AMOSI 1 - Bibliyeeda Ghaydit

¹ Suh ng'asheega Amosi, ghayi was siyagi aba jeeda jeagiischoodiga aba Dekowa, ghayi daah fuga Israeli, damanda waseewa Usiya sugoocheanda Yuda, ea aba damanda Yeroboamu orjeeda Yoashi, was sugoocheanda Israeli, aba gweaydeaba iyeenya heeda miighwahina sawooda ng'eanyiida.

² Ak gwayi: “Ghwanya ghuuta NG'UTAMIIDA leabu Sayuni, ak ghwanya ghuutaanyi leabu Yerusalemu; ak gaygagutu heareega haghweeda jeagiischoodiga, ak uhuuda Garmeli gayghaghajaamiit.”

Ghoorjooda ASEETA aba heeda Giischeewda Israeli Shaamu

³ Asi gwayi NG'UTAMIIDA: “Fuga Dameski nisin riing'eeda gicha, nea aba sareani gaydalas saawa. Nisma fuga Gileyadi ng'asheega munyas nea gwasawan.

⁴ Ak gaydanung' gawa beasta badayda gheeh Hasaeli, ak ghwaak gealga Ben-hadadi.

⁵ Gaydanyarja ghuuta hilgweanda Dameski, ak ghaabwarji fuga bea ng'eanyiida leabu moangoachiyda Afeni, ea ninyeeda ambaliischi aba Bet-edeni; fuga Shaamu gaygamng'awsa ng'eanyiida Giri,” nih ginyah NG'UTAMIIDA gil.

Fuga Filisti

⁶ Asi gwayi NG'UTAMIIDA: “Fuga Gasa nisin riing'eeda gicha, ak aba sareani ea gaydalas saawa; aba gideaba geasar fuga sean mida mang'aweanda ak geetayda saawa gaweay ghoah soomjooga aba Edomu.

⁷ Ak gaydanung' ghwahidu beasta badayda ghamarda Gaasa, ak ghwaak gealgaaschi.

⁸ Ak gaydabwar fuga bea ng'eanyiida leabu Ashdodi, ea ninyeeda ambaliischi leabu Ashkeloni; ak gaydayam geatindeanyu gawa badayda Ekroni; ak gaydanung' goosha gheaptanga fuga Filisti,” nih ginyah NG'UTAMIIDA gil.

Diro

⁹ Asi gwayi NG'UTAMIIDA: “Fuga Diro nisin riing'eeda gicha, ak aba sareani gaydalas saawa. Aba gideaba niidaw sean geatinga fuga Edomu, ak ea meapkaada neajeeda duupcheeda.

¹⁰ Hean gaydeajeakta beasta gawa badayda ghamarda Diro, ak ghwaak gealgaaschi.”

Edomu

¹¹ Asi gwayi NG'UTAMIIDA: “Fuga Edomu nisin riing'eeda gicha, ak aba sareani gaydalas saawa. Aba gideaba ghwaat geeshta orjeeda ghaamwat aba ng'uta, nea gwajakta baydeayda sean, ak ghabwaashaada nyarastaanyi, ak ghwanyareas damanda manda muudeanooda.

¹² Ak gaydanung' gawa beasta badayda Demani, ak ghwaak gealga Bosra.”

Amoni

¹³ Asi gwayi NG'UTAMIIDA: “Fuga Amoni nisin riing'eeda gicha, ak aba sareani gaydalas saawa; aba gideaba geabwaashaada jeesinga gadeemga was bungaroodiga mideawa diibiga bea Gileyadi, aba gideaba gagasa goosiipta moonghooda nyaawa.

¹⁴ Ak gaydaayeat beasta aba jeeda ghamarda Raba, ak gayghwaak gealgaaschi, ak gaygwanda giijuureanda damanda ng'ucheeda, ak gayghang'waaniit ng'ucheeda ea gawuurji shaarara;

¹⁵ nea sugoocheanda nyaawa gaygamng'aw, niny sea fugaaschi hees,” nih ginyah NG'UTAMIIDA gil.