2 SAMWELI 24 - Bibliyeeda Ghaydit

Dawdi gwayiida buuneeda

¹ Muchu gabiikta ghang'eat nyarasta NG'UTAMIIDA aba badayda Israeli, ak ghwanung' Dawdi ghwanyas sawanadeeda saawa, ak gwayeesha, “Una, ak giyiidayi fuga Israeli ea Yuda.”

² Hean ghwalamda sugoocheanda ak gwayeesha Yoabu sea shirikareeda hees ambala shirikara, mideayi sea niny, “Aweayeena jeeda eemoojiga sean bea Israeli, ghang'eada Dani ea ghwahita Beer-sheba, ak giyiidayi buuneeda, ak abeeda ghaanali mooneeda buuneeda.”

³ Ghwalamda Yoabu ak gwayeesha sugoocheanda, “Gidabal ghoahaat NG'UTAMIIDA was ASEATAANG'U buuneeda niba bughala aba giteena bea ghamneawa, nea gudugang'ulu gheanyanga ng'utamiideanyu was sugoocheanda; ak ghwasaan inyas gagasa ng'utamiideanyu was sugoocheanda ng'asheanji?”

⁴ Hean ghwajoar ng'asheanda sugoocheanda Yoabu sea shirikareeda hees ambal shirikara. Ng'ata ghabeawa Yoabu sea shirikareeda hees ambal shirikara aba madeeda sugoocheanda ak gwayiida fuga Israeli.

⁵ Hean ghoaghaawa Yordani, ak gawus aba dirbeayda Aroeri, was mujiineeda mida jeeda moangoachiyda ng'eanyiida Gadi ea ghwahita Yaseri.

⁶ Ak ghapka ea ghwahidu Gileyadi, ea ghwahita Gadeshi mida ng'eanyiida Hiti; ak ghapka ea ghwahidu Dani, hean ng'eada Dani gwaneayeada ea ghwahita Sidoni,

⁷ ak ghapka ea ghwahidu mujiineeda majeek bea Diro ea mujiinajeega sean bea fuga Hifi ea fuga Ganaani; ak gaweay ea ghwahita Beer-sheba mida meatkweeda ng'eanyiida Yuda biyeara.

⁸ Iidu nea nineayeewa jeeda ng'eanyiisean, ghapka Yerusalemu iing'ata sheeh shageash ea eawooji diktam.

⁹ Ak ghoadaw Yoabu sugoocheanda mooneeda buuneeda: abeeda aba ng'eanyiida Israeli gwanda fih sagalamnyooji bughalaji sis meanyi mideawa ng'utkeaka, nea fuga Yuda ghwahita sagalamnyooji bughalaji muut.

¹⁰ Hean gwasawana jeeda Dawdi iing'ata iitooda buuneeda. Ak gwayeesha Dawdi NG'UTAMIIDA, “Aniini neasinyi giidiinyeanda haw aba gili easinyiin. Asi ghamneawa, Ea NG'UTAMIIDA, geamuscheey ang'iing'i, geanda giidiinyeanda siidaang'u bea gadiyeeda; aba gideaba neasinyi leendeeda haw.”

¹¹ Iimuchu nea ghang'eat Dawdi sakteayda, ghwahidu ng'asheanda NG'UTAMIIDA heeda sibaneeda siguura Gadi, was sibaneeda Dawdi, ak gwayeesha,

¹² “Una ak giyeeshi Dawdi, ‘Asi gwayi NG'UTAMIIDA, Gaydagoonyi ng'asha samwagu; loada akaleala ak gaydasineey.’”

¹³ Hean ghwaan Gadi heeda Dawdi ak gwarukusa niny, ak gwayeesha, “Gayghwahidu gweanyeew samwagu bea geejeeda jeeda ng'eanyiidaang'u? Ghana jea fwaja aba madeeda weajoodigaagu sheeh samwagu nea gweadu geeshtaang'u? Ghana jea ghwahidu dawni eawooji samwagu jeeda ng'eanyiidaang'u? Asi ateemsheena ak girgu gichea dawa darukusa siida ajeaknean.”

¹⁴ Ghwalamda Dawdi ak gwayeesha Gadi, “Aniini geandi jeeda muuwda; asi abeedeaysiina geatinga NG'UTAMIIDA, aba gideaba baydeaydaanyi aahaw; ak ea adaghanyi eabeedeaysi geatinga siida.”

¹⁵ Ng'ata ghwanung' NG'UTAMIIDA ghwahidu dawni badayda Israeli ghang'eada sakteayda ea ghwahita damanda sigasa; ak gameewa buuneeda ghang'eada Dani ea ghwahita Beer-sheba fih sagalamnyooji laadam ea damanamughuush.

¹⁶ Iidu nea ghoadoabiiw malaykajeanda geatindaanyi nea googeal Yerusalemu nea gagasa gwanyarja; hean ghwayam uhu NG'UTAMIIDA aba sinooda ng'asheega munyas, ak gwayeesha malaykajeanda datasi buuneeda, “Nihit; asi ahaasaasa geatindaang'u.” Abeeda malaykajeanda NG'UTAMIIDA gwanda murdeeda bugharjeanda siileela booga bea Arauna bea eemeeda Yebusi.

¹⁷ Hean goobalool Dawdi NG'UTAMIIDA iidaah malaykajeanda bwar buuneeda, ak gwayeesha, “Uuw, aniini neasinyi riing'eeda, ak ea neasinyi gidamuy; nea gisilsu, neada saawa ea nisin naaha? Geamuscheey iina geatindaang'u badaydeanyu ea badayda fuga ghaheanya.”

¹⁸ Ak ghwaan Gadi heeda Dawdi eaweedida, ak gwayeesha niny, “Siyeang'da ak gisissi NG'UTAMIIDA heeda wagiida aba heeda siileeliisa booga Arauna bea eemeeda Yebusi.”

¹⁹ Hean ghwascheang'da Dawdi aba ng'asheanda Gadi, gawuurji gidarukusiinda NG'UTAMIIDA.

²⁰ Iidu nea ghoang'wearda Arauna, ghwadaah sugoocheanda sea fugaaschi bea gadiyeeda nea ghapka gagalu headaanyi; hean gawa Arauna roonyeeda; ak gwasissa sugoocheanda mureeda ak ghabwada jih ng'eanyi ak gakula gheamamdaanyi ng'eanyi.

²¹ Ghwalamda Arauna ak gwayeesha, “Ghwasaan anda ng'utamiideanyu was sugoocheanda ghwaan heeda siidaanyi bea gadiyeeda?” Gwayeesha Dawdi niny, “Ghaawunyi dasha bugharjeanda silasa booga aba headaang'u, ak ghaadeaschi heeda wagiida bea NG'UTAMIIDA, ak abeeda geateal dawni aba jeeda buuneeda.”

²² Hean ghwalamda Arauna ak gwayeesha Dawdi, “Nung'waada gageanda ng'utamiideanyu was sugoocheanda ghoadayda gidadaah gideaba aamiy aba headaanyi; sukwa heewga jea ghoah haleanjeeda ghadooweeda jea eaghwarda, ea haleanjeeda siilealda ea yookajeega heewga ghoah ghweenga.

²³ Eara sugoocheanda, haleanjeeni seaniin ghoadaw Arauna sugoocheanda.” Ak ghwalamda Arauna ak gwayeesha sugoocheanda, “NG'UTAMIIDA was ASEATAANG'U gagasa ghamwasnyi.”

²⁴ Ghwalamda sugoocheanda ak gwayeesha Arauna, “Manda, gaydasha aba headaang'u; aniini maydaadayda haleanjeeda ghadooweeda jea eaghwarda daadaw NG'UTAMIIDA was ASEETEANYU nea mwaadaydani gil.” Hean ghwasha Dawdi bugharjeanda ea heewga aba shiliingaji haradam ea damanamughuush.

²⁵ Ak ghwadeas Dawdi heeda wagiida bea NG'UTAMIIDA, ak ghoadayda haleanjeeda ghadooweeda jea eaghwarda ea haleanjeeda ghadooweeda bea hoyyoo. Hean ghamwas NG'UTAMIIDA gidasimus aba badayda ng'eanyiida, ak geateal dawni aba jeeda Israeli.