2 SAMWELI 22 - Bibliyeeda Ghaydit

Duumda Dawdi bea jooriischooda

¹ Ng'ata goobalool Dawdi NG'UTAMIIDA ng'asheegeaba duumi eaweeda lealna niny aba geatinga weajoodigaaschi sean, sea geatinga Sawli.

² Ak gwayi, “NG'UTAMIIDA lagheaneedeanyu hawi, ea hilgweandeanyu, ea lealnoocheandeanyu,

³ ASEETEANYU, ea lagheaneedeanyu, was heeda eamng'awsi, igeamboodeanyu ea gujaweeda lealnoodeanyu, hoorgeedeanyu majeek ea heedeanyu ea mang'awsi, was lealnoocheandeanyu; ang'iing'i gilealnanean jeeda jaliida.

⁴ Aniini gaydaguursa NG'UTAMIIDA, was dea miisa eakghaambiit, ak ghaaghuyi aba heeda weajoodigeasu.

⁵ “Aba gideaba laweajajeega miyeeda nineaweesean, guldeayda ng'asheega munyas ning'udanaan muuwda;

⁶ ghealooniga gheeda miyeeda nineaweesean, ghaseeda miyeeda nifuursean

⁷ “Aba jeeda sawanadeedeanyu geaguursi NG'UTAMIIDA; ak geaguursi ASEETEANYU. Ak ghwayiiy ghuuteanyu aba jeedeaba ghooriidaanyi sibata, ak ghwayiiy iidigaaschi shookeasu.

⁸ “Hean gwasim geaw ng'eanyiida nea ghaboadan; ak gwaduumduum sindeeta humng'eeda nea gwasim geaw, aba gideaba ghwanyareas.

⁹ Ak ghwascheang'da aroosta rinna sareenuukaaschi, nea gwarina ghuutaanyi beasta ajeada; ak ghwayeat rarayga ea ng'ushapta beasta aba ghuutaanyi.

¹⁰ Ghwanung' ghwahiiy geaw humng'eeda, ak ghwararang'aan; ak gwanda hing'eadayda geeshangaaschi misaneeda.

¹¹ Ak gwading'da badayda geeruubajeanda, ak ghang'eata; ak geedeaksa badayda meang'eega jeameeda.

¹² Ghwanung' ghoah misaneeda maheemajeandaanyi, ak ghoah shamooghuutka hees, beega bwatgeat.

¹³ Nea weeshinda mida madeadaanyi gwanda rarayga siiyeat.

¹⁴ Ak ghoaghweandan NG'UTAMIIDA aba humng'eeda, nea geayiiy ghuuta ASEETA hoauur.

¹⁵ Gwahista geatka, ak ghoadaarda saawa; nea dadamandeeda ghwanung' gamng'aw

¹⁶ Ak geadaah ghwanuutka basooda, ghwadaajiit sindeeta ng'eanyiida aba gidareekuteayda NG'UTAMIIDA, aba nyeashta jeameeda sareenuukaaschi.

¹⁷ “Geanung' ghoana humng'eeda, ak ghoang'waanyan, ak gageananean jeeda beega saang'a.

¹⁸ Gwalealnean aba heeda weajoocheandeanyu mideawa uurda, aba heeda fuga sidan; aba gideaba saawa gaburdeawean uurda.

¹⁹ Saawa ghapka dang'uchi eaweeda sawanadeedeanyu, amadu ghaaghuschi NG'UTAMIIDA.

²⁰ Hean gooruunean ak gweanean heeda bwara; gwalealnean, aba gideaba ghabwariinyan.

²¹ “NG'UTAMIIDA ghoamwaaran aba doobiiwnateanyu, aba gidamiyaasta geatingeasu hean gawalu.

²² Aba gideaba naang'waanyi ng'asheega NG'UTAMIIDA, ak ea miidaheeli ASEETEANYU.

²³ Aba gideaba diigheanyeekaaschi gwanda madeedeanyu, nea miidanung'waada deaweedajeagaaschi.

²⁴ Ak ea meeyeateewean ghuut aba madeadaanyi, aba gideaba geaheeleewi geaw munyinda.

²⁵ Ak ea niwalnean NG'UTAMIIDA aba giteena doobiiwnateanyu, aba gideawoosti miy aba madeadaanyi.

²⁶ “Heeda siida doabiiwaat gaywoosa ang'iing'i doabiiwaat, aba alooheeda gajahiimni gideaba gindeawi alooheeda, ak guwoosi miy muuchi aba heeda fuga miyaas;

²⁷ nea aba heeda siida amiidu geaw, gajahiimsiina gideaba guwoosi miy, nea aba heeda fuga sighabwas gajahiimni gideaba guwoosi ng'waan.

²⁸ Nea fuga sisawan gaylealni ang'iing'i ak gheanyangaagu gwanda badahuuka fuga ghwarjeeda, ak giihiing'u ea ghwahidu ng'eanyi.

²⁹ Ang'iing'i guwoosi gheaboong'nyeandeanyu Ea NG'UTAMIIDA, ak gayghoabwaay NG'UTAMIIDA misaneedeanyu.

³⁰ Ang'iing'i gigoonyean uurda jea dang'ucheewa weajoodigeasu nea aba ASEETEANYU gaydaamu danaawa ghamarda.

³¹ ASEETA naweadaanyi ea doabiiwaat; nea heeleesiinda NG'UTAMIIDA ghoahiimu huumeanda; niny igeambooda gil aba heeda fuga salsa niny.

³² “Aba gideaba ASEETA ng'eaha, meakghusa NG'UTAMIIDA? Ak ea lagheaneeda ng'eaha, meakghusa ASEETEANYA?

³³ ASEETA heeda majeek eamng'awsi, ak ea ninung' gaba seayu naweedeanyu.

³⁴ Ak ea ninung' gawuurji geeshangeasu gea mayeanda, hean ghwanung' damiinaada nea geabeayi seayu aba deageaw.

³⁵ Ak ghoanaal geatingeasu ng'ucheeda, ea ghoamu geatingeasu gaksu ghuweang'da oomu.

³⁶ Ang'iing'i nigoonyean igeambooda lealeanoadaang'u, ak ghwanung' weataang'u danyas hawunda.

³⁷ Ak ea nisisi geeshangeasu dageascheeda ameew, nea mii ghwadarasha geeshangeasu;

³⁸ ak geamaseawji weajoodigeasu ak ghaalaschi uhuuda, ea meabiiktani bwadaw bwak ea goosha.

³⁹ Hean ghaalaschi uhuuda goobeedeayi; ak ea maygudu ghoamu ghang'eatng'eat; ak goobeedeaysa jeeda geeshangeasu.

⁴⁰ Ak gigoonyean uurda ng'ucheeda; ea jooriischooda aba heeda weajoodigeasu.

⁴¹ Ak ea ninung' goofuursean weajoodigeasu badahuuka, fugiga sidaniin, ghaalaschi uhuuda nyaawa.

⁴² Hean ghoang'wearda, ak ea manda siida jea gwalealu; ak gooyeawusa NG'UTAMIIDA, ak ea mwasha ghuusiga nyaawa.

⁴³ Hean ghaabwarji gawuurji birjeanda ng'eanyiida, ak ghaadatasti sheang'weeda jeeda naweeda.

⁴⁴ “Ak gilealnanean jeeda ng'alealeeda sea buuneeda; nea ginung' deambal eemoojiga; ak gagadiyeesean fuga mwanalaan.

⁴⁵ Fuga was rabasta gamearmearanean; iinyas iiteanyu, gwasinnean mureeda.

⁴⁶ Nea rabasta nibur iheenga nyaawa, ak gaygwarina gealga nyaawa nea ghaboadanaan.

⁴⁷ “NG'UTAMIIDA gwandeawa eaweega; gagasa eebadiischeesa lagheaneedeanyu, gagasa eakghaambiit ASEETEANYU, was lagheaneeda lealeanoodeanyu,

⁴⁸ was ASEETA goonan waldeayda mureandooda ak ghwayiin buuneeda hing'eadaydeanyu,

⁴⁹ ak gooruunean jarooda aba jeeda weajoodigeasu; hean gidingean heetiyeada daneawna weajoodigeasu, ak giighuuyaan aba heeda fuga jala.

⁵⁰ “Aba nih gaydabadiischooweey, Ea NG'UTAMIIDA, aba bugusta eemoojiga, ak geasarmanyi duumda giigheambiita aba gheawungaagu.

⁵¹ Ghoadaw sugoocheandaanyi lealeanooda haw, ak goohiimsa bariinyeagaaschi bea huumwa siidaanyi simwaar, Dawdi ea jeacheangaaschi damanda manda muudeanooda.”