AYUBU 42 - Bibliyeeda Ghaydit

¹ Hean ghwasha Ayubu ghuuta NG'UTAMIIDA nea gwayeesha:

Ayubu

² “Ghaanali gideaba giimuusi sina haleanjeeda sean nea gidigasayi sinooda ea manda siida jea ghoadeal.

³ ‘Siisi fuy girgweaksiindean nea mandeawana fughareeda ng'eaha?’ Aba gideaba gearugu ng'asheega mwaanali, ng'asheega deamdeameadi joaran ak ea mwaanali.

⁴ ‘Aleaydiit, ak gaydabalool, ak gaydaanyaashnyi ng'ashaan, ak gishahi.’

⁵ Ghayi naayiinyi iitaang'u aba iita ak ghwahit, ak ghamneawa ghaadaayeeyi aba gheanyangeasu.

⁶ Ak ghamneawa geaduukuuni nea ghaayeashi geaw birjeanda ea deareeda, ak ghaadaayi aniini geawooschi gidamwadaagha.”

Huuydeanda

⁷ Hean nea ghoahiit NG'UTAMIIDA balooldeaba ng'asheesu aba heeda Ayubu, ghwalamda NG'UTAMIIDA ak gwayeesha Elifasi bea Demani, “Naanyareekseey muuchi, ea fiisu asiyeenya iduupcheewiin aba gideaba agooga mii arukuta ng'asheega huumwa bea badaydeanyu, gawuurji gidarukuteayda Ayubu was siideanyu bea gadiyeeda.

⁸ Asi ageani jiiru ispwa, ea lagweendi ispwa, ak gooweesi siideanyu bea gadiyeeda was Ayubu, nea gooyeasi haleanjeeda sisabwa geadi bea ghadooweeda sighwarda; ak abeeda Ayubu was siideanyu bea gadiyeeda gayghamwaash aseeta, ak abeeda gaydealeeysa niny iit, ea measimaneegwa giduurji leendeedeang'wa, aba gideaba agooga mii arukuni ng'asheega doobiiweadi aba badaydeanyu, gawuurji gidarukuteayda Ayubu was siideanyu bea gadiyeeda.”

⁹ Hean gawa Elifaseedida bea Demani, ea Bildadeedida bea Shuhiin ea Sofaredida bea Naamatiin, ak gaweay ak gwasinda gidarukuteayda NG'UTAMIIDA, hean ghamwas NG'UTAMIIDA mooshta Ayubu.

¹⁰ Ng'ata ghwanung' NG'UTAMIIDA gamnyeeni Ayubu, nea nimusiicheesa fugaaschi duupchi; hean ghoadaw NG'UTAMIIDA Ayubu haleanjeeda niba iyeenya ea gaburdeawa gea mideawa bea mwadi.

¹¹ Hean gaweesa niny orjooga sean bea ghaamwat ea haweega ghaamwat, ea fuga sean nal niny aba mwadi. Ak gambuuchi sea niny aba gheanyi ak geegeandeawa salgheang'da niny aba sawanaduutka sean munyas eassa NG'UTAMIIDA niny, ak saawa gaba nih adaw niny lapiyeeni ng'ay ea ghuniida sisina dahaabu.

¹² Ng'ata ghoadaw NG'UTAMIIDA Ayubu ghawooda aba giibindaanyi ea ghwanaawa diita bea mwadiin. Ak gaba gisil sagalamnyooji damanang'wan, ea ngamiyaji sagalamnyooji lah, ea duu sagalam ea digeen sagalam.

¹³ Ak gwandeawa orju ispwa ea hawu samwagu

¹⁴ Ak hudaanyi was duweacheeda gaguura gheawungaaschi Yemima, nea dea bwat badayda gaguura Gesiya, ak niirja gaguura Geren-hapuku.

¹⁵ Nea aba jeedeaba ng'eanyiita seaniin ea manda gadeemga miyaasiin uurji haweega Ayubu. Ak ghoadaw ghwaan saawa hearaniischooda aba bugusta orjooga ghwaan.

¹⁶ Hean iing'ata ng'asheesu goobiida Ayubu badayda ng'eanyiida gweanyeew bughala ea haradam, ea ghwadaah diibigaaschi ea diibigeaba gaaschi ea ghwahita seaygooji ang'wan.

¹⁷ Ng'ata ghami Ayubu nea niiw gweargweeda nea gaba gweanyeeka saang'a.