AYUBU 7 - Bibliyeeda Ghaydit

¹ “Siida aba giibindaanyi gwandeawa ng'asheega hang'oonyi aba badayda ng'eanyiida, ak eawoojigaaschi gawuurji eawoojiga siida gadiyeeda.

² Gawuurji siida gadiyeeda gasa muuchi jirooneedida, gawuurji siida gadiyeeda amuughu mushaahareadaanyi.

³ Aniini geegoonan sheega mwadaagha, ak giliwas eaweega geegoonan giiseaneega.

⁴ Inyeesa nea geandi ruweanga geayeenyi, ‘Gaydang'eat eeju?’ Aba gideaba eaweeda ea geaw, inyeesa geayamay geaw ea gamuchu.

⁵ Saseedeanyu ghwanyiit ghuughuutka ea ririnnyeanda, mughoowoodeanyu nighajaamiit ak gabiikta ghakghur geaw.

⁶ Eaweegeasu gaweay nea ghwalamwajaada. Ak gwaduulean nea manda gida rar.

⁷ “Apkaada gideaba eaweegeasu giisiimeanda gil ak ghwahit, ak gheang'deanyu ea maygut ghwadaah ng'asheega miyaas.

⁸ Dea ng'ulean ghamneawa, maygut ghwadaahan, inyas ghoang'wearda aba geeshangiga abeeda gajea naang'amnyi.

⁹ Gawuurji gidashealeadayda shamooghooda ea goosha, ak ea giduurji buuneeda rarang'eesa jeeda gheeda maloonghajeega gil ak ea mabiikna.

¹⁰ Ak ea maygabiigu gheanyi, nea meanala heeda mida.

¹¹ “Asi maydasiinda ea meabalooli, gaydabalool aba sawanadeeda mida jeeda gurooroodeanyu gaydeayeawda aba sawanadeeda mida saseedeanyu.

¹² Heapi aniini geawooschi basooda? ghana ichibooda, bwak ea nung' gafuran furiischoocheanda.

¹³ Ak geayeenyi, ‘gaygoofuufan bulaliida, ruweangeasu gayghwasuuy sawanadeedeanyu.’

¹⁴ Ang'iing'i giimuuwjean aba giirgweatka, ak ginung' dabeal aba gida siihiimnaan.

¹⁵ Ak ghang'wana ghaarati geaw, aba gideaba ghang'wana miyeeda mwasamwa sawanadeeni iteanyuun.

¹⁶ Ghaasichi eaweegeasu, maydeabiida damanda manda muudeanooda, nung'waadanaan, aba gideaba eawoojigeasu giisimeanda gil.

¹⁷ Siida gilba naaha eaduupcheewana gil, ghwasaan anda gideawiisi.

¹⁸ Ak giing'weeriisi gilinyoo ea sakteayda gil, nea gisimi damanyoojiga sean?

¹⁹ Gajang'weeriisean ea ghoah eeju, maygoona gheata danukghuta eara ng'usheega?

²⁰ Inyas geasinyi riing'eeda, abeeda gwasawanyi naaha, ea furiischoocheanda buuneeda? Ghwasaan anda ginung' doaw giideenda giirooraneadaang'u? Heapi aniini geawooschi sareenda aba headaang'u?

²¹ Ghwasaan anda mibwaydani giidiinyeadeanyu, ak gigeandeawanean munyindeanyu? Gajeepunyan eawoojisu duwaawiin gajeani geeshteanyu ak gajea mudu danda.”