AYUBU 12 - Bibliyeeda Ghaydit

Ayubu

¹ Hean ghwalamda Ayubu ak ghwasha ghuuta nea gwayeesha.

² “Ghwahit agooga goondeawi weaghuumeeda, ak weaghuumeeda gaygoosha iyoomeewayi.

³ Ak eara aniini geandeawi fughareeda geawuurjeeweegwa, aniini mii gideaba mearacheewani gili, nea ng'asheega oorugu sean mwanala ng'eaha?

⁴ Aniini gabareawean reari fuga eaduupcheewi, ak aniini geamuschi ASEETA ak ghwasha ghuuteanyu aniineeda eawooschi doabiiwaat, nea meeyeateewanean ghuut, ea neawooschi siida rearga aba heeda buuneeda.

⁵ Siida abargiishi inyeesa gafool miyeeda, aba niny miyeeda gaba fuga manda gheamamda.

⁶ Maheemajeega mareanghooga gaba seayu, nea gea sassat ASEETA gaba seayu, uurda nyaawa aseeta nyaawa gil.

⁷ “Asi abearsiina diyeang'su ak gayghoanaalnyi, ea dariidaka mida humng'eeda ak gaygwarukuneey.

⁸ Ghana baloola sea geediga ng'eanyiida ak gayghoanaalnyi, ak gaygwarukuneey ghweayeega basooda.

⁹ Aba jeedeaba suh seaniin, ng'eaha dea mwanala gideaba suh gwasin NG'UTAMIIDA.

¹⁰ Ak eaweega haleanjeeda mideawa eaweega gwanda geatingaaschi, eara giisiimeanda buuneesean.

¹¹ Heapi iita moodeena ng'asheega, mawuurji gidasamiideayda ng'ushapta hamita?

¹² Weaghuumeeda gwanda heeda gweargwa, ak fughareeda gwanda heeda fuga niibiida ng'eanyiida ea gageawiit.

¹³ “Nea weaghuumeeda ea uurda gaba ASEETA, niny gwandeawa fughareeda ea nalooda.

¹⁴ Inyas gwanyarja ea manda siida jea ghwadeas gicha, nea inyas ghwarat siida ak ea manda siida jea gootin.

¹⁵ Inyas ghwaadeal roopta abeeda geanyaschi geayda, nea iyatin ghoanyiit ng'eanyiida guldeayda.

¹⁶ Nea gwandeawa uurda ea weaghuumeeda, giika sireenganiin ea gea reengani buuneedean gaaschi gil.

¹⁷ Niny inyeesa ghwanung' gaweay fuga argweakiisa buuneeda nea dawiiri, nea ghwanung' gwadasheahiidi fuga laja girgweaguutka.

¹⁸ Niny inyeesa gageandeawa sugoodiga gheambalmeeda nyaawa, ak gwarasa mananuunatka nyaawa ghealooniga fuga mida ghealooniga.

¹⁹ Niny inyeesa ghwanung' gaweay ashoohoodiga nea dawiiri, nea ghwanung' ghoabeada gea mideawa uurjeenga.

²⁰ Nea ghoareat fuga argweakiisa buuneeda, ea giimuusta nyaawa bea baloolda, nea gageanda weaghuumeeda aba heeda gweargwa.

²¹ Nea inyeesa ghoabwaaspwaas fuga hees, nea gageandeawa fuga mideawa giimuusta uurjeenga nyaawa.

²² Inyeesa ghoabwaaspwaas gea mida jeeda misaneeda ak gweadu heeda eesh gea gwachi mida jeeda misaneeda.

²³ Inyeesa ghoahaat eemoojiga, ak ghwalas uhuuda, inyeesa ghoadaarda eemoojiga ea gwasheagiit ak ghwanung'wa heeda.

²⁴ Nea inyeesa gageandeawa fuga hees bea buuneeda fughareenga nyaawa, nea ghwanung' gaweelweel aba dareapcheeda manda naweeda.

²⁵ Ak ghoahaakhaakta geadi aba jeeda misaneeda nea manda weeshinda, nea ghoabeadaada gawuurji leeyeanda.