DANIELI 1 - Bibliyeeda Ghaydit

Gununoonga Danieli sea fuga duupchi ( 1:1—6:28 ) Gheareemanga aba madeeda girgweageeda Nebukadinesa

¹ Aba gweaydeaba samwagu bea gheambalmeeda sugoocheanda Yuda siguura Yehoyakimu, ghwahidu Nebukadnesaheeda was sugoocheanda Babeli mujiineeda Yerusalemu ak gabeasheesa mujiini.

² Hean ghwanung' Ng'utamiida ghoang'waay Yehoyakimuheeda was sugoocheanda Yuda, haleanjeeda mwaatkwa bea gheeda ASEETA; ak ghwaat ea ghoahiita ng'eanyiida Babeli was gheeda aseataanyi, ak ghwayiin haleanjeeda heeda siitiiwiisa haleanjeeda aseataanyi.

³ Ng'ata gwarukusa sugoocheanda Ashpenasi, was siida haw ambal gulanga, gideaba eani fuga mwaatkwa bea Israeli, eaduudayeena fuga hees, ambaliischi sea fuga siiwal gheang'da,

⁴ was gheareemanga manda sirjeeda, miyaasiin ea gea geariirji mideawa fughareenga sean, biissa ea bareahi iheeni, aneali geat ng'asheega, hit aba gadiyeeda gheeda sugoocheanda, ak ghoanaal saawa ng'oorshooda ea iita fuga Galdayo.

⁵ Ak ghwanung' sugoocheanda eataw galeaga sean hamita miy aga sugoocheanda, ea difaayeeda leeha. Ak geanaal gweanyeew samwagu, ama muchu aba huuydeanda geanung' ghamiinaada aba madeeda sugoocheanda.

⁶ Jeedeaba fiisu ea Danieli, ea Ananiya, ea Mishaeli, ea Asariya bea eemeeda Yuda.

⁷ Ak gang'asa gheawunga sugoocheanda haw ahaaghwa gulanga: Gaguura Danieli Belteshasa, gaguura Hananiya Shadraki, gaguura Mishaeli Meshaki, ak gaguura Asariya Abedinego.

⁸ Ng'ata ghaheawa Danieli gideaba gayghabwara geaw ririnnyeanda aba agita hamita miy bea sugoocheanda, ghana aba difaayeeda leeha; hean ghoanyaash siida ahaaghwa gulanga hean ghoanyaash gideaba adinung' dabwara geaw ririnnyeanda.

⁹ Ak ghwanung' ASEETA ghwanyas Danieli baydeayda ea alooheeda aba heeda siida ahaaghwa gulanga;

¹⁰ ak gwayeesha siida ahaaghwa gulanga Danieli, “Aniini ghaawali gideaba gajiidu ghwadaah ng'utamiideanyu goonyi hamitaang'u ea difaayeeda jea leaha, gideaba guwoosi muy sasa ea ng'ala gea gheareemanga ideenacheewi. Abeeda gajiidu gwashageada eaweegeasu aba heeda ng'utamiida.”

¹¹ Ghwalamda Danieli ak gwayeesha siida arear ghayi geanu siida ahaaghwa gulanga aba haghweeda Danieli, ea Ananiya, ea Mishaeli, ea Asariya;

¹² “Galana fugaagu bea gadiyeeda eawooji damanamughuush; anung' eegeaneasa nyeanyiida eayaaga ea beega jea ealeaha.

¹³ Ak abeeda geadaah gheamamuunatkaasa ea gheamamuunatka gheareemanga aga hamita miy bea ng'utamiida ak ging'ulayi, ak gisindi gididaakti aba heeda fugaagu bea gadiyeeda.”

¹⁴ Hean ghamwas gidarukusa, ak gagala eawooji damanamughuush.

¹⁵ Ng'ata eawooji damanamughuush geadaah gideaba gheamamuunatka nyaawa aamiyaas ak ea niriisha sasanuuka nyaawa ea ghang'al gheareemanga sean aga hamita miy bea ng'utamiida.

¹⁶ Ng'ata gageanda siidida ahaaghwa hamita miyiin ea difaayeeda jea ghwali, ak geataw nyeanyiida.

¹⁷ Ak eara aba heeda orjooga asang'wan, ghoadaw ASEETA nalita ea fughareeda ng'ooruutka sean ea weaghuumeeda; ak ghwanal Danieli haleanjeeda sean siihiimsa ea giirgweatka.

¹⁸ Iimuchu aba huuydeandeaba askwearjoojigiga rukuta sugoocheanda gideaba ayeaniin, hean gweadu siida ahaaghwa gulanga madeeda Nebukadinesa.

¹⁹ Hean goobalool sugoocheanda saawa, ak ea manda jeedeaba sean dea uurji Danieli ea Ananiya ea Mishaeli ea Asariya; ak ghamiinaada aba madeeda sugoocheanda.

²⁰ Nea aba giliwas weaghuumeeda ea nalooda gilinyoo gagasa sugoocheanda aba heanyaawa, ghwadaah ghang'alda saawa niba damanamughuush aba heeda beeneediga sean ea deareemng'ajeega mida jeeda ng'eanyiidaanyi sean.

²¹ Ak goobiida Danieli ng'eanyiida ea ghwahita gweayda madeeda bea sugoocheanda siguura Goreshi.