, “Nung'waada ghaghadoawan niny malaykajeega sean bea ASEETA.”

⁷ Gwayi aba heeda malaykajeega, “Gwasin ng'eaha meang'eega malaykajeega, nea ghwanung' ghoah soomjoagaaschi ng'ushapta beasta.”

⁸ Ak gwayi aba badayda Orjeeda, “Hoorgeadaang'u, Ea ASEETA gaba eaweega manda muudeanooda, sugoocheanduumeeda doabiiw sugoocheanduumeeda gheambalmeadaang'u.

⁹ Gibwariinyi doobiiwnata ak gisti fuga mandeawana deaweeda; asi ASEETA, was ASEATAANG'U nimwaarnyi aba nagheeda hooseaneega ea ng'ala bareandaang'u.”

¹⁰ Ak, “Guwoosi, Ng'utamiida, ghayi sin ng'eanyiida aba mwadi, nea humng'eeda ea gadiyeeda geatingaagu gil;

¹¹ suh gaygameewa, nea ang'iing'i gajabiidana; ak gaygawoosiidi sean ea gawuurji hang'da,

¹² gawuurji hang'weaka gajeamughuushghuush, ak gajeayam. Nea ang'iing'i guwuurjeewi gida eawoojisu, nea gweanyeakaaschi ea maygamuudean.”

¹³ Ak ea niyeesha ana malaykajean, “Apteada aba meatkweeda geatindeanyu bea dugwa, ea dayiin weajoodigaagu ghoah hoorgeeda geeshangaagu”?

¹⁴ Neada malaykajeega gadiiyi ghayi siicheagu gagadiiyeesa, aba badahuuka fuga jea ghwanyas lealeanoodean?