AYUBU 26 - Bibliyeeda Ghaydit

Ayubu

¹ Ng'ata ghwasha Ayubu ak gwayeesha:

² “Giweatiin siida mandeawana uurda! Giweatiin geatinda mandeawana uurda!

³ Aba gidirgweaksiindi siida mandeawana weaghuumeedean, ak giidawi fughareadaang'u!

⁴ Ak ng'asheesu aba uurdeabeang'a, ak nih ea gurooroodeabeang'a gil dea rinna jeadaang'u?

Bildadi

⁵ Maloonghajeega mida uuta ng'eanyiida ghaboadan; beega mida ng'eanyi ea fuga mideawa nibeal.

⁶ Gheeda maloonghajeega ghoabwara ghuut aba madeeda ASEETA, nea Abadoni ea manda gidawiim.

⁷ Ak ghoadoabiiw wiilooda ng'eanyiida ghayeawa aba heeda manda gil, ak ghaghasta ng'eanyiida aba heeda manda gil.

⁸ Ak gwarasa beega jeesinga shamooghuutkaaschi durumani, nea shamooghuutsu ea mwabwaasha aba durumanataanyi.

⁹ Iissa gwadukuta gheamamda sheeda, ak gookwealsa badayda shamooghoadaanyi.

¹⁰ Ak ghang'oar giirooraneeda aba badayda beega ak gwasin moonghooda aba dageascheeda weeshinda ea misaneeda.

¹¹ Daranajeega humng'eeda ghwaleakghleakgh, ak ghahamng'eanyi aba giireekusiinda saawa.

¹² Iissa ghwanung' gwajaku basooda laweajajeega aba uurdaanyi; ak ghoang'uunda ng'eanyi Rahabu aba fughareadaanyi.

¹³ Nea aba aroosta ghuutaanyi ghwanung' gaweeshiit humng'eeda; geatindaanyi ning'ut ichibooda deambiiri.

¹⁴ Asi, suh ng'asheega mwaatkwa gil bea naweadingaaschi; ea gidamanang'iida ng'asheega siyiinyi aba badaydaanyi! Ak ea ng'eaha siida ammu ghwanal nyeashta uurdaanyi?”