2 SAMWELI 19 - Bibliyeeda Ghaydit

Yoabu goowoowsa Dawdi

¹ Ng'ata geeyeesha Yoabu, “Ng'ula, sugoocheanda gooyeawda nea gagiisan aba badayda Absalomu.”

² Ak ghwayamwa jooriischooda nyaawa aba ng'ucheeda ghoah giiseaneega aba heeda buuneesean; aba gideaba ghwayiiy buuneesean eaweedida gideaba, “Sugoocheanda gagiisan aba badayda orjeedaanyi.”

³ Ak ghafuy geat buuneeda eaweedida ak gaweay jeeda mujiini gawuurji fuga bwaspwas fuy geat damanda mang'aw aba ng'ucheeda.

⁴ Hean gwadukuta sugoocheanda gheanyangaaschi, ak gooyeawda sugoocheanda nea goojuur, “Ea orjeedeanyu Absalomu, Ea Absalomu, orjeedeanyu, orjeedeanyu!”

⁵ Ng'ata ghwaan Yoabu jeeda gheeda heeda sugoocheanda, ak gwayeesha, “Eanean nibwaspwas gheanyanga fugaagu sean bea gadiyeeda, gwachi aghu gurooroadaang'u askweareani, ea eaweega orjoagaagu ea haweagaagu, ea eaweega gadeemgaagu ea gwealajeagaagu,

⁶ aba gideaba gibwariinyi fugiga sinyiin nea gisti fugiga bwariinyiin. Aba gideaba nidaajiidi askweareani gideaba shirikareeda hees ea fuga gadiyeeda mii gili aba headaang'u, aba gideaba askweareani neajeeng'u gideaba gwachi Absalomu iimajeek gwachi gajeemeewa eesa sean askweareani, ak gwachi gayghwadoabiiw aba headaang'u.

⁷ Asi ng'eada ghamneawa, ak giriti abaloola fugaagu bea gadiyeeda nea giijiileesi; aba gideaba aniini ghaayaaji habeawooda aba badayda NG'UTAMIIDA, aba gideaba iimuwani, ea manda siida jea mideawana eaweani; ak gaygamunyiit ng'asheanji aba headaang'u ea ghwanaawa ng'asheega sean munyas ghayi ninyasi ghang'eada hisiindaang'u bea heeda ea ghoah ghamneawa.”

⁸ Hean ghang'eat sugoocheanda, ak goopteada aba dooshta. Ak geerukusa buuneesean gideaba, “Ang'ula, sugoocheanda goopteada aba dooshta”; ng'ata ghapka buuneesean madeeda sugoocheanda. Aba damandida fuga Israeli niba siisi mang'awsa gheanyi.

Dawdi gwareapshi aba biikteayda Yerusalemu

⁹ Muchu ghwajal buuneesean bea dooshinga Israeli, nea gwayi, “Sugoocheanda gooruunaneasa geatinga weajoodigaasa, ak gwalealnaneasa geatinga fuga Filisti; ak ghamneawa ea nimng'aw aba jeeda ng'eanyiida aba madeeda Absalomu.

¹⁰ Nea Absalomuheeda ghayi simwaarji goombaleasa, ea nimeewsa ng'ucheeda. Asi ghamneawa ghwasaan inyas mirukuni gil aba giideelnooda sugoocheanda?”

¹¹ Ak ghwanung' sugoocheanda was Dawdi gawa iita heeda Sadoki ea Abiyatari was ashoohoodiga nea gwayeesha, “Eeshiina gweargwa Yuda, ‘Ghwasaan inyas agooga gajahuuwa fuga huuydean aba giideelnooda sugoocheanda ghwaan gheanyi, nea nihidu ng'asheanda Israeleesean heeda sugoocheanda?

¹² Agooga goowooschi buweadeegeasu, goowooschi geakeasu ea foojeandeanyu; abeeda ghwasaan inyas gajahuuwa fuga huuydean aba giideelnooda sugoocheanda?’

¹³ Ghwalamda ak gwayeesha Amasa, ‘Ang'iing'i muwoosi geapkeedeanyu ea saseedeanyu? ASEETA sinnean ng'asheanji, ea suuk gaasaang'a, iimuwoosi ghamneawa shirikarajeanda haw bea lugoodeanyu aba hoorgeeda Yoabu.’”

¹⁴ Ak ghwasat ng'asheagaaschi gurooruunatka fuga sean gaweesa ng'asheanda ak ghwanung' gawuurji siyagi; ak ghwanung' gaweesa ng'asheanda sugoocheanda ak gwayeesha, “Biikni ang'iing'i sea fugaagu sean bea gadiyeeda.”

¹⁵ Hean gabiigu sugoocheanda Yordani; ak ghwahidu Yuda Gilgali gwaroonyi sugoocheanda ak gweadu sugoocheanda googeawna Yordani.

¹⁶ Ng'ata ghwalamwach geaw Shimeyi was orjeeda Gera, bea dooshta Benjamini, leabu ng'eanyiida Bahurimu, ak ghwararang'aan sea fuga Yuda gwaroonyi sugoocheanda was Dawdi;

¹⁷ nea goodeana fih sagalama bea eemeeda Benjamini. Ak ghwahidu eara Siba was siida gadiyeeda fuga gheeh Sawli, nea gwandeawa orju damanamuut ikaaschi sea fugaaschi bea gadiyeeda diktam, ak gwasalda gaweay Yordani goosheedeawa sugoocheanda,

¹⁸ ak ghoaghaawa ghealooda ak gweadu fuga gheeda sugoocheanda, ak gwasin gidagasa sugoocheanda. Ak ghoabeada Shimei was orjeeda Gera aba madeeda sugoocheanda, damanda riikghta ghoaghaawa Yordani,

Dawdi goohiimsa Shimeyi baydeayda

¹⁹ ak gwayeesha niny sugoocheanda, “Gidabal ea mwanung' ng'utamiideanyu doaw siida mideawa giidiinyeanda ghana ghoapkaat gida adiiyda siidaang'u bea gadiyeeda aba eaweeda beawa ng'utamiideanyu was sugoocheanda aba Yerusalemu; gagasa ea mwayiina sugoocheanda uhuudaanyi.

²⁰ Aba gideaba siidaang'u bea gadiyeeda ghwanal gideaba nisin riing'eeda; asi, ng'ula, aniini naawunyi askweareani, was duweacheedeaba sean bea gheeh Yosefu ghaawunyi daroonyi ng'utamiideanyu was sugoocheanda.”

²¹ Hean ghwasha Abishayi was orjeeda Seruya ak gwayeesha, “Neada Shimeyi ea majeenuus aba ng'asheanji, aba gideaba ghamwaashta NG'UTAMIIDA simwaari?”

²² Ghwalamda Dawdi ak gwayeesha, “Aniini gaydasimaneey naaha, agooga orjooga Seruya, bwak ea ahuwa weajoodigeasu askweareani? Neada gwanda siida wassean jea eenuus askweareani aba Israeli? Aba gideaba askweareani aniini neada ea mwaanali gideaba geawooschi sugoocheanda Israeli?”

²³ Gwayeesha sugoocheanda Shimeyi, “Ang'iing'i maymeawa.” Ak gweaksa sugoocheanda habeawooda.

Dawdi ghabwayda Mefibosheti

²⁴ Muchu ghwahidu Mefibosheti was orjeeda Sawli gwaroonyi sugoocheanda; nea miigoohuun geeshangaaschi, nea mii ghwareakghu deamuukaaschi, ghana goohuun hang'weakaaschi, ghang'eada damanda ghayi beawa sugoocheanda ea ghwahita eaweeda biikna sugoocheanda nea gaba seayu.

²⁵ Hean damanda wuna Yerusalemu gwaroonyi sugoocheanda, ghwalamda sugoocheanda ak gwayeesha niny, “Ghwasaan ang'iing'i inyas meeteayeeni sea aniini, Mefibosheti?”

²⁶ Ghwasha nea gwayeesha, “Ng'utamiideanyu, Ea sugoocheanda, gwareenganean siideanyu bea gadiyeeda; aba gideaba gwayeesha siidaang'u bea gadiyeeda niny, ‘Gooynean digeeda, ak geading'di ak geeteayi sea sugoocheanda.’ Aba gideaba siidaang'u bea gadiyeeda gaba bada.

²⁷ Niny nibeash siidaang'u bea gadiyeeda aba heeda ng'utamiideanyu was sugoocheanda. Iidu ng'utamiideanyu was sugoocheanda gawuurji malaykajeanda ASEETA, asi sina gididaahi gideaba aamiy aba headaang'u.

²⁸ Aba gideaba fuga ghaheanya sean gawuurji fuga meewa aba madeeda ng'utamiideanyu was sugoocheanda; amadu giyiin siidaang'u bea gadiyeeda jeeda fuga agiischi aba badayda measeadaang'u. Abeeda ghwadoabiiwiini aba heedeanyu, jea ghwanung' deayeawusa sugoocheanda?”

²⁹ Ng'ata ghwalamda sugoocheanda ak gwayeesha niny, “Ghwasaan inyas gudu rukuni ng'asheega badaydaang'u? Gaydasin aniini: ang'iing'i ea Siba gajalacha ng'eanyiida.”

³⁰ Gwayeesha Mefibosheti sugoocheanda, “Ghwahit, nung'waada gageanda niny sean, iinukwa nibiigu ghoah ng'utamiideanyu was sugoocheanda nea gaba seayu.”

Dawdi goohiimsa Barsilayi baydeayda

³¹ Abeeda gudugwahidu Barsilayi bea eemeeda Gileyadi nea gwaleabu Rogelimu; ak goodeayi sea sugoocheanda ea ghwahita Yordani, ak ghoadoabiiw ghwanung' ghoaghaawa Yordani.

³² Abeeda Barsilayi niwaasiit muuchi, nea gaba gweanyeew seedam; nea abeeda ea niidaw sugoocheanda hamita aba damanda mideewa Mahanaimu; aba gideaba niny siida baruur muuchi.

³³ Hean ghwalamda sugoocheanda ak gwayeesha Barsilayi, “Beeni eakghaawa sea aniini, ak gaydaarearnyi aba Yerusalemu.”

³⁴ Ghwalamda Barsilayi ak gwayeesha sugoocheanda, “Neada askwearjoojiga eaweegeasu ea gudughwashoada suh deanaan, bwak ea deadeayi sugoocheanda Yerusalemu?

³⁵ Aniini ghamneawa geabeayi gweanyeew seedam; gaydaamu deaheeli gidamiy ea gidamuyi? Neada siidaang'u bea gadiyeeda ghoamu gwasamu gidak ghana gidaleahi? Gaydaamu dealeeysiit ghuusiga headiga sarman ea dea gadeemga sarmani? Abeeda ghwasaan inyas gayghoahaat siidaang'u bea gadiyeeda sareenda ng'utamiideanyu was sugoocheanda?

³⁶ Siidaang'u bea gadiyeeda gagasa ghoaghaawa gilimwanang' Yordani sea sugoocheanda. Abeeda ghwasaan inyas gaygagoonan sugoocheanda gidahaw deenu?

³⁷ Geamuscheey nung' gabiikta siidaang'u bea gadiyeeda, ak abeeda geameewsi jeeda mujiineedeanyu, murdeeda bung'eeda bwaabwa ea iyya. Ak ea nukwa siidaang'u bea gadiyeeda was Gihamu; nung'waada ghoaghaaw sea ng'utamiideanyu was sugoocheanda; ak gisisi niny gididaahi ang'iing'i gideaba ghwahit.”

³⁸ Ng'ata ghwasha sugoocheanda nea gwayeesha, “Gaydaaghaaw aniini sea Gihamu, ak gaydasissa niny gida wassean aadaayi gideaba ghwahit aba headaang'u; ea haleanjeeda sean igasayi aba heedeanyu gaydasineey.”

³⁹ Hean ghoaghaawa buuneesean Yordani, ak ghoaghaaw sugoocheanda; ak ghwasam sugoocheanda gheata Barsilayi ak ghoadaw ghawooda, ak ghwayam geaw gabiikta ghoah.

Yuda ea Israeli gwajalsa badayda sugoocheanda

⁴⁰ Ak ghang'ata sugoocheanda gawa Gilgali, hean goodeayi Gihamu sea niny; nea ghoadoabiiw buuneesean bea Yuda, ak eara hamarjeemba fuga Israeli, ghoaghaaw sea sugoocheanda ak goodeayi.

⁴¹ Ng'ata ghapka buuneesean bea Israeli heeda sugoocheanda, ak gwayeesha sugoocheanda, “Ghwasaan buweadeagaasa was fuga Yuda inyas gwajagwanyi, ak ghwaat sugoocheanda sea fugeaba gheanyi ak ghoaghaawa Yordani, sea buuneesean bea Dawdi sea niny?”

⁴² Ak ghwasha buuneesean bea Yuda ghuusiga fuga Israeli nea gwayeesha, “Gweagu gideaba sugoocheanda ea neekeewa buweadeagaasa. Abeeda ghwasaan inyas ghoanyareaschi aba badaydeaba ng'asheanji? Neada aseasa ea siyaaji gida wassean bea sugoocheanda? Ghana nigooneasa gida wassean?”

⁴³ Ghwalamda fuga Israeli ak gwayeesha fuga Yuda, “Aseasa geendeawi ng'asheega sigasayi niba damanamughuush aba heeda sugoocheanda, ak eara aba heeda Dawdi geeburdeaweegwa agooga. Abeeda ghwasaan inyas goofooleasa? Neada ea meewoosi fuga madeeda rugu giideelnooda sugoocheandeanya?” Ak gang'weaniidi ng'asheega fuga Yuda ea ghwanaawa gea fuga Israeli.