AYUBU 14 - Bibliyeeda Ghaydit

¹ “Siida jiilu gatmooda, eawoojigaaschi ea ng'ay ak aasaang'a sawanaduutka.

² Inyeesa ghafiirfiirda deakghweeda ak ghwasis, nea inyeesa ghafwachta jirooneeda ak goosha.

³ Ak ang'iing'i gijaadi gheanyangaagu ng'ula siida uurji niny, ak ginung' dawa jeeda girgweageeda sea ang'iing'i.

⁴ Ng'eaha gil jea ghoamu gooruudu gidamiy aba jeeda gidamuy? Manda dea jea ghoamu.

⁵ Eawoojiga giibinda siida siiteen, ea ASEETA ang'iing'i niideeni mooneeda sheegaaschi; ak ea mayghwasuut mooneeda damanda iideeni.

⁶ Ading'ulayi niny nung'waada, gahoosan aba eawoojigaaschi, gawuurji siida gadiyeeda siitaw lapiya aba jeemba eaweecheanjagi.

⁷ “Aba gideaba geeta iisilach gearar gideaba gaygwardu ak gayghaftu gicha.

⁸ Nea hawungaaschi gaygwarina jeeda sigeeda woosi bea ng'eanyiida, ak hawungaaschi gaygameewsa jeeda sigeeda.

⁹ Nea aba shaboonata beega gayghaftu, ak gajaruuni damealga uurjeewana geediga duu gwardu.

¹⁰ Ak siida iimea ak ghang'amwa badayda ng'eanyiida, nea nibiikta gurooroadaanyi, abeeda gudeepuusa naaha?

¹¹ Gawuurji gidajeamiida beega basooda, nea goosha guldeayda ghealooda.

¹² Ea gidameawda siida gil, ak ea maygut ghang'eat, maygut ghang'eat nea mayghwahal geaw bwak ea ghwahita muudeanooda humng'eeda.

¹³ Gidabal gwachi gifunyaan aba gheeda maloonghajeega, gwachi gayfunyanaan ea goosha nyarastaang'u, ama inyas goosha damanda igooni abeeda gajapkaadan.

¹⁴ Heapi siida iimea abeeda gaygutgwandeawa eaweega gicha? Ak gaydaamuukghuneey aba eawoojigeasu bea gadiyeeda bwak ea ghwahidu damanda jea eetinanean.

¹⁵ Gwachi ang'iing'i gayguurni, ak gwachi gaydasha ghuutaang'u, ak gwachi gaybwariinya gadiyeeda geatingaagu.

¹⁶ Hean amang'ata gajiita beateanyu sean, ak gwachi gaynung'waada ng'ulooda riing'eegeasu.

¹⁷ Giidiinyeandeanyu siyiin giirooraneeda aba jeeda shageeda, ak ang'iing'i giradi munyindeanyu.

¹⁸ “Ak giijeega gaygoobeedeay, nea ghwaloadaan lagheaneeda haw aba heeda mida.

¹⁹ Beega saang'a gayghwanung' ghoashoay lagheanga, ak guldeaydaanyi gayghwaat iseaskweanda badayda ng'eanyiida.

²⁰ Ang'iing'i ginung' ghoabeada siida ak ghwaroat damanda manda muudeanooda, ak ghwayam uhuudaanyi ak ghahoan gwasheagiit.

²¹ Orjoagaaschi geetaw mureeda nea niny ea mandeawana iita, ak geerareang'u nea niny ea mwadaaha.

²² Ak gwasamsa sawanadeeda mida saseadaanyi, nea goonyahuushi aba munyindaanyi.”