AYUBU 33 - Bibliyeeda Ghaydit

¹ “Asi ghamneawa, aleeysiina iit ng'asheegeasu, ea Ayubu, ak giyiinyi ng'asheegeasu sean.

² Ng'ula, ghaajaachi ghuuteanyu; ak gabalool ng'ushapteanyu.

³ Ng'asheegeasu gaygwargu doobiiwnata gurooroodeanyu, nea gida nal muuchka ghuuteanyu gaygwargu nea ghoadoabiiw.

⁴ Aniini ghabwadan guroorooda ASEETA, nea aroosta ASEETA gagoonan eaweega.

⁵ Asi shaaha, iimuusi; jiba ng'asheagaagu muuchi aba madeedeanyu; ak gimiinaadi.

⁶ Ng'ula, aniini geandi madeeda ASEETA geawuurjeewi gida iwuurjeewi ang'iing'i; eara aniini geesinanean sigeeda.

⁷ Ng'ula, asi manda gichea awalsean; nea ng'asheegeasu durumani ea mayghabwaanyi.

⁸ “Aba huumwa, nirukusi ng'asheega jeeda iidigeasu, ak ea naayiinyi ghuuta ng'asheagaagu.

⁹ Ak giyeeni, ‘Aniini geawooschi miy, mandanean giidiinyeanda; aniini geawooschi doabiiwaat, ak ea manda jeedeanyu gidamuy.

¹⁰ Ng'ula, ASEETA gagasa ng'asheega jea ghabwaranaan, ak ghwanung' dawuurji weajoocheandaanyi;

¹¹ ak ghwarat geeshangaagu aba munyaloalajeega nea gwasikteawa naweadingeasu sean’.

¹² “Ng'ula, aba ng'asheanji muwoosi doabiiwaat. Gaydasha ghuutaang'u. ASEETA aahaw ea ghang'al siida.

¹³ Abeeda ghwasaan inyas ging'alealeewi niny, nea giyeeni, ‘Mayghwasha ng'asheanjagi aba jeeda ng'asheegeasu’?

¹⁴ Aba gideaba ASEETA iissa gabalool aba naweanagi, ghana nawa nuut ak ea mwanala siida.

¹⁵ Aba jeeda giirgweatka, aba gisiihiimsa siida eawa, damanda abisiina buuneeda ruweanga ng'weani, nea gwalil aba badahuuka bulaleenga nyaawa,

¹⁶ hean ghwajaat iidiga buuneeda, ak ghang'uda muuwda aba miinda gheang'da,

¹⁷ ak ghwasach siida aba jeeda gadiyoojigaaschi sina, ak ghwasha ghwarjeeda aba heeda siida;

¹⁸ niny iissa ghoadeal gurooroadaanyi ea mawa jeeda shoomanda nea measha eaweagaaschi aba ng'uta.

¹⁹ “Siida eara niny ghoang'waay eala sawanadeeda jea ghwanung' gwalil aba badayda bulaliidaanyi, ea ng'alealeada measha aba galeaga sean aba jeeda geakaaschi;

²⁰ eara gurooroadaanyi ghwasit hamita nea gurooroadaanyi ghwasit hamita miy.

²¹ Ak gwarip saseadaanyi ak ea meadaaha; nea geakaaschi ghayi giiwiimwaat gwardu jarooda.

²² Nea gurooroadaanyi gwaneekiisa shoomanda, ak gwaneekiisa eaweagaaschi fuga eatu miyeeda.

²³ Ama deepa gwanda malaykajeanda mideayi sea niny was dea aduuptooschi buuneeda, asagi aba jeeda sagalama, ak goohiimsa siida ng'asheesu miisa;

²⁴ ama ng'ata ghabwayda, ak gwayi, ‘Lealni adaghoabita jeeda shoomanda, aniini naawaldi leadeeda aba badaydaanyi;

²⁵ ak biyeeyda saseadaanyi gajea bumbun ea ghang'al dea baleanda mwanang'’; ak gabiiksa askwearjoojiga gheareemaneanduumeadaanyi’;

²⁶ siida ghamwaash ASEETA ak ghamwas gida mwaash siida, ak ghwahidu madeadaanyi nea gahoosan ak ghoadaw siida lealeanoadaanyi,

²⁷ niny iissa gwasarman aba madeeda buuneeda, nea gwayi: ‘Aniini neasinyi riing'eeda, ak ghaanung' ghwaschoarda ng'asheega doobiiweadi, ak ea meawala ng'asheanji aba heedeanyu.

²⁸ Niny nilealu gurooroodeanyu ea mawa jeeda shoomanda, ak eaweegeasu gayghwadaah weeshinda’.

²⁹ “Ng'ula, ASEETA gwasin ng'asheesu seaniin, nibiyeenya, niba samwagu, aba heeda siida,

³⁰ ak goodeelna gurooroadaanyi jeeda shoomanda, ak abeeda ghwadaah weeshinda eaweega.

³¹ Ea Ayubu, aleeysean iit; siinda, gaydabalool.

³² Ii mida ng'asheanda jea rukuni, gishaahi ghuuteanyu; baloola, geagasayi dagoonyi doobiiwnata.

³³ Ama maweeda, giileeysean iit aniini; siinda, ak gaydaanaalnyi weaghuumeeda.”