DANIELI 3 - Bibliyeeda Ghaydit

Nebukadinesa gwarukusa giliwas sih ghabwat sanaamu sisna dahaabu

¹ Ak gwasin sugoocheanda siguura Nebukadinesa sanaamu sisna dahaabu, nea geawundaanyi ea geatin laadami nea baraknataanyi ea geatin lahi. Ak ghamiinda aba mooheeda Dura, mida ng'eanyiida Babeli.

² Hean gaguursa sugoocheanda siguura Nebukadinesa fuga hees ea sugoodiga bassa ea sugoodiga hees, ea gweargwa girgweageeda, ea fuga adiiwshachi, ea fuga nal deaweedajeega, ea fuga laja girgweaguutka, ea fuga hees sean bea giliwas daroar ghapka ghwadaah giing'eeta sanaamu sin sugoocheanda siguura Nebukadinesa ak ghamiinda.

³ Iimuchu ghabwat geat fuga hees ea sugoodiga manang'i, ea sugoodiga hees, ea gweargwa girgweageeda, ea fuga adiiwshachi, ea fuga nal deaweedajeega, ea fuga laja girgweaguutka, ea fuga hees sean bea giliwas daroar ghwadaah giing'eeta badita sanaamu sin sugoocheanda siguura Nebukadinesa ak ghamiinaada; ak ghamiinaada aba madeedeaba sanaamooda miinda Nebukadinesaan.

⁴ Ng'ata ghamiinaada siida ak gwarukusa buuneeda ng'asheega nea goojuur nea gwayi, “Geerukuneegwa, Ea buuneeda, ea eemoojiga, ea iidiga eemoojiga,

⁵ ak iiyiinyi ghuuta durumbeati, ea furiimbu, ea igeambooda, ea bayiiga, ea gidoondooriida, ea bundiida, ea gilinyoo eesarmaniida, gaydugunya ak gighadoawani sanaamu sisna dahaabu was dea miinda sugoocheanda siguura Nebukadinesa;

⁶ nea siida wassean matkunya ak ghaghadoawan gajeebean eejaksa jeeda duwayda yeat muuchi.”

⁷ Asi, iibay ghwayiiy buuneeda ghuuta durumbeati, ea furiimbu, ea gilinyoo eesarmaniida, abeeda buuneesean, ea eemoojiga, ea giliwas iita gaygwatkuy ak ghabwat sanaamoodida sisna dahaabu miinda sugoocheanda siguura Nebukadinesahiin.

Fih samwagu was buweadeega Danieli geergweaksiina nyoota mureeda

⁸ Hean aba damandida gayghapka fuga mwaatkwa bea Galdayo ak ghwaak badahuuka fuga Yahudi.

⁹ Ak gwayeesha sugoocheanda siguura Nebukadinesa, “Ea sugoocheanda, gagasa abiidana ng'eanyiida damanda manda muudeanooda!

¹⁰ Ang'iing'i Ea sugoocheanda, niradi diigheanda gideaba, siida wassean jea ghwayiiy ghuuta durumbeati, ea dea furiimbu, ea dea igeambooda, ea dea bayiiga, ea dea gidoondooriida, ea dea bundiida, ea ghuuta gilinyoo eesarmaniida gaygwatkuy ak ghabwat sanaamoodida sisna dahaabuun;

¹¹ nea siida wassean matkunya ak ghabwat gajeejaksa jeeda duwayda yeat ng'waan.

¹² Ak gwanda fuga mwaatkwa bea Yahudi iloadi jea ghoahaaghwa ng'eanyiida Babeli: was Shadraki, ea Meshaki, ea Abedinego. Ea sugoocheanda, fiisu moawala gheang'daang'u; aba gideaba mabata aseecheekaagu ghana ghabwat sanaamoodida sisna dahaabu imiindiin.”

¹³ Hean ghwanyareas Nebukadinesa muuchi ak gwarukuta gideaba ayeani Shadraki, ea Meshaki, ea Abedinego. Ak geeyeadu fiisu madeeda sugoocheanda.

¹⁴ Ghwalamda Nebukadinesa ak gwayeesha fiisu, “Ng'asheesu huumwa Ea Shadraki, ea Meshaki, ea Abedinego, gideaba moogadiyeesiini aseecheekeasu ghana aghadoawana sanaamoodida sisna dahaabu aamiindiin?

¹⁵ Asi ghamneawa iyoayiinyi ghuuta durumbeati, ea furiimbu, ea igeambooda, ea bayiiga, ea gidoondooriida, ea bundiida, ea gilinyoo eesarmaniida, abeeda gootkunyi ak ghoabwachi sanaamoodida sisna dahaabu ghayi easinyiin, abeeda ghwahit; ama moabwadi, abeeda gajeehisaneegwa jeeda duwayda yeat ng'waan; ak gajea ana aseet gil jea gageandeawaneegwa jeeda geatindeanyu?”

¹⁶ Ng'ata ghwasha geaba Shadraki, ea Meshaki, ea Abedinego ghuuta sugoocheanda ak gwayeesha, “Ea Nebukadinesa, aseasa meegasi eashaaha ghuutaang'u aba badaydeaba ng'asheanji.

¹⁷ Asi iisunu, abeeda ASEETA sibadayi ghoamu gageandeawaneasa heeda duwayda yeat ng'waan; ak gaygageandeawaneasa geatindaang'u, Ea sugoocheanda.

¹⁸ Ama masnu, abeeda ginali ang'iing'i Ea sugoocheanda, gideaba majeabwada aseecheeka ghana eabwada sanaamoodida sisna dahaabu imiindiin.”

Fih samwagu was buweadeega Danieli geergweaksiina miyeeda

¹⁹ Hean ghwanyareas muuchi Nebukadinesa, ea ghwayamwa gheamamdaanyi aba badayda Shadraki, ea Meshaki, ea Abedinego. Ak ghwanung' eaghwar duwayda niba ispwa ea ghwanaawa damanda eawoojisu.

²⁰ Ak gwarukusa fugaaschi mwaatkwa majeekcheewi bea shirikareadaanyi gideaba arata Shadraki, ea Meshaki, ea Abedinego, ak geehisa jeeda duwayda yeat ng'waan.

²¹ Ng'ata geerada fiisu nea nishuup geat hang'weaka geawi, ea gootajeega nyaawa, ea ngoofajeega nyaawa, ea hang'weaka nyaawa suuk, ak geehisa jeeda duwayda yeat muuchi.

²² Aba gideaba ng'asheanda sugoocheanda aang'waan bea gideaba anung' ghang'waaniit duwayda muuchiin, ak ghwaak ng'ushapta beasta fugiga aat Shadraki ea Meshaki ea Abedinegohiin.

²³ Hean geerada fugiga asamwagu was Shadraki, ea Meshaki, ea Abedinegohiin ak geehisa jeeda duwayda yeat bea beasta ng'waan.

²⁴ Iidu ghahamng'eanyi sugoocheanda was Nebukadinesa ak ghang'eat nea ghwalamwach. Ak gwayeesha fugaaschi hees bea girgweageeda, “Neada ea miyeehisana fih samwagu jeeda beasta?” Ghwasha ghuuta sugoocheanda nea gwayeesha, “Huumwa gil, Ea sugoocheanda.”

²⁵ Gwayeesha niny, “Aniini ghaadaayi fih ang'wan nea mii radeadi, nea gwaneay aba bugusta beasta, nea mii ghwaak beasta; nea iising'ula siidida bea ang'waniin gawuurji orjeeda aseecheeka.”

Fih samwagu geetin ak geataw hawunda

²⁶ Hean gawa Nebukadinesa ea gwaneekiisa ghuuta duwayda yeat muuchi ak gwayeesha, “Shadraki ea Meshaki ea Abedinego was fuga gadiyeeda ASEETA Haw bea humng'eeda, abeeni, ak ghoapkaanyi hiji!” Hean gwarina jeeda beasta Shadraki ea Meshaki ea Abedinego.

²⁷ Ng'ata ghabwat geat fuga hees, ea sugoodiga bassa, ea sugoodiga hees, ea gweargwa girgweageeda bea sugoocheanda ghwadaah gideaba beasta mandeawana uurda ak ea mii ghwaak sasanuukeaba fugiga; nea buudeega iheenga nyaawa ea mii ghwaak beasta, hang'weaka nyaawa ea mii ghwaak beasta, ak ea manda sasanuuka nyaawa shearooda beasta.

²⁸ Ghwalamda Nebukadinesa ak gwayeesha, “Gagasa eebadiischeesa ASEETA Shadraki, ea Meshaki, ea Abedinego, ajeagu malaykajeandaanyi ghaweat fugaaschi bea gadiyeeda, was gea ghus niny, ak gafool ng'asheanda rugu sugoocheanda, ak ghoaghaashta sasanuuka nyaawa measaamwa gideaba gayghoaghu ak ghabwat aseeta wassean geaghus ASEETA nyaawa.

²⁹ Asi gaydasin diigheanda: Fuga wassean, ea eemeeda, ghana ea iita jea gwarukuna ng'asheega munyas badayda ASEETA Shadraki ea Meshaki ea Abedinego gajealajaada damealga, nea geenyarjeaweada gealga nyaawa; aba gideaba manda aseeta nuut ammu gwalealdeaydunu buuneeda.”

³⁰ Hean goombiit sugoocheanda Shadraki ea Meshaki ea Abedinego aba ng'eanyiida Babeli.