AYUBU 20 - Bibliyeeda Ghaydit

Sofari

¹ Hean ghwalamda Sofari bea eemeeda Naamati ak gwayeesha:

² “Asi giiteemshoodeanyu gagu gidaanyaashti, aba jirjireega mida jeedeanyu.

³ Naayiinyi reekusiinda mwammuusi damilikghta, ak gagutgutanean fughareedeanyu dasha ghuuta.

⁴ Heapi ang'iing'i ng'asheanji minali ghang'eada ghayi garayi, ghang'eada damanda ghayi siyiina buuneeda badayda ng'eanyiida.

⁵ Ak hooseaneega fuga munyas gaba gheadi nuwaas, nea ghweelmeeda roodaweega gaba gheadi nuwaas muuchi.

⁶ Geawundaanyi eara gawa ea ghwahita humng'eeda, nea ghwahita uhuudaanyi shamooghuutka.

⁷ Ak gajealas uhuuda damanda manda muudeanooda, gawuurji fiyeagaaschi, nea fugiga ghayi daahiin gajeeyi ‘gwanda yeenu?’

⁸ Gayghwaroata giirgweatka ak ea maygudu eadaah, gaygooshealda gisiihiimu bea eawa.

⁹ Dea ghayi nidaah maygutghwadaah nea eara heeda ghayi abiita may gudu eanal.

¹⁰ Niny gayghoadealda haleanjeadaanyi sean, nea diibigaaschi gaygamus baydeayda aba heeda fuga barbari.

¹¹ Earapeadi daah geaw gideaba gwandeawa uurda gheareemaneanduumeeda, ak gaygwalil sean sea niny aba jeeda sigeeda.

¹² “Nea ng'asheega munyas ea inya aba ghuutaanyi ak ghafuy aba hing'eadayda ng'ushaptaanyi.

¹³ Ak ea magasa gwasiksa, ak goong'ooysa ghuutaanyi.

¹⁴ Nea hamitaanyi ii weay jih ghwayamwa ak ghang'waaniit, ak ghang'waaniit ea gawuurji furooda ichibooda.

¹⁵ Ghwanukghuta meanang'oocheanduumeeda, ak gaygakeesu gicha, ak gaygooruuna ASEETA jeadaanyi.

¹⁶ Siida muy gwareer furooda ichibooda, ak gayghaghanya ichibooda ak ghami.

¹⁷ Ak ea maygang'ula eenisu bea beegean, ea ghealooniga nyiit maleeda ea nagheeda.

¹⁸ Nea mayghwanyas haghweega gheawoocheandaanyi, ak ea maygahoosasa haleanjeeda ghayi sin.

¹⁹ Aba gideaba nighabwas nea ghwanung'wa heeda fuga barbari, ak ea niireat gheeda aba ghwarjeeda nea ghayi ea mwadeasa.

²⁰ “Aba gideaba mii ghoanaal siindeayda aba jeadaanyi, nea manda gida wassean jea ghaweat aba jeedeaba nih hoosassean.

²¹ Nea manda gida niibit iyahiit agiischooda, ak nyageadaydaanyi ea mayghwashng'u.

²² Inyas ghwanyiit muuchi abeeda gaygwanda jeeda sawanadeeda, nea gaygoobisa niny habitkweeda.

²³ Nea inyas ghwanyiit jeadaanyi abeeda ASEETA gaygwajaksa ng'weaninda nyarastaanyi, ak gooreemsa nea ghoah hamitaanyi.

²⁴ Damanda mang'awa aba ng'uta gharinyeanda, hean ghang'ut niny geacheeda oomu.

²⁵ Niny gooruudu nea gwarina jeeda saseadaanyi, asaha ghuuta meeng'meeng'i gwarina jeeda gidang'weandaanyi, nea badaydaanyi gwanda gharbeeda.

²⁶ Ak gajeadatas haleanjeadaanyi adiiw, nea ghwaak beasta ea goosha, nea gida abit aba gheanyiin gajeanung' goosha.

²⁷ Humng'eeda gayghoadaajiit munyindaanyi, nea ng'eanyiida gayghang'eat gang'uchi niny.

²⁸ Haleanjeedeaba gheanyi gajeenung' goosha, eaweeda nyarasta ASEETA.

²⁹ Nih gidaleabu heeda ASEETA gil siitaw siida muy, nea gidalaksa ASEETA siida muy gil.”