AMOSI 6 - Bibliyeeda Ghaydit

Giishealda fuga Israeli

¹ “Dashageada gea miyeeni aba Sayuni, ea giika abiitpiit aba uhuuda giijeeda Samariya nea gaba seayuun, fuga siiwal gheang'da bea eemoojiga madeeda, inyeesa gaweesa fuga Israeli!

² Ang'ata ea aweayeena Galne, ak ghoadaayi; ak ghoang'eadi hoowa ak gooweayi Hamateeda haw; ak ghoararang'aadi ea aweayeena Gateeda fuga Filisti. Heapi agooga ghoang'ali sugoodisu: ghana ng'eanyiida nyaawa aahaw ea gaburdeawa ng'eanyiideang'wa?

³ Ea agoogeeni oosheagiichi eaweecheanji muyiin, ak gooneekiichi hoorgeeda ng'asheega munyasiin?

⁴ “Agoogeeda nyasa goolili aba badahuuka bulaleengeagwa miyaasiin haw sheayeat, agoogeeda inyeesa ghoayaaji dayeega gisilga bea hawanda nooga, ea muhooga mida bugusta seamooda;

⁵ agoogeeda inyas goosarmanyi sarmoojiga mwadaagha aba ghuuta gidoondooriida, ak gawuurji gidaghayi sissa geaw Dawdi gidoondoorajeega sarmeeda;

⁶ agoogeeda inyas ghoaleayi difaayi aba jeeda gweerajeega, nea ghoayeashti nagheeda ng'andit, nea mwang'udeagwa giiseaneega aba sawanadeeda Yosefu!

⁷ Asi gayghoah gea madeeda aba jeedeaba suh ak gaweay jeeda soomjeandumeeda, ak nyeashteaba giika wiilgeadiin gayghang'ata.”

⁸ Ng'utamiida was ASEETA gweaksa geaw habeawooda (ak gwayi NG'UTAMIIDA was ASEETA bea lugooda): “Ghaaheawi miyeenooda Yakobo, ak ghaasichi gealgaaschi; ak gaydageanda mujiini daadaw weajoodiga ea fuga sean mida jeeda.”

⁹ Nea iyabiida headi damanamughuush aba jeemba gheawagi gaygameewa.

¹⁰ Ak orjeeda ghamagheamata siida iighwarda siida gayghwalaalda ak gooruuteawa geaka jeeda gheeda, ak gay gwayeesha niny dea mida jeeda ghooriida, “Gudugwanda siisi indeawi?” gaygwayi, Manda”, ak gaygwayi, “Siinda! aba gideaba majeerukuna gheawunga NG'UTAMIIDA.”

¹¹ Aba gideaba ng'ula, gwarugu NG'UTAMIIDA, gheeda haw gajeenung' gabearshachi, nea gheeda mwanang' geanung' ghwanyar.

¹² Faraasi gayghoamu ghafwaja badayda lagheanga? Ak siida gayghoamu ghabwara ng'eanyi heewga aba hoowa? Ak ea neayamnyi doobiiwnata ghoah furooda nea haghweega doobiiwnata ghoanung' ghaghwana–

¹³ agoogeeda inyas goohoosanyi aba mujiineeda Lodebari, nea gooyeenyi, “Miyeegeanda mujiineedeanya aba uurdeanya ak geegeandi Garnaimu nea geebwaageadi?”

¹⁴ “Aba gideaba, ng'ula gaydeajeagu eemeeda ghapka headaang'u, Ea fuga gheeh Israeli,” nih ginyah NG'UTAMIIDA was ASEETA bea lugooda; “ak gaygwasawaneegwa ghang'eada heeda jea asikni bea Hamati ea ghwahita eenda Araba.”