AYUBU 10 - Bibliyeeda Ghaydit

¹ “Saseedeanyu gabur ea eaweegeasu, maydasiinda aba sawanadeedeanyu, gaydabalool aba sawanadeeda gurooroodeanyu.

² Gaydayeesha ASEETA, adiirgweaksean, nung' danal gida jea eesheang'nyeewana.

³ Heapi aba headaang'u ghwadoabiiwi gideaba gayghabwasan ak gifooli gadiyeeda geatingaagu, ak giiduuksi geaw gidamwaal fuga munyas

⁴ Heapi gheanyangaagu gawuurji gea siida? ak giing'weardaaydi gida ang'weardaayda siida?

⁵ Heapi eawoojigaagu gawuurji eawoojiga siida, ghana gweanyeakaagu gawuurji gweanyeeka siida.

⁶ Nea guwi abeariida munyindeanyu, nea gigaseadi riing'eedeanyu.

⁷ Earapeadi inali gideaba meandeawani munyinda, ak ea manda siida jea ghoaghuuhanaan geatindaang'u.

⁸ Geatingaagu gwasinanean sheang'weeda, ak ghamneawa giyamugeaw lasa uhuudeanyu?

⁹ Apkaada gideaba ghayi gisinanean sheang'weeda, ak gajadealdanaan gicha jeeda sigeeda.

¹⁰ Heapi neada ea mii ang'iing'i dea adalealdanean eanooga, ak ghwanung' danoas geaw dawuurji nagheedeesh.

¹¹ Ak gidukuti saseedeanyu aba mughoowooda ea geaka, ak gidukuti geakeasu aba banyeega ea mughoowooda.

¹² Ak ea nigooni eaweega ea alooheeda, nea gida ing'uliidanean gafur gurooroodeanyu.

¹³ Nea ng'asheesu gifunyi aba jeeda gurooroadaang'u, ak ghaanali gideaba suh gwanda jeeda saseadaang'u.

¹⁴ Abeeda gwachi giimuughu daaha ea jea dasin riing'eeda, abeeda gayheawana samsiina munyindeanyu.

¹⁵ Aniini iyeawooschi muy, ea deashageadi, nea iyeawooschi doabiiwaat, ea maydaghwar geaw aniini naanyaschi baspaseega muuchi.

¹⁶ Inyas geagatgachi uhuudeanyu ak guwi shageateanyu dawuurji ng'adiida, nea giihiimnaan deamdeamangaagu,

¹⁷ Nea inyeesa aba gheata sean gindeawi muuwshoodiga aba badaydeanyu, ak giihaadi nyarastaang'u aba badaydeanyu, nea ginung' ghapka weajoodiga eashish ghabwaran.

¹⁸ “Ghwasaan abeeda anda ginung' eejiilan? gwachi gidabal ghaameayi nea mii ghwadaahan sih.

¹⁹ Gwachi gaydawuurji siida mandana, ak gwachi gajeayaadan eepunyan nea geandi jih.

²⁰ Ak eaweega neada ea mii ng'ay? Asi nung'waada, adiideawiichean eahaawdanaan gilimwanang'.

²¹ Damanda mii daweewa hoowa, nea maydabiikna gicha hoowa, hooweani bea ng'eanyiida mida gurmeahiida ea misaneeda hawiin.

²² Ng'eanyiida mida misaneeda haw ea ng'ooweata, nea weeshindaanyi gawuurji misaneeda.”