AYUBU 27 - Bibliyeeda Ghaydit

Ayubu

¹ Ng'ata gwarugu gicha Ayubu ghwasiildeangaaschi, nea gwayi:

² “Aba gida abiideata ASEETA, was dea geanda gitoobiiwsean, ea ASEETA hoauur, nung' gwasawana gurooroodeanyu;

³ aba gideaba eaweegeasu gudu ea majeek aba jeedeanyu, nea guroorooda ASEETA ea gudugwanda jeedeanyu;

⁴ aba huumwa ghuuteanyu maygwargu ng'asheega ng'uyeega ak ng'ushapteanyu ea maygwargu reengaweega.

⁵ Gagasa gwasheagiidanean gideaba gaydargu gideaba goowooschi doobiiweadi; bwak ea dami maydanung'waada doobiiwnateanyu.

⁶ Gitoobiiwsean ghaang'waanyi muuchi, ak ea maydanung'waada; gurooroodeanyu maygwanyareeksean aba jeeda eaweegeasu wassean.

⁷ “Gagasa gawuurji weajoocheandeanyu siida riing'eeda, nea gawuurji siida eang'ucheewi dea mii doabiiwaat.

⁸ Siida mabata ASEETA ghaghus naaha earapeadi nyagaadaan, damanda geandeawa ASEETA gurooroadaanyi?

⁹ Heapi gayghwayiiy ASEETA shookcheandaanyi, iinyas sawanadeeda?

¹⁰ Heapi niny gaygoohoosana geaw ASEETA mideawa uurda mayghoamu goomajeek mooshta ASEETA damanyoojiga seani?

¹¹ Gaydaanaaleagwa agooga ng'asheega geatinda ASEETA giduurji; ng'asheega ASEETA hoauur maydafuy.

¹² Ng'ula, agooga noadaayi oogasean ng'asheesu; abeeda ghwasaan inyas goomunyasiidayi muuchi?

Sofari

¹³ “Nih gichea ghwanya siida muy gil aba heeda ASEETA, ea hearaniischooda fuga sawani fih jea ghwanyas aba heeda ASEETA hoauur.

¹⁴ Nea iyahaada diibigaaschi, gajeabwar aba ng'uta; ak jeataanyi ea maygwalang'u aba hamita.

¹⁵ Nea giika jea ghaghuun gayghabwar geeyooda muy, ak masiinung'weega nyaawa ea maygooyeawusa.

¹⁶ Ak eara ghoawaam lapiya ea gwadeena birjeanda, ak ghoamughuush hang'weaka gawuurji dulgwajeanda;

¹⁷ ak eara ghoamughuush gaygookwa fuga doobiiweadi, ak fuga manda giidiinyeanda gaygwalaja lapiyeeni.

¹⁸ Niny iissa ghwadeas gheeda uurji dea uliptooda, ak gawuurji meandiida sin furiischoocheanda.

¹⁹ Niny iissa gwalil nea meanang'oocheanda, ak ea maygudu gabiikta gwasin; ak ghwajaat gheanyangaaschi ak ea niisha baruureagaaschi.

²⁰ Nea ghwaata muuwda niny gili aat guldeayda; nea eawa ghwaat niny shaarara.

²¹ Niny iissa ghwaat jeameeda heeda ghayeawa ak gawa; ak gageandeawa niny hoorgeeda abiita.

²² Neada ASEETA gaygwajaksa ng'eanyi ak ea mabwayda; gaygamng'awa uurdaanyi ak ea maygwarachi gil ng'weagaaschi.

²³ Gayghabwar buuneeda baneaguuka nyaawa aba niny, nea geejuuga gwarina hoorgeeda abiita.