Ditto 1 - Bibliyeeda Ghaydit

¹ Bawlo, soomjeanda ASEETA ea biissa giijasoocheanda Yesu Gristo, ak ghaanung' gawa mwadi masaweega fuga loat ASEETA ea fughareeda huumeanda mideawa miyinda,

² Aba jeeda rarooda eaweega manda muudeanooda, aba heeda ASEETA moamu gwanaba ng'uyeega, sibean eeheeleesa gweanyeeka goola ghang'ata

³ iidu nea ghwahita damanda ghoadaajiit ng'asheandaanyi ghayi siiteaganean aniini aba girukuteayda lealnoocheandeanya was ASEETA;

⁴ Heeda Dito jeepteanyu bea huumwa aba naweeda masaweega siipareanyi. Gagasa nyasa dagheerjeanduumeeda ea hoyyooyda leabu heeda ASEETA was Bwaabwa ea heeda Gristo Yesu was lealnoocheandeanya.

Gadiyeeda Dito aba ng'eanyiida Grete

⁵ Nih gideanung'usiinaneey ng'eanyiida Gretehi ak abeeda gisini gadiyeedida shoadaan, nea giyiini gweargwa giliwas mujiinajean gawuurji gidaghayi earukuneey, siida iimeeyeateena ghuut.

⁶ Iideepa siida ea miyeerukuna badayda ng'asheega munyas nea siyeeda gatmooda asagi gil, nea diibigaaschi gwandeawa masaweega miyeergweaksiina deambiilaneanduumeeda ghana nyoota mureeda.

⁷ Nea jeagiischoocheanda ganiisa, was siida siiteaga gadiyeeda ASEETA, gammiisa ea meerukunana badaydaanyi ng'asheega munyas; ak gagasa ea maba ghwarja ghanea mii asas nyaras ak ea mii leeyeanda ghana gwajala ghana gwashissa ghaang' haleanjeeda mwahida,

⁸ gammiisa ea siida inya jihi, ak gwandeawa bariinyeega haleanjeeda miyaas, nea goodeeneada geaw, ak ea doabiiwaat, nea ghaydit, nea ghoang'waay geaw;

⁹ nea ghoang'waay muuchi ng'asheanda gawuurji gissiinaalda, ak abeeda ghoamu ghoadayda ng'asheega gichea eabeada aba giinealshooda huumwa nea ghwajoar fugiga heawaan.

¹⁰ Aba gideaba gwanda fuga saang'a manda mureeda, mideawa ng'asheega mwaloada gil, nea gwareengani buuneeda, nea ghwaraanya giika siyaat ghasmeahoodean,

¹¹ gidabal gearat ghuusiga nyaawa aba gideaba fiisu inyeessa gahuteawi buuneeda aba giinealshooda ak ghwanyas haleanjeeda aba giinealshooda mwadaagha.

¹² Nea siyagi aba jeenyaawa, ea sibaneeda nyaawa gil, ak gwayi, “Fuga Grete gaba ng'uya galeagasean, ak ea diyeanga munyasi, ak gaba ghaleehu nea deewi.”

¹³ Muuwuunooni huumwa gil. Asi awoowsiina saawa nea ging'waniidi, ak abeeda gamajeegiit aba jeeda masaweega,

¹⁴ nea adagooleeysiit gununoonga fuga Yahudi ea ng'asheega rugu buuneeda heawa huumeandean.

¹⁵ Aba heeda fuga miyaasiin haleanjeeda sean aamiyaas, nea gea munyas ea gea mandeawana masaweega aba heanyaawa manda gidamuy; fughareenga nyaawa ea giiteemshooda nyaawa ea munyas.

¹⁶ Iissa gwarugu gideaba geanali ASEETA, nea iissa ghwashaang' aba sinaweega nyaawa, nea gwandeawa sicheeda, ak ea mandeawana mureeda, mamiisiina sinooda gadiyeeda miy.