AYUBU 4 - Bibliyeeda Ghaydit

Baloolda madeeda

¹ Hean ghwasha ghuuta Ayubu Elifaseeda Demani nea gwayeesha.

² “Heapi, iigasa siida goobaloolnyi gajea muy? gajea ng'eaha dea jea ghwasiinda ea mabaloola?

³ Ng'ula, ang'iing'i niinaali fuga saang'a nea giimajeegi geatinga fuga ng'arng'ari.

⁴ Ng'asheagaagu ninung' ghang'eat ng'eat gea gwachi nibur iheenga, ak ea niimajeegi gea niisha uurjeenga.

⁵ Ak ghamneawa ea niibiseey ng'asheesu, ak gaygabur uhuudaang'u, ak ea nisanyi ak gihirbibani.

⁶ Heapi gheawalmeeda ASEETA mii gida irari? Nea doobiiwnataang'u ea mii gidighusi?

⁷ “Ateemsheena muuchi, ng'eaha gil siida mandeawana giidiinyeanda ak ea silas uhuuda, ghana fuga doobiiweadi ghwang'wa eehista?

⁸ Aba gida aadaakti aniini, fuga hista gea munyas, ea munyinda, gayghwalach suh.

⁹ Ak suh gayghwalas ASEETA aba Giisiimeandaanyi, nea suh gajeenung' goosha aba lasooda aba nyarastaanyi.

¹⁰ Fuga munyas searooji ghoamuumda ng'adiida ng'waan, ak geeshatka nyaawa gajeehirjeawi.

¹¹ Ng'adiida waas gayghami ii mwanyasa banyeega, ak dayeega soorearda gayghwadarda.

¹² “Ghayi eaweecha geerukunean ng'asheanda aba makcheameeda, ak ghwayiiy iiteanyu meang'shoadaanyi.

¹³ Nea abeeda geandi jeeda giirgweatkeaba eawa, nea abeeda buuneeda gwanda jeeda ruweanga saang'a.

¹⁴ Ak ghang'udan muuwda ea daboadan, nea ghwanung' ghaboadan geakeasu sean.

¹⁵ Ak gwasik madeedeanyu jeameeda ak ghwanung' ghang'eatng'eat buudeega uhuudeanyu.

¹⁶ Hean ghamiinaada gida mwaanali aba madeedeanyu nea gwayi saw, ak gawuurji gil aba madeedeanyu nea gwayi saw, ak ghaayiinyi ghuuta nea gwayi.

¹⁷ ‘Heapi siida gaygwandeawa doobiiwnata ea ghang'al ASEETA? Heapi siida gayghamiidu ea ghang'al ASEATAANYI?

¹⁸ Ng'ula niny makghusa fugaaschi bea gadiyeeda, nea eara malaykajeagaaschi gwayiitiisa ghwanyas ramaseanyeeka nyaawa.

¹⁹ Heapi mang'wana muuchi suh abiita jeeda gealga sisna sheang'weedean saawa ghayi gwaleabu jeeda sigeeda ak gajeegulgulda gharinyeanda.

²⁰ Siida gajeanung' goosha aba gheadi nuwaas, ak gaygoosha damanda manda muudeanooda, nea mwajeanung'wa heeda eara giirooraneeda nyaawa.

²¹ Iisilach mareamarooda ang'waay eaweega nyaawa, abeeda saawa gaygameewa nea mandeawana weaghuumeeda.’