2 SAMWELI 12 - Bibliyeeda Ghaydit

Giijasta Natani ea duukuunooda Dawdi

¹ Iimuchu goojeakta NG'UTAMIIDA Natani gaweesa Dawdi. Ghwahidu headaanyi, ak gwayeesha niny, “Gwanda fih iyeenya jeemba mujiinajean, ak ea baruur akaleala nea niirja ea bwarbwar.

² Nea siidida baruuriin gwandeawa hawaniga nooga ea dugwa;

³ nea siidida bwarbwariin ea mandeawana gil geaghus dayeeneanjagi bea gisilga was ijooda, ghayi shaah. Ak ghoahaaghwa, ak gwaheeduudayi sea niny ea diibigaaschi; ak ghoareara raghastaanyi, nea gwaleehiida gweeriidaanyi, ak ghwanung' gwaroocha daghataanyi, ak ghwanung' gawuurji hudaanyi.

⁴ Ng'ata ghwahidu siida was bareanoocheanda heeda siida baruur, ak ghaheawa gageanu gisilleanjagi aba jeeda noagaaschi ghana aba jeeda dugwaaschi gwanuuksa rabascheanda wuuh gheanyi, ng'ata gageanu gisilleanda siida bwarbwar, ak gwanuukusa rabascheanda wuuh gheanyi.”

⁵ Hean ghwanyareas Dawdi muuchi aba badaydeaba siidida, ak gwayeesha Natani, “Gidabiideata NG'UTAMIIDA, siida sin ng'asheanji gammiisa miyeeda;

⁶ ak gayghoaghiis gisilleanda niba ang'wan, aba gideaba gwasin ng'asheanji, ea gideaba mandeawana baydeayda.”

⁷ Gwayeesha Natani Dawdi, “Siida ang'iing'i. Asi gwarugu NG'UTAMIIDA, was ASEETA Israeli, ‘Aniini ghaamwaarjeey huwa sugoocheanda jea goombal Israeli, ak ghaaghuuhaneey geatinga Sawli;

⁸ ak geagoonyeey gheeda siidaang'u haw, nea gadeemga siidaang'u haw ghayiinyi daghataang'u, ak gagoonyi gheeh Israeli ea gheeh Yuda; nea suh iideepa ea ng'ay, gwachi gaydeaheaneey gea saang'a naawda.

⁹ Ghwasaan ang'iing'i inyas gifooli ng'asheanda NG'UTAMIIDA, ak gisini gidamuy aba madeadaanyi? Ak gibwari Uriyaheeda eemeeda Hiti aba ng'uta, ak gageanda gatmoadaanyi ak ghaghi, ak gibwari ng'uta fuga Amoni.

¹⁰ Asi ghamneawa ng'uta maygwaheeli gheang'u, aba gideaba nifoolean, ak ea nigeandi gatmooda Uriyaheeda eemeeda Hiti ghoah gatmoadaang'u.’

¹¹ Asi gwayi NG'UTAMIIDA, ‘Ng'ula, gaydanung' ghwahidu headaang'u ng'asheega munyas jea gwarina jeedeaba gheang'u ang'iing'i; ak gaydageanda gadeamgaagu aba madeeda gheanyangaagu, ak ghaadawji giischeewoocheandaang'u, ak gaygwaluudayi sea gadeemgaagu aba madeedeaba aseedeeni.

¹² Aba gideaba gisini ng'asheandida aba makcheameeda; ak gaydasin ng'asheanji aba madeeda fuga sean bea Israeli, ea aba madeeda aseeta.’”

¹³ Ghwalamda Dawdi ak gwayeesha Natani, “Aniini neasinyi riing'eeda aba madeeda NG'UTAMIIDA.” Hean gwayeesha Natani Dawdi, “Eara NG'UTAMIIDA nigeanda riing'eadaang'u; maygudu meawa.

¹⁴ Iidu aba ng'asheanji isiniin ea niing'eawayi NG'UTAMIIDA, ak baleanda jea jiila gayghami.”

¹⁵ Ng'ata ghang'eat Natani ak gawa gheanyi. Ak ghwanung' NG'UTAMIIDA ghamnyaan baleanda jiilsa gatmooda Uriya Dawdi, ak ghamnyaan muuchi.

Miyeeda orjeeda Dawdi

¹⁶ Ak gamus Dawdi ASEETA aba badayda baleanda; ak gooluulda geaw Dawdi, ak gawa gah ak gwalla ng'eanyi eaweesean.

¹⁷ Ak ghamiinaada fuga was gweargwa gheanyaawa aba murdeadaanyi, ak gagatkana ng'eanyi; ak ghwaraay, ghana ghoamu niny goombuuchi sea saawa.

¹⁸ Eaweeteaba ispwa ghami baleanda. Ak ghoawal fuga gadiyeeda Dawdi gideaba gaygwarukusa niny gideaba nimi baleanda; aba gideaba gwayi saawa, “Ng'ula, damanda duu ea majeek baleanda, geepalooli niny, ak ea mooleeyseasa iita; abeeda gajeerukusiindaan aseasa gideaba nimi baleanda? Abeeda gajiidu gwasawan geaw.”

¹⁹ Iidu nea ghwadaah Dawdi gideaba gameang'shi fugaaschi bea gadiyeeda, hean gwajeeng'u Dawdi gideaba nimi baleanda; ak ghwalamda Dawdi ak gwayeesha fugaaschi bea gadiyeeda, “Neada baleanda ea nimi?” Gwayeesha saawa, “Nimi.”

²⁰ Ng'ata ghang'eat Dawdi aba ng'eanyi, ak goohuushi, ak ghwayeashta nagheeda, ak ghwayam hang'weakaaschi; ak gawa jeeda gheeda NG'UTAMIIDA, ak ghamwaash ASEETA; ng'ata gawa gheanyi; ak ghoanyaashta gichea ghwaak, hean geayiin hamita madeadaanyi ak gweagiischi.

²¹ Ghwalamda fugaaschi bea gadiyeeda ak gwayeesha niny, “Ng'asheanji isiniin naaha? Giiluuldi geaw nea giiyeawdi nea baleanda ea majeek; amadu nea ghami baleanda, ging'eadi ak giyeagiischi.”

²² Ghwalamda niny ak gwayeesha, “Damanda mideewa baleanda, gealuuldi geaw nea geayeawdi; aba gideaba geayeenyi, ‘Neada ghwanal ng'eaha ea jea ghabwaydanaan NG'UTAMIIDA, ak ghwanyas baleanda eaweega?’

²³ Amadu ghamneawa ea nimi; abeeda gaydealuuldeaysa geaw naaha? Neada gaydaamu deaduudu? Aniini gaydawa headaanyi, nea niny ea maygabiigu heedeanyu.”

Jeata Sulemani

²⁴ Hean gamearmearani Dawdi gatmoadaanyi, was Batsheba, ak gawa heeda ak gwaluudayi; ak gwaji baleanda, ak gaguura gheawungaaschi Sulemani. Ak ghabwariiy NG'UTAMIIDA niny,

²⁵ ak goojeakta giijasta aba sibaneeda siguura Natani; ak gaguura gheawungaaschi Yedidiya, aba badayda NG'UTAMIIDA.

Dawdi ghoang'waay Raba

²⁶ Muchu gang'uchi Yoabu sea Rabayda eemeeda Amoni, ak ghoang'waay mujiineeda abiita sugoocheanda.

²⁷ Iidu goojeakta Yoabu buuneeda gaweay heeda Dawdi, ak gwayeesha, “Aniini neang'ucheewi Raba, ak ea meakghusa nih neageandi eara gheang'deenda.

²⁸ Asi ghamneawa bwadana geat buuneeda abit, ak gootuuwji aba murdeeda mujiini, ak gooneaweesi ak ghoang'waanyi; aba gideaba gajiidu ghaawunyi aniini ak ghaang'waanyi mujiini, ak geeguushteawa gheawungeasu.”

²⁹ Hean ghabwada geat Dawdi buuneesean ak gaweay Raba, ak gang'uchi saawa ak ghoang'waay.

³⁰ Ng'ata gageanda ngoofajeanda sugoocheanda nyaawa aba uhuudaanyi; ak durumanataanyi gwadeena dea dalaanteeda dahaabu, nea gwanda jeadaanyi lagheanga hees sheayeat; ak geayiin uhuuda Dawdi. Ak gweadu haleanjeeda aas aba mujiini, saang'a muuchi.

³¹ Ama ng'ata gweadu fuga mida jeeda, ak ghwanung' gwasin gadiyeeda beasheadayda geediga aba musumeeno ea mageemboojiga gharinga ea joomajeega gharinga, ak ghwanung' gwasin gadiyeeda hang'waay bea duwayda matafwaari, ak gwasunu eara aba mujiinajeega suurja bea fuga Amoni. Muchu gabiigu Dawdi sea buuneesean Yerusalemu.