AYUBU 37 - Bibliyeeda Ghaydit

¹ “Gurooroodeanyu eara ada ghaboadan ak ghang'amwa heeda mida.

² Oaleaydiit giijuureanda ghuutaanyi, ea nyeashta leabu ghuutaanyi.

³ Niny inyeesa goojeakta ghoadaarda aba hing'eadayda sean bea ng'eanyiida, nea dadamandeadaanyi gawa ea ghwahita meadajeega sean bea ng'eanyiida.

⁴ Iidu ghwanya nyeashta ghuuta, niny ghwanya nyeashta ghuuta hawundaanyi, ghuutaanyi iisiyiiy ea mwajeateal.

⁵ ASEETA ghwanya nyeashta ak geaham ng'eanyi aba ghuutaanyi, inyeesa gwasin ng'asheega hees majeamuusa eanala.

⁶ Aba gideaba gwayeesha ‘gapkeanda ng'adeesiina badayda ng'eanyiida’; nea eara shishihandeeda ea roopta ‘roobasiina muuchi.’

⁷ Ak ghwarat gadiyoojiga buuneesean, ak ghwanal buuneeda gadiyeadaanyi.

⁸ Hean diyeanga jarooda gabiikta heeda funyiisa geat, ak goobiida jeeda gwaleeda nyaawa.

⁹ Siilakghta gwaleabu jeeda ghoorajeagaaschi, nea jeameeda gwaleabu jeeda gijigoadaanyi.

¹⁰ Lagheanga roopta giisiimeanda ASEETA, ak gabean ghoanoas geat beega.

¹¹ Ak ASEETA ghoanyiit shamooghuutka beega saang'a nea shamooghooda ghoadaarda dadamandeadaanyi.

¹² Ak niny inyeesa googeal haleanjeeda hoowa ea hoowa, aba gida adoabiiwda niny ak geesin sean gea jea gwarugu aba badaydeaba ng'eanyiini abiita buuneedean.

¹³ ASEETA inyeesa gwasin gidagasiida aba badayda ng'eanyiida, ii lasooda uhuuda buuneeda gil, ghana goohiimsa saawa bariinyeagaaschi.

¹⁴ “Aleaydiit ng'asheanji, Ea Ayubu, miinaada ak gisiindi; ak giiteemsheesi gadiyoojiga deamdeameadi bea ASEETA.

¹⁵ Heapi ang'iing'i ginali gida adaydaayda ASEETA diigheandaanyi ak ghwanung' ghoabwaay dadamandeeda shamooghuutkaaschi?

¹⁶ Heapi ang'iing'i ginali gidasinung' goopteadayda shamooghuutka aba humng'eeda, nih gadiyeeda daamdaamwaat gil bea dea doabiiwaat mideawa fughareeda.

¹⁷ Gidashang'shang'da hang'weakaagu damanda ayi ng'eanyiida saw aba jeameeda wiilooda ng'eanyiida biyeara?

¹⁸ Heapi gajamuusa bwada humng'eeda uurjeewana niny, ak ea majeek ea gawuurji giyooyda sisina gharinyeanda oomu?

¹⁹ Anaaleasa ng'asheanda jea eerukusiina ASEETA, aba gideaba iheengaasa mwajaada.

²⁰ Gaygabadaksa ng'eaha niny gwayeesha geagasayi dabalool, gaygwarukuta ng'eaha ak ghwanyas habitkweeda.

²¹ “Ak ghamneawa buuneeda ea moamu gang'ula weeshinda aboong'u aba humng'eeda, nea iing'ata jeameeda goohuun saawa.

²² Wiilooda ng'eanyiida ghayeawa gwarina weeshinda miy, ASEETA gwaneaweesa gharbeeda ng'waan.

²³ ASEETA haw uuri manda siida jea gwaneekiisa heeda, giimuusta ea doobiiwnataanyi ea haw ak gwandeawa alooheeda haw, nea maygahuta gitoobiiwsa siida earahay.

²⁴ Asi buuneeda ghoawal niny, ak niny ea maduupa siida was sean mideawa weaghuumeeda.”