AMOSI 5 - Bibliyeeda Ghaydit

Guurdeayda aba iita duukuunooda

¹ Olleeysiiniit ng'asheanji earguun ak ghoah heareega aba heedeang'wa, Ea gheeh Israeli:

² “Niibeada huda miyeasat bea Israeli, ak ea maygudu ghang'eat; sibwaay aba badayda ng'eanyiidaanyi, ak ea manda siida jea gagatkat.”

³ Aba gideaba gwayi Ng'utamiida was ASEETA: “Aba jeeda mujiini inyas gwarita fih sagalama gayghoabit fih bughala, ak inyas gwarita fih bughala gayghoabit fih damanamughuush aba gheeh Israeli.”

⁴ Aba gideaba gwayeesha NG'UTAMIIDA gheeh Israeli. “Agasean ak gajoopiidana;

⁵ ak ea adoogaseadayi Beteli, nea adooweayi jeeda Gilgali ghana asajaada ak gooweayi Beer-sheba: aba gideaba Gilgali gaygawa soomjeandumeeda, nea Beteli gayghwayamwa ghoah gidamwadaagha.”

⁶ Agasa NG'UTAMIIDA ak gajoopiidana, adiidu ghwayeata beasta dea gheeh Yosefu, ak ghwanung' goosha, ea ea mudugwanda siida jea ghwanung' gamis aba Beteli,

⁷ Ea agoogeeni eayamnyi girgweageeda ghang'waaniidiin, nea ghoanung' goobissa ng'eanyi doobiiwnata!

⁸ Ninyeeda sin miinga, ak ghwayam ghwanung' gamisaniit ng'eanyiida sakteayda, nea ghwanung' gamisaniit ng'eanyiida askweari, ninyeeda guuriisa beega basooda, ak goohiisa badayda ng'eanyiida, gheawungaaschi NG'UTAMIIDA gil,

⁹ ninyeeda iissa gweadu nyarjeawda nea gwasham gea daruusi, ak nyarjeawdida goobissa hoorgeenyaawa.

¹⁰ Saawa ghwasit dea awoow nea gwanda dooshta, ak geanung'wa heeda niny dea baloola ng'asheega doobiiwnata.

¹¹ Asi aba gideaba nooleapsi ng'eanyi siida bwarbwar nea ghoayaagi ghoorjooda aba ngaano, asi naadeaschi gealga lagheanga sishit, ak ea majoopiidana jeenyaawa; agooga noohisti madameega miyaasiin bea sabiibu, ak ea mwajaleaha difaayi.

¹² Aba gideaba ghaanali gisaang'ayda giidiinyeanyeekaagu, ea giteena riing'eadaang'u– agoogeeni eaghabwaaschi gea doobiiweadiin, nea ghoang'waanyi seawshooda, ak ghoakghuumnyi aba dooshta gea gasa weeta.

¹³ Asi dea mideawa weaghuumeeda gayghwasiinda aba damani; aba gideaba nih damanda muy.

¹⁴ Agasa gea miyaas, nea mii gea munyas gil, ak gajanyasa eaweega; ak NG'UTAMIIDA, was ASEETA bea lugooda, gaygwanda heedeang'wa, gawuurji gidoanyaashti.

¹⁵ Asta gea munyas, ak ghoabwariinyi gea miyaas, ak goosikteawi doobiiwnata aba dooshta; eara NG'UTAMIIDA, was ASEETA bea lugooda, gayghabwaydaneegwa aba gheaptanga Yosefu.

¹⁶ Asi gwayi NG'UTAMIIDA, was ASEETA bea lugooda, was Ng'utamiida: “Gajeegutu heareega aba jeeda naweadinga sean; ak gajeeyi aba jeeda naweadinga sean, ‘Uuw! Uuw!’ Ak gajeeguursa fuga bwar ng'eanyi ghwahidu gagutu heareega ak eara giika ammu shookean ghapka gagutu heareega,

¹⁷ ak jeeda madameega sean bea sabiibu gaygooguul, aba gideaba aniini gaydasik bugusteang'wa,” gwarugu NG'UTAMIIDA.

¹⁸ Ashageada agoogeeda oogasayi eaweeda NG'UTAMIIDA! Ghwasaan anda oogasayi eaweeda NG'UTAMIIDA? Ea misana, ak ea manda weeshinda;

¹⁹ gawuurji siida mang'aw aba madeeda ng'adiida, ak gwaroonyi mariirda; ghana gawa jeeda gheeda ak ghoang'waay ghamarda, ak ghaghanya udang'usheega.

²⁰ Eaweeda NG'UTAMIIDA gaygamisaniit, ak ea manda weeshinda, ak ea misana muuchi nea manda eara weeshinda?

²¹ “Aniini ghaasichi, ak geafooli ghweelmajeegeagwa, ak ea maydahoosan aba baditeang'wa bea geat.

²² Earapeadi ooyeanean haleanjeedeang'wa easabi geadi bea ghadooweeda sighwarda ea booga easabi geadi, suh maydaang'waay, ea haleanjeeda easabi geadi bea hoyyoo ea dugweagwa riisheadi maydasachsa ghaat.

²³ Oang'aamwana heedeanyu nyeashta sarmoojigeagwa; aba gideaba meagassi dayiiy ghuusiga gidoondoorajeegeagwa maydealeeysiit.

²⁴ Ak ginung'waadi doobiiwnata ghwararang'aanda beega, nea gawuurji alooheeda gheang'deenda mwaghajamiida.

²⁵ “Heapi ghayi nooyeanean lukghumeeda ea haleanjeeda sisabwa geadi bea ghadooweeda gweanyeew haradam ghayi oondeewi aba jeeda dareapcheeda? Ea fuga gheeh Israeli.

²⁶ Gajageanda Sakuti was sugoocheandeang'wa, ea Gaiwani miing'weanda was aseeteang'wa, ghayi oosisi geat;

²⁷ asi gaydaadeagwa ghealooniga ea asuuda Dameski,” gwarugu NG'UTAMIIDA, nea gheawungaaschi ea ASEETA bea lugooda.