AYUBU 5 - Bibliyeeda Ghaydit

¹ “Asi guurda ghamneawa, gwanda dea jea ghwasha ghuutaang'u? ak gaygala heedeabeang'a aba heedeaba suh ghaydidiin?

² Aba gideaba nyarasta gayghabwar siida dasha, nea lachng'eanyiida ghabwar siida was rageananeeda.

³ Ghaadaayi fuga dasheahi nea ghwanyas giibinda, ak ghaamwaashti giibindaanyi aba geeshangiga.

⁴ Orjoagaaschi ea sheageewa lealeanooda, ak geaghabwas aba gidaghuuta, ak ea manda siida jea ghaweat.

⁵ Boagaaschi ghwaak fuga bearji jalooda, eara booga rinna jeeda halaghweenga, fuga geawi gheanyan ghwalaja ghuut meanang'oocheanduumeadaanyi.

⁶ Aba gideaba sawanadeeda maleapna jeeda sigeeda, ghana mitagheasta marinana jeeda ng'eanyiida.

⁷ Ak siida geeji aba gideaba ghwanyas sawanadeeda. Ak gawuurji rarayga beasta darsa humng'eeda.

⁸ “Inyeeda gwachi geawuurjeeweey, gaydawa heeda ASEETA, ak ghaanung'wi haleanjeedeanyu headaanyi.

⁹ Ninyeeda sina ng'asheega hees mwoamu eesikteawa, ak gwasina ng'asheega deamdeameadi mwoamu eeyiida.

¹⁰ Ninyeeda inyeesa ghwanung' gwaroobassa roopta badayda ng'eanyiida, nea ghwanung' gaweay beega jeeda madameega.

¹¹ Nea inyeesa goodiing'u fuga ng'arng'ari, nea ghwanung' gaba seayu gea gutu heareega.

¹² Niny inyeesa ghwayam ng'asheega fuga ng'uyeega, ak ea masina geatinga nyaawa ng'asheega sigasa sinooda.

¹³ Nea inyeesa ghaghas fuga mideawa weaghuumeeda aba milmilanda nyaawa, nea ghwadatas ng'asheega dawdaaw fuga milmili.

¹⁴ Saawa inyeesa ghwadaah misaneeda askweari nea iibwarbwara aseeta gawa nea ghoahaakhaakta geatinga gawuurji eawa.

¹⁵ Ak ASEETA gayghoaghu bananga ea meabwara, nea gageandeawa fuga barbari geatinga fuga mideawa uurjeenga.

¹⁶ Asi siida bwarbwar gwandeawa rarooda, ak ng'asheega munyas gajeanung' goosha.

¹⁷ “Ng'ula ghang'wana siidida awoowsa ASEETEAN, asi adifooli ASEETA hoauur awoowseey.

¹⁸ Aba gideaba niny inyeesa gwasawan siida, ak ghoaleakghleakgh, niny inyeesa ghwayiin deaneadeeda ak ghoahaap aba geatindaanyi.

¹⁹ Niny gayghaweadaneey sawanaduut lah, ak deaba ispwa ea manda gidamuy jea ghwasanyi.

²⁰ Damanda geejeeda gayghoaghuuhaneey miyeeda, nea aba jeeda ng'ucheeda gayghoaghuuhaneey ng'uta.

²¹ Gajeefunyaneey bayiiga ng'ushapta, nea adiiwali nyariida jea ghwahidu.

²² Gaybareewana reari nyariida jea ghwahidu bea geejeeda, nea mwajawala diyeanga ng'weani bea jarooda.

²³ Ak gajaheeleena sea lagheaneeda mida madamnyeanda, nea eara diyeanga mida jeeda madamnyeanda ea mayghwasanyi.

²⁴ Ak gaydaaha gheang'u nea gaba seayu, nea gaysikteawana haleanjeadaang'u ak gaydaaha gwanda sean.

²⁵ Nea gaydaaha jeacheangaagu gayghwasaang'ayiit seang'aydaanyi gaygwadeena nyeega badayda ng'eanyiida.

²⁶ Gaymeawa nea niwaasiidi nea guwoosi doabiiwaat, gawuurji muschoonyeanda booga iihita damanda lajooda.

²⁷ Ng'ula suh sisikteawi, ak ea giduurji gil aleaydiit, ak ginali, ak ginyasi gea miyaas.”