AYUBU 13 - Bibliyeeda Ghaydit

¹ “Ng'ula, suh seaniin naadaayi aba gheang'deanyu, ak ea naayiinyi aba iiteanyu aniineesean ak ea naanali.

² “Nea suh oanali agoogean, eara aniini ghaanali, aniini meawoosi mwanang' ea dang'aleagwa.

³ Ak gwachi geagasayi deabalool ASEETA hoauur, geagasayi daweat geaw aba madeeda ASEETA.

⁴ Nea agooga inyeesa goong'aday ng'asheega ng'uyeega, agooga oogasean goowooschi meanga marachi gil.

⁵ Gidabal gwachi ghoasiindi ghang'ata, nih abeeda gwachi gajea weaghuumeeda gil aba heedeang'wa.

⁶ Asi ayiinya ng'asheegeasu, Ooleeysean iit iyaaweachi geaw.

⁷ Gajabaloolana ng'uyeega aba badayda ASEETA, ak gajabaloolana gea mii doobiiweadi aba badaydaanyi.

⁸ Heapi gajoohiimsiina niny shiitmeeda, ak gajaweayeena meatkweeda ASEETA aweada?

⁹ Heapi ghwahiti, gideaba gagaseadayeegwa niny, ghana iyooreenganayi siida heapi gajareengana niny?

¹⁰ Aba huumwa gaygoowoowseegwa agooga, inyas ghoashichi buuneeda aba makcheameeda.

¹¹ Heapi hawuni itaanyiin mayghang'udaneegwa muuwda, nea gharbeadaanyi ea maygang'adeeseegwa?

¹² Ng'asheegeagwa bea weaghuumeeda ghwasiildeanga deareeda gil, nea hilgweandeang'wa ea hilgweanda sisna sigeeda gil.

¹³ “Asi anung'waada dasiinda, ak suh jea ghapka heedeanyuun ea dapka.

¹⁴ Geawooschi hidaat eara gaweay eaweegeasu jeeda washta, aba gideaba ghaanali geandi jeeda doobiiwnata.

¹⁵ ASEETA iigasa gwanuusan ghwahit, manda gida jea dahuta, eara gwasunu gaydaweat geaw aba naweadingeasu aba madeadaanyi.

¹⁶ Nih abeeda gayghoah lealeanoodeanyu, aba gideaba siida mwaawala gheang'da ASEETA maygawa madeadaanyi.

¹⁷ Ooleeysiiniit muuchi ng'asheegeasu, ng'asheega eargu gaweay jeesinga iidigeagwa.

¹⁸ Ang'ula muuchi neasinyi ng'asheandeanyu, ghaanali gideaba aniini geawooschi doabiiwaat.

¹⁹ Ng'eaha gil dea jea gang'aleali sea aniini? Aba gideaba ghamneawa gaydasiinda ak ghaameayi.

²⁰ ASEETEANYU nung' danyas suh asiyeenyean, ak ea maydafuy geaw deasheagiidaneey geaw.

²¹ Gidamadeeda geanda geatindaang'u bwaran ak ea adilasi uhuudeanyu aba gharbeadaang'u.

²² Ang'eada ghuuta balooldaang'u ak gaydasha; ghana dang'eat aniini ak gishaahi.

²³ Giidiinyeanyeekeasu ea riing'eegeasu aahada? Rukunean giidiinyeanyeekeasu ea riing'eegeasu.

²⁴ Ghwasaan anda gifunyi gheamamdaang'u, ak ginung' dawuurji weajoocheandaang'u.

²⁵ Gajamuuwa nyeeshtooda aat jeameeda? Ghana heapi gajaada geeshta mbarariida gajeami?

²⁶ Aba gideaba ging'waari ng'asheega ng'weani aba badaydeanyu, nea ginung' dasar riing'eega gheareemaneanduumeedeanyu.

²⁷ Giradi geeshangeasu aba munyaloali, ak gisikteawi beacheengeasu sean, nea baneaguukeasu ea niyiini heechea gabiikteawa.

²⁸ Eara dawuurji gida niimealu ak ea nisis, nea geawuurjeewi eaghwada niyaak muguyga.