AYUBU 1 - Bibliyeeda Ghaydit

Shataani gwasim Ayubu

¹ Ghayi aba jeeda ng'eanyiida Usi, gwanda siida siguura Ayubu, siisi abeeda ea doabiiwaat nea aamiy seara, ak goowali gheang'da ASEETA nea ghwasaja geaw ng'asheega munyas.

² Ak gwaji orju ispwa ea haw samwagu.

³ Ak gwandeawa haleanjeeda, gisilgaaschi ea sagalamnyooji ispwa, ea ngamiyaji sagalamnyooji samwagu, ea heew bughalaji muut, ea digeeniga seaweadi bughalaji muut, ea fuga saang'a bea gadiyeeda. Ak siisi ea nalaat muuchi aba ng'eanyiita ghayeawaan.

⁴ Nea inyeesa orjusu geeweay eesin ghweelmeeda aba giliwas sih ea gealga nyaawa, nea geelageanyi. Nea geecheaksa eeguursa haweegiga asamwagu bea gea nyaawaan ak ghapka gweagiischi nea gwaleeshi sea saawa.

⁵ Inyeesa iing'ata ghweelmeeda gaguursa Ayubu diibigaaschi ghoamiidu, hean inyeesa ghang'eat nea gudea sakteayda duu gil iing'ata ghweelmeeda ak ghoadayda haleanjeeda sisabwa geadi bea ghadooweeda sighwarda, aba badayda giliwas baleanda, aba gideaba gwayi, “Diibigeasu hich gwadeepa ea nisin riing'eeda nea ghamwaashta ASEETA aba jeesinga nyaawa.”

⁶ Ghayi eaweecha gaweay orjooga ASEETA ghabwatgeat aba madeeda NG'UTAMIIDA, ak eara Shataani gawa bugusta nyaawa.

⁷ Ak ghoanyaash NG'UTAMIIDA shataani nea gwayeesha, “Gileabu yeenu ang'iing'i?” Hean ghwasha shataani ghuuta NG'UTAMIIDA nea gwayeesha, “Gealeabu neayeeda aba jeeda ng'eanyiida, ea beacheengeaba hiji ea hoowa.”

⁸ Ak gwayeesha NG'UTAMIIDA shataani, “Siisi iteanyu bea gadiyeeda was Ayubuuni nidaahi giduurji, manda siida uurji niny aba badayda ng'eanyiida siida doabiiwaat gil nea goowali gheang'da ASEETA, nea ghwasaja geaw ng'asheega munyas.”

⁹ Hean ghwasha shataani ghuuta NG'UTAMIIDA nea gwayeesha, “Ayubu goowali gheang'da ASEETA eara ea miidawi gili?

¹⁰ Ak ghamneawa ang'iing'i mifuri niny aba meadajeega seani? Sea gheanyi, ea haleanjeadaanyi sean mideawa, ak ea niidawi ghawooda aba gadiyoojigaaschi sean, ak ea niihaada haleanjeadaanyi aba badayda ng'eanyiida.

¹¹ Heapi ahaakta geatindaang'u ak gisadi haleanjeeni sean mideawean, heapi mayghamwaashtaneey aba madeadaang'u?”

¹² Hean gwayeesha NG'UTAMIIDA shataani, “Ng'ula, haleanjeeda sean mideawa giimuusi sina gidawas sean aba badayda haleanjeadaanyi, nea adiiheaksi geadi niny.” Hean gawa shataani ghang'amwa madeeda NG'UTAMIIDA.

Diibiga Ayubu ea haleanjeeda gealas uhuuda

¹³ Ghayi eaweecha nea gweagiischi nea ghwali difaayi orjoagaaschi ea haweega aba gheeda duweacheeda geanyaawa.

¹⁴ Hean goobeeru siida siicheaksa Ayubu ak gwayeesha, “Damanda bwara ng'eanyi heewga nea ghoajeada digeeniga aba murdeeda nyaawa.

¹⁵ Ak gang'eesa fuga Seba ak ghwasareanda goodeay ak gwanuuseada fiisu bea gadiyeedean aba ng'uta, ak geapuudan aniini nea geabea geaw deaneey iita.”

¹⁶ Deagheata nea miighoabuut ghuuta baloolda, ghwahidu sih nuut ak gwayeesha, “Ghooptu beasta ASEETA aba humng'eeda ak ghwalas uhuuda gisilga ea fuga gadiyeeda ak ghwanung' goosha, ak geapuudan aniini nea geabea geaw deaneey iita.”

¹⁷ Hean deagheata nea miighoabuut ghuuta baloolda, ghwahidu sih nuut ak gwayeesha, “Fuga Galdayo ghabwatgeat gwasin gheamughuushcheew samwagu, ak goobissa ngamiyajeega ak ghoawaas, nea ghabwar fugiga bea gadiyeedean aba ng'uta, ak geapuudan aniini nea geabea geaw deaneey iita.”

¹⁸ Deagheata nea miighoabuut ghuuta baloolda, ghwahidu sih nuut ak gwayeesha, “Damanda agiischeewa nea ghwali difaayi orjoagaagu ea haweagaagu aba gheeda duweacheeda geanyaawa.

¹⁹ Deagheata ghwahidu jeameeda ng'waan leabu dareapcheeda ak ghwalas gheedida meadajeega sean ak goobeedeaysa buuneeda gheeda. Ak gameewa, ak geapuudan aniini nea geabea geaw deaneey iita.”

²⁰ Hean ghang'eat Ayubu ak ghabwaashaada hang'weakaaschi ak ghwareakgh uhuudaanyi, ak goobeedeaysa ng'eanyi ak ghamwaash ASEETA.

²¹ Ak gwayi, “Geejiilan nea geawooschi dawiish, ak gaydang'amwa badayda ng'eanyiida nea geawooschi dawiish NG'UTAMIIDA dea goonan ak NG'UTAMIIDA ea dea geaniida gagasa eakghaambiit gheawunga NG'UTAMIIDA.”

²² Aba badaydeaba suh seaniin Ayubu miigwasin riing'eeda nea mii gwarukusa ASEETA gidamuy.