2 SAMWELI 14 - Bibliyeeda GhayditYoabu goodiing'diing'da aba biiknooda Absalomu 1 Ng'ata gwajeeng'u Yoabu was orjeeda Seruya gideaba guroorooda sugoocheanda gagal Absalomu. 2 Ak goojeakta Yoabu buuneeda gaweay Dekowa, gagasa aba hoowa gatmooda was weaghoocheanda, ak gwayeesha niny, “Hinda geaw gili meawaneey siyeeda, ak giikweali eagweega barakta; ak ea adiyeashti nagheeda, ak gisini geaw uurjeewana gatmooda goola eameawa; 3 ak guwi heeda sugoocheanda, ak girukusi niny ng'asheesu.” Hean ghwayiin Yoabu ng'asheesu ghuuta gatmooda. 4 Iidu nea ghwahita gatmooda leabu Dekowa heeda sugoocheanda, ghoabeada nea ghabwada jih ng'eanyi, ak gamus, nea gwayeesha, “Weadaan, Ea sugoocheanda.” 5 Ghwalamda sugoocheanda ak gwayeesha gatmooda, “Ang'iing'i gwasawanyiini?” Ghwasha nea gwayeesha, “Siida haw, aniini geawooschi masiinung'weanda; nimi siyeedeanyu. 6 Nea hudaang'u bea gadiyeeda gaba orju iyeenya, ak gwajala aba madamnyeanda; ak ea manda siida jea gooheeli saawa, ak ghwalas akaleala niirja ak ghami. 7 Ak ghamneawa ea ninyareeksa buuneesean bea ghoah hudaang'u bea gadiyeeda, nea gwayi, ‘Aruuni siidida gwachi bwar orjeeda ghaamwadiin, ak geabwarji niny ghami aba eaweega orjeeda ghaamwat bwar’; ak abeeda geegeanda eara hearaniischooda. Abeeda isin ng'asheanji ea maygudu dandeawa baleanda, ak ea maygwanda siida jea ghwaroap gheawunga siyeedeanyu ghana siichea ghoabinaan aba badayda ng'eanyiida.” 8 Hean ghwalamda sugoocheanda ak gwayeesha gatmooda, “Una gheang'u, ak gaydasineey ng'ashaan.” 9 Gwayeesha gatmooda ng'eanyiida Dekowa sugoocheanda, “Gagasa goobiida badaydeanyu giidiinyeanda, ng'utamiideanyu was sugoocheanda, ea ghaheanya; gidabal ea mandeawana sugoocheanda ea hoorgeadaanyi giidiinyeanda.” 10 Ghwalamda sugoocheanda ak gwayeesha, “Asi iirukuneey siida ng'ashaan, abeeda giyeadu niny heedeanyu, ak abeeda ea maygudu gabiikta ghwasanyi.” 11 Ng'ata gwayeesha gatmooda niny, “Musa ghoapkaat sugoocheanda NG'UTAMIIDA was ASEATAANG'U, ak abeeda siida walda mureandooda aba foojeanda ea mudu gabiikta gwasin giidiinyeanda ak ghabwar orjeedeanyu nuut.” Gwayeesha, “Aba gidabiideata NG'UTAMIIDA, manda buudeanjagi bea orjeedang'u jea goobissa ng'eanyi.” 12 Hean ghwalamda gatmooda ak gwayeesha, “Geamuscheey nung' hudaang'u bea gadiyeeda gwarukusa ng'asheanda ng'utamiideanyu was sugoocheanda.” Gwayeesha, “Baloola.” 13 Gwayeesha gatmooda, “Ghwasaan inyas gibadayi sinoodeaba ng'asheanji aba badahuuka fuga ASEETA? Aba gideaba aba sinoodeaba ng'asheanji gawuurji gili nisin sugoocheanda gidamuy, aba gideaba nih goodeelu sugoocheanda orjeedaanyi gabiikna mang'awanda ghwaan ghoah gicha. 14 Aseasa gajeemeewa eesa sean, geewuurjeewi beega weayeesa ng'eanyi, mwoamu eebiikta eeramu gicha; nea ASEETA ea maygageanda eaweega iissa gayghoapkaat ng'asheega sirukusa ak gayghwanyas sugoocheanda gichea goodeeldeayda siida mang'aw. 15 Asi ghamneawa ghaawunyi darukusa ng'asheanji ng'utamiideanyu was sugoocheanda aba gideaba ninung' buuneeda dabeal; ak ghaghay hudaang'u bea gadiyeeda gideaba, ‘Aniini gaydeabalool sugoocheanda; abeeda gwadeepa gwasin sugoocheanda gidarukusa siidaanyi bea gadiyeeda. 16 Aba gideaba gayghwayiiy sugoocheanda, ak gageandeawa siidaanyi bea gadiyeeda geatinga siida jea ghabwaran sea orjeedeanyu aba hearanda aba heeda ASEETA.’ 17 Ak geayi aniineeda was hudaang'u bea gadiyeeda, ‘Ng'asheanda ng'utamiideanyu was sugoocheanda gayghwanung' dahawda’; aba gideaba ng'utamiideanyu was sugoocheanda gawuurji malaykajeanda ASEETA ak gooheeldooschi ng'asheega miyaasiin ea gea munyas. Gagasa mideawana NG'UTAMIIDAANG'U was ASEETA!” 18 Ghwalamda sugoocheanda ak gwayeesha gatmooda, “Adiidu gifunyanaan ng'asheanda wassean jea daanyaashnyi.” Hean gwayeesha gatmooda, “Gagasa gwarugu ng'utamiideanyu was sugoocheanda.” 19 Gwayeesha sugoocheanda, “Neada geatinda Yoabu ea mindeawani aba ng'asheesu seaniini?” Ghwalamda gatmooda ak gwayeesha, “Aba huumwa gidiibiideati, ng'utamiideanyu was sugoocheanda, manda siida jea gwayamsa geaw geatinda dugwa ghana dea ghaadaam jea ghwashaang' gida wassean rugu ng'utamiideanyu was sugoocheanda. Gwarukunean siidaang'u bea gadiyeeda was Yoabu; niny siida iin ng'asheesu seaniin ghuuta hudaang'u bea gadiyeeda. 20 Ng'asheesu gwasin siidaang'u bea gadiyeeda was Yoabu ghwayam ng'asheanji. Iidu gwandeawa ng'utamiideanyu weaghuumeeda uurji weaghuumeeda malaykajeanda ASEETA ghwanal ng'asheega sean mida badayda ng'eanyiida.” 21 Ng'ata gwayeesha sugoocheanda Yoabu, “Ng'ula ghamneawa, neasinyi ng'asheanji; una, ak giideelu gheareemaneeda was Absalomu.” 22 Hean ghoabeada Yoabu nea ghabwada jih ng'eanyi, ak gamus, nea ghoadaw sugoocheanda ghawooda; ak gwayeesha Yoabu, “Eanean ninal siidaang'u bea gadiyeeda gideaba ninyas alooheeda aba madeeda gheanyangaagu, ng'utamiideanyu was sugoocheanda, ak aba ng'asheanji ea niidaw sugoocheanda siidaanyi bea gadiyeeda gidagasa.” 23 Hean ghang'eat Yoabu ak gawa Geshuri, ak gweadu Absalomu Yerusalemu. 24 Ak ghwalamda sugoocheanda ak gwayeesha, “Nung'waada ghwasajaada ak goobiida gheanyi nea gaba geaw; amwadaah gheanyangeasu.” Ng'ata goobiida Absalomu gheanyi nea nisach geaw, ak ea mwaani madeeda gheanyanga sugoocheanda. Absalomu geetuupchi sea Dawdi 25 Iidu ea manda eara siyagi sam Absalomu aba alooheeda jea eaghwar aba jeeda buuneesean bea Israeli; ghang'eada baneakta geeshtaanyi ea ghwahita uhuudaanyi manda gidamuy jea eerukuna badaydaanyi. 26 Nea iissa iireakghu uhuudaanyi ea manda heeda muy (aba gideaba iissa Iinyo goosha gweayda ghwareakghu uhuudaanyi; iissa iisaang'ayiit aba uhuuda ghwareakghu) ak goodeen buudeega uhuudaanyi, aba shiliingaji bughalaji iyeenya aba gidadeeniida sugoocheanda. 27 Ak gwaji Absalomu orju samwagu, ea hudagi siguura gheawungaaschi Damari; ak ea gatmooda miy gil. 28 Ng'ata goobiida Absalomu Yerusalemu gweanyeeksu muguuri iyeenya, nea mwahina madeeda sugoocheanda. 29 Muuchi goojeaksa Absalomu Yoabu, ak ghwanung' gaweesa sugoocheanda; ak ea mwaani Yoabu headaanyi. Ak gabiikta goojeaksa deabiyeenya, ak ea mwaani Yoabu. 30 Hean gwayeesha fugaaschi bea gadiyeeda, “Adaaha madamnyeanda Yoabu gabageaji sea deanyu, ak gwandeawa ngaano aba hoowa; asi una ak ging'udi beasta.” Ak gageanu fuga gadiyeeda Absalomu ak ghang'uda beasta. 31 Ng'ata ghang'eat Yoabu ak gaweesa Absalomu aba gheanyi, ak gwayeesha niny, “Ghwasaan inyas fugaagu bea gadiyeeda ghang'uda madamnyeandeanyu beata?” 32 Ghwasha Absalomu ak gwayeesha Yoabu, “Ng'ula, neajeeng'u ng'asheanda headaang'u, ‘Beeni hiji, ak gaydeajeaktaneey una heeda sugoocheanda, ak giinyaashi, “Ghwasaan aniini inyas gealeabu Geshuri? Gwachi gayghang'wana gideaba geandi hoowa eara ghamneawa.” Asi ghamneawa nung'waada dawa heeda sugoocheanda; amadeepa gwanda heedeanyu gidamuy, abeeda ea danuusean.’” 33 Hean gawa Yoabu heeda sugoocheanda, ak gwayeesha niny; gwarukusa niny ng'asheesu; hean gaguursa Absalomu. Ak ghwaan heeda sugoocheanda, ak gwahiing'sa geaw ea ghwahita gheamamdaanyi ng'eanyi aba madeeda sugoocheanda; ak ghwasam sugoocheanda gheata Absalomu. |
The Bible in Datooga © Bible Society of Tanzania, 2015.
Bible Society of Tanzania