AYUBU 38 - Bibliyeeda Ghaydit

Ng'utamiida ghwasha ghuuta Ayubu

¹ Ng'ata ghwasha NG'UTAMIIDA ghuuta Ayubu aba shaarara nea gwayeesha:

Ng'utamiida

² “Siisi ng'eaha datas ng'asheegeasuun aba ng'asheega manda fughareeda?

³ Asi amajeega geaw uurjeewana ng'eedeeda, aba gideaba gaydaanyaashnyi ng'asheanda ak gayshaaha.

⁴ “Ghayi gindi yeenu damanda aayiini sindeeta ng'eanyiidean? Asi rukuni iindeawi fughareeda.

⁵ Siida iin haleanjeeda siiteeniida ng'eaha heapi ginali? Ghana dea asiik mareamarooda badaydaanyi ng'eaha?

⁶ Sindeataanyi geayiin uhuumba naaha? ak lagheaneadaanyi washiin ghwayiin ng'eaha?

⁷ Damanda sarmana miinga sean bea sakteayda, nea goojuur orjooga sean bea ASEETA aba hooseaneega.

⁸ “Ghana ghoamu ng'eaha ghwaadeal beega gulna basooda aba gidaghuudajeega damanda gulna nea gwaleabu uuta basooda.

⁹ Aniini geadukuti basooda aba shamooghuutka, ak geaneaweesi misaneeda haw.

¹⁰ Ak basooda ghaayiinyi moonghooda, ak ghaarachi gidaghuuta aba gharinga sirata gidaghuudajeega.

¹¹ Hean geayeeshi ‘gaybiikteawana hiji maysuuda, laweajajeagaagu mideawa uurda gaygabiikteawa hiji’?

¹² “Heapi dea ghayi sijiilaneey ninung' goorearu aseeta? Nea ghwanal heechea goorearna.

¹³ Nea aba uurdaanyi ghoang'waay muudeanooda ng'eanyiida, nea geang'aamwa fuga munyas badayda ng'eanyiida.

¹⁴ Ak ghwayamwa oormeadaanyi gawuurji sigeeda mida hing'eadayda giirooraneeda, nea haleanjeeda sean gwardu nea gawuurji eaghwada.

¹⁵ Nea fuga munyas majeanung' ghwanyas gheaboong'nyeanda nyaawa ak geatinda ahaakta ghabwar buuneeda gaygagiinya.

¹⁶ “Heapi nihiti jeeda gheanyanga eenda bea basooda, ghana nineayi aba jeeda basooda?

¹⁷ Ghana ghoang'wa ea siihiimu gidaghuuta miyeeda, ghana nidaahi gidaghuuta heeda misana muuchi?

¹⁸ Heapi ginali giteena hawunda ng'eanyiida rukuni heapi iinali suh seaniin?

¹⁹ “Gwanda yeenu naweeda weah heeda mida weeshinda, nea misaneeda earada gwanda yeenu.

²⁰ Ak giyaadi ea ahiita heeda abiita, nea ginali naweeda jea gawa gheanyi.

²¹ Aba huumwa ginali gideaba geejiilnyi damandida, ak mooneeda eawoojigaagu aasaang'a.

²² “Heapi ghoang'wa una jeeda gheeda siitiiwiisa haleanjeeda bea gapkeanda ghana ghoang'wa daaha gheeda siitiiwiisa haleanjeeda bea lagheanga roopta,

²³ ghayi geadiiwji aba damanda sawanadeeda, aba eaweeda bearjeeda ea ng'ucheeda?

²⁴ Naweeda jea gawa heeda sigwaliisa weeshinda gwanda yeenu ghana heeda leabu jeameeda heeda ghayeawa ak geetearsa badayda ng'eanyiida.

²⁵ “Gwasin ng'eaha naweeda jea gwaleabu beega aba humng'eeda, ak goohiimsa ng'eaha dadamandeeda naweadaanyi aba jeeda shamooghuutka.

²⁶ Ak gweadu roopta ng'eanyiida manda sih ea eeshtearajeanda moobiiteena sih.

²⁷ Ak ghwanung' ghamiidu ng'eanyiida ghajaam was raghoonyeanda, nea ghwanung' gwardu nyeega?

²⁸ “Heapi roopta gwanda ghwaani, ghana rahooda gwajiilu ng'eaha?

²⁹ Lagheanga roopta gwarina jeedeabeang'a, ak gapkeanda humng'eeda gwajiilu ng'eaha?

³⁰ Beega inyeesa ghwayamwa gahang'oonyiidi ea gawuurji lagheaneeda, nea beega sheagi jih ghwanoas geat aba gooroogeeda.

³¹ “Heapi gajamuusa rada aba munyaloali, miing'weanda siguura Gilimiya, ghana abealbeala ghealooda miing'weanda siguura Oriyoni?

³² Ak gajamuusa adoabiiwa miing'weanda aba damandaanyi, ghana adoabiiwa Idamooda ea dayeagaaschi?

³³ Heapi ginali deaweedajeega mida humng'eeda? Gajamuusa ng'aabwa gheambalmeadaanyi aba badayda ng'eanyiida?

³⁴ “Gajamuusa ajuura ea ghwahita ghuutaang'u shamooghuutka, ak gwadukutaneey shamooghooda beega?

³⁵ Gajamuusa ajeakta dadamandeeda ak gawa, ak gabiigu ak gwayi ‘Geandi hiji?’

³⁶ Ghwayiin ng'eaha weaghuumeeda jeeda shamooghuutka ak ghwaroabwan, ghana nalooda jeeda gurooruunatka ghoadaw ng'eaha?

³⁷ Ghoamu ng'eaha gwayiida shamooghuutka aba weaghuumeeda, ghana goobiimbiin ghadeatka mida beega aba humng'eeda.

³⁸ Gideaba ghwanoas geat birjeanda badayda ng'eanyiida ea sigeeda ak ghoah sheang'weeda.

³⁹ “Heapi gaybarsiina shageata ng'adiida was soorearda ghana gajalang'uuda dayeega ng'adiida.

⁴⁰ Damanda funyeewa geat aba jeeda gwaleadinga nyaawa, nea gwalil aba heeda funya geat ak goorgweadi.

⁴¹ Ak udaghuw ghoadaw ng'eaha hamitaanyi ii ayeawusa dayeagaaschi ASEETA, ak gootkwealsa hoowa ea hoowa aba gideaba niisheala gichea ghwaak?