2 SAMWELI 18 - Bibliyeeda Ghaydit

Absalomu geajoar ak geabwar ghami

¹ Ng'ata gwayiida Dawdi fuga mideawa, ak goombiit shirikareeda hees ambala fuga nyiit sagalamnyoojiga ea gea ambala bughalajeega.

² Ak ghwanung' Dawdi gaweay lugooda, nea nibwaash geenga ghoah samwagu, geahagi goombal shirikarajeanda haw siguura Yoabu, nea geedeaba iyeenya goombal shirikarajeanda haw siguura Abishayi was orjeeda Seruya, was orjeeda geenyea Yoabu, nea geedeaba samwagu ghwanung' goombal shirikarajeanda siguura Itayi bea eemeeda Giti. Ak gwayeesha sugoocheanda buuneeda, “Eara aniini gajeeteayeena sea agooga.”

³ Ghwalamda buuneeda ak gwayeesha, “Ang'iing'i majuna. Aba gideaba iisimng'awji, ghanyea maygwaduupeasa saawa. Eara ealach bugusteanya eeteenyi ak gameewa meatkweanagi, ghanyea maygwaduupeasa saawa. Aba gideaba ang'iing'i ging'ali fih sagalamnyooji damanamughuush aba jeedeanya; ghang'wana abeeda ginung' eeweaya aseasa eaweada mujiini.”

⁴ Ghwalamda sugoocheanda ak gwayeesha saawa, “Gidoadaayi gideaba ghwahit aba heedeang'wa gaydasin.” Hean ghamiinaada sugoocheanda aba murdeeda huwaneeda, nea ghang'ata lugooda nea gabadiina bughalajeega ea gea badiina sagalamnyoojiga.

⁵ Ak gwarukusa sugoocheanda Yoabu ea Abishayi ea Itayi gideaba, “Asisiina ng'asheega miyaasiin Absalomu aba badaydeanyu.” Ak gwayiing'shi buuneesean damanda rukusiina sugoocheanda shirikareadaanyi sean hees iita Absalomu.

⁶ Hean gaweay lugooda dareapcheeda gang'uchi sea Israeli; ak geeng'ucheesa dareabeeta Efraimu.

⁷ Ak geajoar fuga Israeli aba hoowa nea ghwajoar fuga gadiyeeda Dawdi, ak ghwasaang'ayiit muscheeka eaweedida, ak ghwahita fih sagalamnyooji diktam.

⁸ Ak gwaheedu ng'ucheeda ea gwadarsa badayda ng'eanyiisean; ak gwaduulu dareabeeta buuneeda ea ghwanaawa fuga asha aba ng'uta.

⁹ Iidu aba gheamamda gwaroonyi Absalomu sea fuga gadiyeeda Dawdi. Abeeda Absalomu gwading'da badayda nghataanyi, ak gawa nghata jeeda damealga hees bea geeta haw was sabiida, ak ghaghas gheata sabiida, ak geenung'wa heeda nea ghabwardaghaat ak ea maba humng'eeda nea maba ng'eanyi, nea ghabwaakghta nghata gwachi ding'da.

¹⁰ Ak gwadeagu siyagi, ak gwarukusa Yoabu gideaba, “Ng'ula, aniini ghaadaayi Absalomu nea ghabwardaghaat aba uhuuda sabiida.”

¹¹ Ghwalamda Yoabu ak gwayeesha siidida rukusa ng'asheandean gideaba, “Ang'iing'i, nidaahi ng'asheanji! Abeeda ghwasaan inyas milasi ea gawa ng'eanyi? Gwachi gaydahoosan ak geagoonyeey shiliingaji damanamughuush ea inyeashta.”

¹² Ghwalamda siida ak gwayeesha Yoabu, “Eara gwachi goobissa geatindeanyu shiliingaji sagalama, maydeaheaksa geatindeanyu orjeeda sugoocheanda; aba gideaba geayiinyi nea gwarukuneey sugoocheanda ang'iing'i ea Abishayi ea Itayi gideaba, ‘Adiidu gisawani Absalomu aba badaydeanyu.’

¹³ Nuut gicha, iineasinyi ng'asheega munyas ak ghaabwarji (abeeda ea maygwanda gichea ea funyaat aba heeda sugoocheanda), ak gwachi ea mayweadaan.”

¹⁴ Ghwalamda Yoabu ak gwayeesha, “Aniini mwammuusi deameas ak geabalooleey nea goosha aseeta.”

¹⁵ Hean gaweay fih damanamughuush was fuga sareeni dabita ng'ucheeda bea Yoabu, ak gwaneaweesa Absalomu ak ghang'ut, ak ghabwar ghami.

¹⁶ Ng'ata ghaghuut Yoabu durumbeati, ak gabiikna lugooda eata geeshta fuga Israeli; aba gideaba ghoaghuum Yoabu buuneeda.

¹⁷ Ak gageanda saawa Absalomu, ak gwajaksa jeeda shoomanda haw aba jeeda dareabeeta, ak geemuguushsa badaydaanyi dulgwajeanda haw bea lagheanga; ak gamng'aw Israeleesean ak gaba siisi gheanyi.

¹⁸ Nea Absalomu damanda waseewa majeek ea nigeanu ak gamiindeaysa geaw daraneeda mida jeeda moangoachiyda sugoocheanda, nea gwayi, “Aniini meandeawani orjeeda jea gahuuw gheawungeasu ak ghwanung' eepkeadi”; ak gang'asa daraneedida gheawungaaschi, ak geeguura daraneeda Absalomu ea ghoah ghamneawa.

Dawdi geerukusa miyeeda Absalomu

¹⁹ Ak gwayi Ahimasi was orjeeda Sadoki, “Gaydafwach, ak ghaadawji sugoocheanda iita gidawaldeayda NG'UTAMIIDA mureandooda aba heeda weajoodigaaschi.”

²⁰ Hean ghwalamda Yoabu ak gwayeesha niny, “Ang'iing'i muwoosi siida jea ghwaat iita askweareani; gajaada iita eaweecha nuut, duuku askweareani ea mwajaada iita, aba gideaba orjeeda sugoocheanda nimi.”

²¹ Ng'ata gwayeesha Yoabu siida Gushi, “Una, ak girukusi sugoocheanda gididaahi.” Ak ghwahiiy geaw siida Gushi aba madeeda Yoabu, ak ghafwach.

²² Gabiikta Ahimasi was orjeeda Sadoki ak gwayeesha Yoabu, “Meaduupi gichea ghwahidu wassean, nung'waada eara aniini dafwach damaseaw siida Gushi.” Hean gwayeesha Yoabu, “Ghwasaan inyas gayfwaja, orjeedeanyu, nea ghanyea manda gichea nyasa aba iidi?”

²³ Gwayi, “Giduurji sean, gaydafwach.” Gwayeesha, “Asaha, fwaja.” Hean ghafwach Ahimasi nea gwasik naweeda mooheeda, ak ghwasuut siida Gushi.

²⁴ Abeeda Dawdi goopteada aba dageascheeda dooshinga assiyeenya; ak gwading'da furiischoocheanda uhuuda ghamarda ak ghamiinaada aba heetiyeada deaschi ghuuta dooshta, hean gagatkat gheanyangaaschi ak ghoang'wearda, ghwadaah siida fwach nea gabwageaw.

²⁵ Ak gaguurda furiischoocheanda ak gwayeesha sugoocheanda. Ak gwayeesha sugoocheanda niny, “Iibwageaw, abeeda gwanda ghuutaanyi iita jea gwarugu.” Hean gafaju ak gwaneekiit.

²⁶ Ak ghwadaah furiischoocheanda siinuut nea gafaju; ak gaguursa furiischoocheanda dea fura dooshta ak gwayeesha, “Daaha, siinuut gafaja nea gabwageaw!” Gwayeesha sugoocheanda niny, “Eara niny gweadu iita.”

²⁷ Ak gwayi furiischoocheanda, “Iyeang'ulayi aniini siida gwachi bea madeeda fwach ghafwachta Ahimasi orjeeda Sadoki.” Ak gwayi sugoocheanda, “Niny siida miyi, ak gweadu iita miy.”

²⁸ Ng'ata gaguurda Ahimasi ak gwayeesha sugoocheanda, “Ng'asheega sean ghwahit.” Ak gwatkuy aba madeeda sugoocheanda ea ghang'uda gheamamdaanyi ng'eanyi, ak gwayi, “Gagasa eebadiischeesa NG'UTAMIIDA was ASEATAANG'U, ghayi adayda fuga aheaksa geatinga nyaawa ng'utamiideanyu was sugoocheanda.”

²⁹ Hean ghwalamda sugoocheanda ak ghoanyaashta gideaba, “Orjeeda was Absalomu gaba seayu?” Ghwasha Ahimasi ak gwayeesha, “Damanda ajeakteawa Yoabu siidaang'u bea gadiyeeda, ghayiinyi nyeashta haw, ak ea mwaanali gidawas.”

³⁰ Ghwalamda sugoocheanda ak gwayeesha, “Yamwa geaw, ak gimiinaadi aba hiji.” Hean ghwayam geaw, ak ghamiinaada.

³¹ Asi ng'ula, deagheata ghwahidu siida Gushi; ak gwayi siida Gushi, “Geandeawi iita miy jea daadaw ng'utamiideanyu was sugoocheanda! Aba gideaba niwalda NG'UTAMIIDA mureandooda askweareani aba uurjeenga buuneesean gasa gang'ucheeweey.”

³² Hean ghwalamda sugoocheanda ak gwayeesha siida Gushi, “Orjeeda was Absalomu gaba seayu?” Ghwasha siida Gushi nea gwayeesha, “Gidabal weajoodiga ng'utamiideanyu was sugoocheanda, sea fuga sean gasa gang'ucheeweey, gawuurji orjeedida.”

³³ Hean gwadeawiit muuchi, ak gawa jeeda ghooriida mida heetiyeada was ghuuta dooshta, ak gooyeawda; nea damanda beawa, gwayi, “Ea orjeedeanyu Absalomu, orjeedeanyu, orjeedeanyu Absalomu! Anda gwachi mwameawi aba hoorgeadaang'u!”