AMOSI 9 - Bibliyeeda Ghaydit

Ghoorjeadinga NG'UTAMIIDA

¹ Ak ghaadaayi NG'UTAMIIDA nea ghamiinaada aba murdeeda heeda wagiida, ak gwayi: “Bwara iidiga daranajeega ea ghwaleakghleakgh darearjeeka, ak gihirjeawsi iheenga buuneesean; ak dea jea ghoabit aba jeenyaawa gaydabwar aba ng'uta; ak ea maygamng'aw eara siyagi aba jeenyaawa, nea mayghaghu eara siyagi aba jeenyaawa.

² “Eara ghaghurghur ng'eanyi ak gaweay gheeda maloonghajeega, geatindeanyu gaygageanu saawa aba hoowa; eara gwadiyeada gaweay humng'eeda, gaydearareang'na saawa hoowa.

³ Ak eara ghafuy geat aba uhuuda giijeeda Garmeli, gaydagasa ak gearuuni hoowa saawa; eara ghafuy geat aba heeda mwaadaahi bea uuta beega saang'a bea basooda, aba hoowa gaydanung' gawa ichibooda ghaghanya saawa.

⁴ Ak eara gaweay soomjeandumeeda aba madeeda weajoodiga nyaawa, aba hoowa gaydanung' gawa ng'uta ak gwanuus saawa; ak gaydeafuursa gheanyangeasu saawa dasima gidamuy nea mii gidamiyi.”

⁵ Ng'utamiida, was ASEETA bea lugweega, dea inyas ghwasat ng'eanyiida ak ghwanyari, ak gagiisan fuga sean mida jeeda, ak ghang'eat sean gawuurji Nayli, nea ghoashoay gicha gawuurji Nayleeda Misri;

⁶ niny dea inyas ghwadeas ghoorajeagaaschi geawi aba humng'eeda, ak ghwayiin sindeetaanyi badayda ng'eanyiida; niny dea guuriisa beega basooda, ak goohiisa badayda ng'eanyiida– NG'UTAMIIDA gheawungaaschi gil.

⁷ “Agooga moowuurjeewani fuga Gushi aba heedeanyu, Ea fuga Israeli?” nih ginyah NG'UTAMIIDA gil. “Heapi ghayi meascheeng'ni fuga Israeli aba ng'eanyiida Misri, ea fuga Filisti aba ng'eanyiida Gaftori ea fuga Shaamu aba ng'eanyiida Giri?

⁸ Ng'ula, gheanyanga Ng'utamiida was ASEETA gwanda badayda sugoocheanduumeeda riing'eeda, ak gaydanung' goosha aba badayda ng'eanyiida; ak ea maydanung' goosha gheeh Yakobo,” gwarugu NG'UTAMIIDA.

⁹ “Aba gideaba gaydaadayda diigheanda, ak geaduumduumnyi gheeh Israeli aba bugusta eemoojiga sean gawuurji siida aleal ngaano, ak eara gheang'nyeanjagi ea maygoobisa badayda ng'eanyiida.

¹⁰ Fugeasu sean bea riing'eega gaygameewa aba ng'uta, fuga eena, ‘Mayghwanyaseasa gidamuy nea majeeroonyeewana.’

Galanya gajeeteelsa fuga Israeli miyeenooda

¹¹ “Ak eaweedida gaydasin gicha heeda giibinda Dawdi ghayi abeada ak geadukuti seawuutka ghayi nyara, nea geagatkachi gealga nyaawa nyara, ak geabiikti dadeas ea gabiiksiinda heeda gidaghayi bea mwadi;

¹² ak gwahearan gheaptanga Edomu ea eemoojiga sean ghayi siguursa aba gheawungeasu,” gwarugu NG'UTAMIIDA sina ng'asheesu.

¹³ “Ng'ula, ghapka askwearjoojiga,” gwarugu NG'UTAMIIDA, “dea bwar ng'eanyi gayghoadaraam dea lach booga nea dea muura sabiibu gayghoadaraam dea hista booga, ak giijeega gayghoabuutpuudu difaayeeda heasaat, ak gayghwanyar heayeeniga sean.

¹⁴ Ak gaydaaghuumu gicha fugeasu was Israeli ghayi siipaleak, ak gayghwadeas gicha mujiinajeega ghayi sinung'wa heeda ak goobiida jeesinga; ak gwahista sabiibu aba jeeda madameega nea ghwali difaayeadaanyi, nea geesin boostaanajeega ak geayaak haghweagaaschi.

¹⁵ Ak gaydadiyeesa ng'eanyiida nyaawa, ak ea maygudu eang'aamwa ng'eanyiida aadawji saawa,” gwarugu NG'UTAMIIDA was ASEETEANG'WA.