AYUBU 41 - Bibliyeeda Ghaydit

¹ “Heapi ang'iing'i giimuusi lealni hagiireeda haw aba sidageeda ghwana ghaang'i? Ghana rada ng'ushaptaanyi aba mareamarooda?

² Ak gajamuusa iina mareamarooda sareadaanyi, ghana saawa gharoosheadaanyi aba sidageeda?

³ Heapi gaygamearmearani muuchi ghana jea gwarukuneey ng'asheega aba garbabanda.

⁴ Ak gaygwasin neajeeda sea ang'iing'i, geanda nung' ghoah siidaang'u bea gadiyeeda damanda manda muudeanooda?

⁵ Gajadanghanda niny giliwas dariideanda, ghana rada niny aba badayda haweagaagu?

⁶ Fuga lealu ghweayeega gaygoogeaksheesa niny, gayghwalach niny sea fuga ageakshachi?

⁷ Ak gajamuusa ng'uda mughoowooda saseadaanyi aba ng'uta? Ghana uhuudaanyi aba sidageeda silealuuna ghweayeega.

⁸ Iina geatingaagu uhuudaanyi, apkaada ng'ucheedida, ak ea adigudibiikti gicha.

⁹ Ng'ula rarooda siida marachi gil, heapi maygafta ng'eanyi dea ng'ula niny.

¹⁰ Manda dea ng'waan jea gabadaksa ak ghwaheat asi ghoamu ng'eaha ghamiinaada aba madeedeanyu?

¹¹ Dea asheeda gagoonan gida ng'eaha? Ak gaydeadeelsa, haleanjeeda sean mida hing'eadayda humng'eeda geasu sean.

¹² “Maydasiinda rukunooda iita roobuutkaaschi, ghana uurdaanyi haw, ghana leangaaschi miyaas.

¹³ Ghoamu ng'eaha ghafwaar mughoowoadaanyi aba bwadaw? Ghana ghoamu ng'eaha ghwasaaw mughoowoadaanyi hang'waay?

¹⁴ Ak ghoamu ng'eaha ghwajaat gidaghuudajeega mida madeadaanyi, geeshatkaachi mida meadajeega sean ghang'uda buuneeda muuwda.

¹⁵ Mughoowoadaanyi hang'waay miyeenoadaanyi gil, ghwanoas geat sean ea gawuurji gilisiinoas aba giirooraneeda.

¹⁶ Gidanoasta geat, eara jeameeda maygwasik bugusta nyaawa.

¹⁷ Nirat geat duwaawi, ak ghoang'waay geat nea majeamu eeheeli.

¹⁸ Iyatirshean gwardu weeshinda, gheanyangaaschi ghameang'meang' ea gawuurji aseeta arearu.

¹⁹ Ak gwarina ghuutaanyi beasta yeat, nea gwarina ghuutaanyi rarayga beasta.

²⁰ Nea gwarina aroosta jeeda sareenuukaaschi nea gawuurji dahuuda lalach ea nyeega yeat.

²¹ Giisiimeandaanyi ghwanung' ghwayeat rarayga, nea ghuutaanyi gwarina ng'ushapta beasta.

²² Gheataanyi gwandeawa uurda muuchi, siida nyooh ghwadaah ghang'ut muuwda.

²³ Mayiishka banyeagaaschi ghwanoas geat sean, ak ea majeekta gharinyeanda nea maduumduuma.

²⁴ Ak gurooroadaanyi ea majeekta gharinyeanda, ea majeekta lagheaneeda sing'ealiida.

²⁵ Nea iing'eat ghang'ut muuwda maleambajeega nea aba giyoonda, ghwanyar jeesinga nyaawa.

²⁶ Ak ea manda ng'uta jea gwasawan, ghana ng'uta, ghana geacheeda, ghana jilooyeanda.

²⁷ Niny inyeesa gharinyeanda ghwanung' gawuurji nyeeshtooda, nea gharinyeanda oomu gawuurji geeta ghajaamiit.

²⁸ Geacheeda mayghwanung' ghafwach niny, nea lagheanga mida jeeda makeambooda aba niny gawuurji looyda.

²⁹ Nea gulupkeaka ghwanung' gawuurji mbarariida inyeesa ghwaak reari iisijaksa jilooyeeka.

³⁰ Mughoowooda jeadaanyi gawuurji lalang'weega ng'aniibi ghuusi, inyeesa ghabwat muunda gawuurji dabicheanda jea eelaksa booga aba badayda sheang'weeda.

³¹ Basooda ghwaduumduumda beega lalach, inyeesa ghwanung' gwardu furghooda gawuurji jupajeanda nagheeda.

³² Murdeadaanyi gwanda weeshinda nea iisidaah geaghay gideaba beega sheagi jih oar furghooda eashish.

³³ Nea aba badayda ng'eanyiida ea manda dea uurji niny, niny mandeawana muuwda.

³⁴ Niny inyeesa gang'ula haleanjeeda sean mida humng'eeda, nea niny ea sugoocheanda orjooga saang'a mideawa ghwarjeeda.”